ބާސެލޯނާ (އޮގަސްޓް 17) - ރެއާލް މެޑްރިޑުން ލިބުނު އޮފާ ރަނގަޅު ނަަމަވެސް، ސްޕެއިން ގައުމީ ފުޓްބޯޅަ ޓީމަށް މި ފަހަރުގެ ފީފާ ވޯލްޑް ކަޕްގެ ޗެމްޕިއަންކަން ހޯދައިދިން ކެޕްޓަން، ރޮޑްރީގޯ (ރޮޑްރީ)، ބާސެލޯނާ އަށް ސޮއިކުރަން އެއްބަސްވެއްޖެ އެވެ.
ފްރާންސް ފުޓްބޯލް އިން 2024 ވަނަ އަހަރު ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމަށް ދޭ ބެލޮންޑިއޯ އެވޯޑް ހާސިލްކުރި ރޮޑްރީ އަށް ބާސެލޯނާ އިން ފުރަތަމަ ކުރި ދެ ބިޑް މެންޗެސްޓާ ސިޓީން ވަނީ އަނބުރާ ފޮނުވާލައިފަ އެވެ. އެ މުއްދަތުގެ ތެރޭގައި، ރެއާލުން ވަނީ ސިޓީން ރޮޑްރީ ވިއްކާލަން ކިޔާ އަގު ދޭން ތައްޔާރަށްހުރި ކަމަށް ބުނެ، ބޮޑު މުސާރަ ކޮންޓްރެކްޓެއް ވެސް ހުށަހަޅައިފަ އެެވެ.
އެކަމަކު، އެންމެ ފުރަތަމަ ވެސް ކުރިން އެތުލެޓިކޯ މެޑްރިޑާއި ވިޔަރެއާލަށް ކުޅުނު ރޮޑްރީގެ ވިސްނުމުގައި ހުރީ ބާސެލޯނާ އަށް ބަދަލުވުމަށް ކަމަށްވާތީވެ، އޭނާ މަޑުކުރީ އެވެ. ބާސެލޯނާ އިން ރޮޑްރީ ގަންނަން ހުށަހެޅި ތިން ވަނަ ބިޑް ކަމަށްވާ 88 މިލިއަަން ޑޮލަރުގެ އޮފާ، ސިޓީން ވަނީ ގަބޫލުކޮށްފަ އެެވެ. އަދި، މިހާރު ރޮޑްރީ އަަންނަނީ ބާސެލޯނާގެ މެޑިކަލްގައި ބައިވެރިވެ، ކޮންޓްރެކްޓްގައި ސޮއިކުރަން ތައްޔާރުވަމުން ކަމަށް ސްޕެއިނުގެ ނޫސްތަކުން ރިޕޯޓްކޮށްފައިވެ އެވެ.
އިނގިރޭސި މީޑިއާ ސްކަައި ސްޕޯޓްސް އިން ރިޕޯޓްކުރާ ގޮތުގައި، ބާސެލޯނާއާ އެކު، ރޮޑްރީ، ހަތަރު އަހަރުގެ ކޮންޓްރެކްޓެއްގައި ސޮއިކުރަން ވަނީ އެއްބަސްވެފަ އެވެ.
އުމުރުން 30 އަހަރުގެ ރޮޑްރީ، 2019 ވަނަ އަހަރު ސިޓީ އަށް ސޮއިކުރީ، އޭރު އެތުލެޓިކޯއާ އެކު ހަދާފައި އޮތް އެއްބަސްވުމުގައި ބާކީ އެއް އަހަރު އޮއްވަ އެވެ. މެންޗެސްޓާ ސިޓީގެ ކުރީޣެ ކޯޗު ޕެޕް ގާޑިއޯލާގެ އެދުމަށް ސިޓީން ރޮޑްރީގެ ސޮއި ހޯދީ 80 މިލިއަން ޑޮލަރުގެ ފީއެއް ދައްކައިފަ އެވެ. ސިޓީއާ އެކު ރޮޑްރީ ވަނީ 12 ތަށި އުފުލާލަައިފަ އެވެ. އެއީ، އިނގިރޭސި ޕްރިމިއާ ލީގު ހަތަރު ފަހަރާއި، ދެ އެފްއޭ ކަޕާއި، ތިން ލީގު ކަޕާއި، ޗެމްޕިއަންސް ލީގާއި ޔުއެފާ ސުޕަ ކަޕާއި ކްލަބް ވޯލްޑް ކަޕް އެވެ. ސިޓީގައި ހޭދަކުރި ހަތް ސީޒަނުގައި އެ ޓީމަށް 298 މެޗު ކުޅެދީފައިވެ އެވެ.
ވޯލްޑް ކަޕަށް ފަހު ބުރަކަށީގެ އޮޕަރޭޝަނެއް ކޮށްގެން ހުރި ރޮޑްރީ އަށް އެންމެ އަވަހަށް ވެސް ކުޅުމަށް އެނބުރި އާދެވޭނީ އަންނަ މަހު އެވެ.
