ލަންޑަން (އޮގަސްޓް 22) - އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން، އާސެނަލުން އާ ސީޒަންގައި ކުޅުނު ފުރަތަމަ މެޗުން 25 އަހަރަށް ފަހު ޕްރިމިއާ ލީގަށް އެނބުރި އައި ކަވެންޓްރީ ސިޓީ 3-0 އިން ބަލިކޮށް ވަރުގަދަކޮށް ފަށައިފި އެވެ.
ބާވީސް އަހަރަށް ފަހު މިދިޔަ ސީޒަނު، ޕްރިމިއާ ލީގު ޗެމްޕިއަންކަން ހޯދި އާސެނަލުން އާ ސީޒަނުގައި ކުޅުނު ފުރަތަމަ މެޗުގައި ވާދަކުރި ކަވެންޓްރީ އަކީ މިދިޔަ ސީޒަނުގެ އިނގިރޭސި ދެ ވަނަ ޑިވިޝަން، ޗެމްޕިއަންޝިޕްގެ ޗެމްޕިއަން ޓީމެވެ. އެ ޓީމުން ދެ ވަނަ ޑިވިޝަން ތަށި މިދިޔަ ސީޒަނުގައި، ފްރޭންކް ލަމްޕާޑްގެ ކޯޗުކަމުގައި ހޯދިއިރު، މިއީ، އެ ޓީމަށް މި ޑިވިޝަނުގެ ތަށި 59 އަަހަރު ތެރޭ ލިބުނު ފުރަތަމަ ފަހަރެވެ.
އާސެނަލްގެ އެމިރޭޓްސް ސްޓޭޑިއަމްގައި ކަވެންޓްރީއާ ދެކޮޅަށް ފަށައިގެން ފުރަތަމަ ކޮޅުގައި، މި ފަހަރުގެ ޓްރާންސްފާ މާކެޓްގައި ކްލަބް ބްރޫޖަށް 50 މިިލިއަން ޑޮަލަރު ދީފައި އާސެނަލުން ގެނައި ކްރިސްޓޯސް ޒޯލިސް ރަނގަޅު ހަމަލާއެއް ފޮނުވާލި އެވެ. އެ ބޯޅަ ދިޔައީ ހުރަސްދަނޑިމަތިންނެވެ. އަދި، ޒޯލިސް ފޮނުވާލި އެހެން ޝޮޓެއް ގޯލުގެ ތިރީ ކަނަށް ވަންނަން ދަނިކޮށް، ކަވެންޓްރީ ޑިފެންޑަރުން އެ ބޯޅަ ސަލާމަތްކުރި އެވެ.
އާސެނަލުން ލީޑުނެގީ 15 ވަނަ މިނިޓްގަ އެވެ. މިއީ، އާސެނަލްގެ ރިކާޑޯ ކަލަފިއޯރީ ދިން ބޯޅައަކުން ކައި ހަވާޓްޒް ތިރިތިރިން ގޯލުގެ ކަނަށް ބޯޅަ ފޮނުވާލައިގެން ޖެހި ގޯލެކެވެ. މިއީ، އާސެނަލަށް އެންމެ ފަހުން ފުރަތަމަ އެގާރައިގައި ހިމެނިގެން، ހަވާޓްޒް ކުޅުނު ހަތަރު މެޗުގައި ޖެހި ހަތަރު ވަނަ ގޯލެވެ. މިއީ، ކުރިން ޗެލްސީ އަށް ކުޅުނު ހަވާޓްޒް އަށް އިނގިރޭސި ފުޓްބޯޅައިގައި މިކަން ހާސިލްކުރެވުނު ފުރަތަމަ ފަހަރެވެ.
ލީޑުނެގިތާ އަށް މިނިޓް ފަހުން، އާސެނަލުން ދެ ވަނަ ލަނޑު ޖެހި އެވެ. މިއީ، ޑެކްލަން ރައިސް ދިން ބޯޅައަކުން ޒޯލިސް ނެގި ހުރަަހެއް ދިފާއުކުރަން އުޅުމުގެ ތެރޭގައި ކަވެންޓްރީގެ ކީޕަރު، ކާލް ރަޝްވޯތު އަތުގަައި ޖެހިފައި އާސެނަލްގެ ބުކާޔޯ ސަކާ އަށް ލިބުމުން ޖެހި ގޯލެކެވެ.
މެޗުގެ ވަނަ ހާފު ފަށައިގެން މާ ލަސްތަކެއް ނުވެ އާސެނަލުން އެ ޓީމުގެ ތިން ވަނަ ލަނޑު ވަނީ ޖަހައިފަ އެވެ. މި ލަނޑު ކާމިޔާބުކުރީ އާސެނަލްގެ ކެޕްޓަން، މާޓިން އޮޑެގާޑް އެވެ. މިއީ، އާސެނަލްގެ ފުލްބެކް، ބެން ވައިޓް، އޭރިއާތެރެއަށް ވަދެ ނެގި ހުރަހަކަށް އަރައި އޮޑެގާޑް ޖެހި ގޯލެކެވެ. އެ ބޯޅަ އޮޑެގާޑް ފަޔަށް އެންމެ ރަނގަޅަށް ނޭރި ކަމުގައި ވިޔަސް، ޖެހި ޝޮޓް ގޯލަށް ވަނީ ކީޕަރު ރަޝްވޯތު އަތުގައި ޖެހިފަ އެވެ.
އޭގެ ފަހުން، ޒޯލިސް ޖެހި ޝޮޓެއް ކީޕަރު ރަޝްވޯތު ވަނީ މަތަަކޮށްފަ އެވެ. އަދި، މެޗުގެ ފަހު ކޮޅުގައި، މިކޭލް މެރީނޯގެ ހަމަލާއެއް ވެސް ރަޝްވޯތު ވަނީ ހުއްޓުވައިފަ އެވެ.
ބަދަލުތަކެއް ގެނެސްގެން ކަވެންޓްރީން ދެ ވަނަ ހާފުގައި ކުޅުން ރަނގަޅުކުރި އެވެ. އެ ގޮތުން، ލަމްޕާޑް ވަނީ މި ފަހަރުގެ ޓްރާންސްފާގައި ފަހުން އެ ޓީމާ ގުޅުނު ކުޅުންތެރިންނަށް ވެސް ފުރުސަތު ދީފަ އެވެ. ކަވެންޓްރީ އަށް ލަނޑު ޖަހަން އެންމެ ހުސް ފުރުސަތު ލިބުނީ، 85 ވަނަ މިނިޓްގަ އެވެ. އޭރިއާތެރެއަށް އަރައި، ޖެކް ރުޑޯނީ ބޮލުން ޖެހި ބޯޅަ އަމާޒުވީ އާސެނަލްގެ ކީޕަރު، ޑޭވިޑް ރާޔާ އަތަށެެވެ.
އާސެނަލުން މި ވަނީ ޕްރިމިއާ ލީގުގެ އާ ސީޒަނެއްގެ ފުރަތަމަ މެޗުގައި ޖެހިޖެހިގެން ފަސް ފަހަރު ކާމިޔާބު ހޯދައިފަ އެވެ. މިއީ، ކޯޗިން ކެރިއަރުގައި އާސެނަލްގެ ކޯޗު މިކޭލް އާޓެޓާގެ 150 ވަނަ މޮޅެވެ.
