މެޑްރިޑް (އޮގަސްޓް 22) - އެތުލެޓިކޯ މެޑްރިޑުން ރުހުނު ކަމުގައި ވިޔަސް، އިނގިރޭސި ޕްރިމިއާ ލީގުގެ ޗެމްޕިއަން، އާސެނަލަށް ބަދަލުވާން އާޖެންޓީނާގެ ފޯވާޑް، ޖޫލިއަން އަލްވަރޭޒް ބޭނުމެއް ނުވި ކަމަށް ސްޕެއިނުގެ މީޑިއާތަކުން ރިޕޯޓްކޮށްފި އެވެ.
މި ފަހަރުގެ ފީފާ ވޯލްޑް ކަޕްގެ ތެރެއިން ދިން އިންޓަވިއުއެއްގައި، އަލްވަރޭޒް ބުނެފައިވަނީ، އެންމެ ރަނގަޅު ގޮތަކަށްވާނީ އޭނާ އެދޭ ގޮތަށް ޓްރާންސްފާގެ ކަންކަން ކުރިއަށްގެންދަން ފުރުސަތު ދިނުމަށް ކަމަށް ބުނެފަ އެވެ. އަލްވަރޭޒް، މިހެން ބުނެފައިވަނީ، ބާސެލޯނާ އިން އޭނާގެ ސޮއި ހޯދަން ޝައުގުވެރިކަން ފާޅުކުރަމުންދިޔަ ދަނޑިވަޅެއްގަ އެެވެ.
ރިޕޯޓްތައް ބުނާގޮތުން، އުމުރުން 26 އަހަރުގެ އަލްވަރޭޒް ހޯދަން ބާސެލޯނާ އިން އެކި ގޮތްގޮތުން މަސައްކަތްކުރަަމުން އަންނައިރު، ތަކުރާރުކޮށް އެތުލެޓިކޯ އިން އަންނަނީ އަންނަ ސީޒަނުގައި އަލްވަރޭޒް ފެންނާނީ އެ ކްލަބުން ކަމަށް ބުނަމުންނެވެ. އެކަމަކު، އެތުލެޓިކޯގެ ސަޕޯޓަރުންގެ އަލްޓްރާސް ގްރޫޕުން އަންނަނީ އަލްވަރޭޒް އެ ކްލަބުން ފޮނުވާލަން ޑިމާންޑް ކުރަމުންނެވެ. އެއާ އެކު، އެތުލެޓިކޯ މެނޭޖްމަންޓުން އަންނަނީ ސްޕެއިނުގެ ކްލަބެއް ނޫން ޓީމަކަށް އަލްވަރޭޒް ދޫކޮށްލުމަށް މަޝްވަރާ ކުރަމުންނެވެ.
މި ފަަހަރުގެ ޓްރާންސްފާގައި އާސެނަލުން އަލްވަރޭޒް ހޯދަން މަސައްކަތްކުރި އެވެ. އަދި، ސްވިޑެންގެ ފޯވާޑް ވިކްޓަ ޔޯކެރޭޝް އާއި ފައިސާ ހިމެނޭ އޮފާއެއް އަލްވަރޭޒް ހޯދަން ކުރަން ވެސް ތައްޔާރަށް އޮތް ކަމަަށް މީޑިއާތަކުން ރިޕޯޓްކުރި އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން، އާސެނަލަށް އަލްވަރޭޒް ދޫކޮށްލުމަށް އެތުލެޓިކޯގެ މެނޭޖްމަންޓުން ބޭނުންވިޔަސް، އެ އަށް އޮތް ހުރަހަކީ، އަލްވަރޭޒް އެ ޑީލަށް ދެކޮޅު ހެދުމެވެ. އެއީ، އަލްވަރޭޒްގެ މައިގަނޑު ޓާގެޓަކަށް އޮތީ ބާސެލޯނާ އަށް ބަދަލުވުން ކަމަށްވާތީ އެވެ.
މިދިޔަ ޖޫން މަހު، އެތުލެޓިކޯ އިން ވަނީ ރެއާލް މެޑްރިޑުން އަލްވަރޭޒް ގަންނަން ހުށަހެޅި 172 މިލިއަން ޑޮލަރުގެ އޮފާއެއް އަނބުރާ ފޮނުވާލައިފަ އެވެ. އިނގިރޭސި ޕްރިމިއާ ލީގުގެ ޗެމްޕިއަން، އާސެނަލުން ވެސް އަލްވަރޭޒަށް ވަނީ ޝަައުގުވެރިކަން ފާޅުކޮށްފަ އެވެ. އަދި، އާސެނަލުން އޮތީ އެ ޓީމަށް ކުޅޭ ސްވިޑެންގެ ފޯވާޑްް، ވިކްޓަ ޔޯކެރޭޝް ހިމެނޭހެން، އަލްވަރޭޒް ގަންނަން ޓްރާންސްފާ ފީއެއް ދޭ ގޮތަށް ޑީލެއް ހުށަހަޅަން ތައްޔާރަށް ކަމަށް ރިޕޯޓްތައް ބުނެ އެވެ.
ރިވަ ޕްލޭޓް ދޫކޮށް، 2022 ވަނަ އަހަރު ޖެނުއަރީ މަހު، މެންޗެސްޓާ ސިޓީ އަށް އަލްވަރޭޒް ބަދަލުވީ 20 މިލިއަން ޑޮލަރަށެވެ. މީގެ ދެ އަހަރު ކުރިން، 90 މިލިއަން ޑޮލަރަށް އަގު އަރާ ޓްރާންސްފާ ޕެކޭޖެއްގައި އެތުލެޓިކޯ އަށް ބަދަލުވި އަލްވަރޭޒް އެ ކްލަބާ އެކު ކޮންޓްރެކްޓްގައި ހުރީ 2030 ވަނަ އަހަރުގެ ޖޫން މަހުގެ ނިޔަލަށެވެ.
އެތުލެޓިކޯ އަށް ކުޅުނު ދެ ސީޒަނުގައި އަލްވަރޭޒް ވަނީ 106 މެޗުން 49 ލަނޑު ޖަހައި، 17 ލަނޑު ޖަަހަން ފުރުސަތު ތަނަވަސްކޮށްދީފަ އެވެ.
