ލަންޑަން (އޮގަސްޓް 26) - މިދިޔަ ސީޒަނުގައި މެންޗެސްޓާ ޔުނައިޓެޑާ އެކު އެއްވެސް ތަށްޓެއް ނުލިބި، ޕްރޮފެޝަނަލް ފުޓްބޯލް އެސޯސިއޭޝަން (ޕީއެފްއޭ) އިން ހޮވި އެންމެ މޮޅު ކުޅުންތެރިޔާގެ ޓްރޮފީ ލިބޭނެ ކަމަށް އުންމީދުނުކުރާ ކަމަށް އެ މަގާމު ލިބުނު ޔުނައިޓެޑްގެ ކެޕްޓަން، ބްރޫނޯ ފެނާންޑޭސް ބުނެފި އެވެ.
ފެނާންޑޭސްގެ ކުރިން އެންމެ ފަހުން، ޕީއެފްއޭ އިން ހޮވާ އެންމެ މޮޅު ކުޅުންތެރިޔާގެ މަގާމު ހޯދި ޔުނައިޓެޑްގެ ކުޅުންތެރިއަކީ، 2010 ވަނަ އަހަރު އެ މަގާމު ހޯދި ވޭން ރޫނީ އެވެ. ޔުނައިޓެޑްގެ 12 ކުޅުންތެރިއަކު މި ޓްރޮފީ މިހާތަނަށް ހޯދާފައިވާއިރު، އެއް ކްލަބަކުން އެންމެ ގިނަ ޓްރޮފީ ހޯދީ ޔުނައިޓެޑްގެ ކުޅުންތެރިންނެވެ.
ކުޅުންތެރިންގެ ވޯޓުން ހޮވާ ޕީއެފްއޭ މޮޅު ކުޅުންތެރިޔާގެ މަގާމަށް ފެނާންޑޭސްއާ ވާދަކުރީ، މިދިޔަ ސީޒަނުގެ އިނގިރޭސި ޕްރިމިއާ ލީގުގެ ޗެމްޕިއަންކަން ހޯދި އާސެނަލްގެ ޑެކްލަން ރައިސް، ޑޭވިޑް ރާޔާ، ގަބްރިއެލް މަގާޅައެސްގެ އިތުރުން، އިނގިރޭސި އެފްއޭ ކަޕާއި ލީގު ކަޕްގެ ޗެމްޕިއަން ހޯދި މެންޗެސްޓާ ސިޓީގެ އާލިން ބްރައުޓް ހާލަންޑް އަދި ރަޔާން ޗާކީ އެވެ.
"މިއީ ވަރަށް ބޮޑު ކަމެއް. ކުޅުންތެރިންގެ ވޯޓުން ހޮވައިގެން ދިން މަގާމެއް ވީމަ. އެއީ، ކޮންމެ ހަފްތާއަކު އަހަރެން މި ނުކުންނަނީ މި ކުޅުންތެރިންނާ ދެކޮޅަށް ކުޅެން. މިއީ، އުންމީދު ކުރި މަގާމެއް ނޫން. އެއީ، ޓީމަށް ކާމިޔާބު ސީޒަނެއް ނޫން. އެހެން ކްލަބްތަކާ އަޅާކިޔަންޏާ. އެކަމަކު، އަމިއްލަ އިންޑިވިޖުއަލީ ރަނގަޅަށް ދިޔައީ. ހަގީގަތަކީ އުންމީދު ނުކޮށް ހުރި މަގާމެއް މިއީ،" ޕީއެފްއޭ އެވޯޑް ހަފްލާ އަށް ފަހު ނޫސްވެރިންނަށް ދިން އިންޓަވިއުއެއްގައި ފެނާންޑޭސް ބުންޏެވެ.
މީގެ ކުރިން، ތަށްޓެއް ނުލިބި، ގިނަ ކުޅުންތެރިންތަކަކަށް ވަނީ ޕީއެފްއޭގެ އެވޯޑް ލިބިފަ އެވެ.
އިންޑިވިޖުއަލީ މިދިޔަ ސީޒަނަކީ ފެނާންޑޭސް މޮޅު އަހަރެކެވެ. އެ ގޮތުން، ޕްރިމިއާ ލީގުގެ މޮޅު ކުޅުންތެރިޔާގެ މަގާމުގެ އިތުރުން، އިނގިރޭސި ފުޓްބޯޅަ ލިޔުންތެރިންގެ އެސޯސިއޭޝަނުން ހޮވި މޮޅު ކުޅުންތެރިޔާގެ މަގާމު ވެސް ހޯދީ ފެނާންޑޭސް އެވެ. ފެނާންޑޭސް ވަނީ މިދިޔަ ސީޒަނުގެ ލީގުގައި 21 ލަނޑު ޖަހަން ފުރުސަތު ތަނަވަސްކޮށްދީ ލީގުގެ ރެކޯޑެއް ގާއިމްކޮށްފަ އެވެ.
ސްޕޯޓިން ލިޒްބަންގެ ކުރީގެ ކެޕްޓަން، ފެނާންޑޭސް، ޔުނައިޓެޑާ ގުޅުނީ، 2020 ވަނަ އަހަރުގެ ޖެނުއަރީ މަހުގަ އެވެ. އެއީ 80 މިލިއަން ޑޮލަރުގެ ޑީލެއްގަ އެވެ. ޔުނައިޓެޑަށް މިހާތަނަށް ކުޅެދިން 327 މެޗުން ފެނާންޑޭސް ވަނީ 107 ގޯލު ޖަހައި، 105 ގޯލު ޖަަހަން ފުރުސަތު ތަނަވަަސްކޮށްދީފަ އެވެ.
ޕްރިމިއާ ލީގުގެ މޮޅު ކުޅުންްތެރިޔާގެ މަގާމު މިދިޔަ ސީޒަނުގައި ހޯދި ފެނާންޑޭސް، މި ވަގުތު ޔުނައިޓެޑްގެ ކޮންޓްރެކްޓްގައި ހުރީ އަންނަ އަަހަރުގެ ޖޫން މަހުގެ ނިޔަލަށެވެ. އެ ޓިމުން އަންނަނީ އޭނާއާ އެކު ހަދާފައިވާ ކޮންޓްރެކްޓް އާ ކުރަން މަސައްކަަތް ކުރަމުންނެވެ.
