މެންޗެސްޓާ (އޮގަސްޓް 26) - މެންޗެސްޓާ ޔުނައިޓެޑުން 88 މިލިއަން ޑޮލަރުގެ ފީއެއް ދެއްކުމަށް ފަހު، ބްރައިޓަން އެންޑް ހޯލްވް އަލްބިއަން އަށް ކުޅޭ ކެމަރޫންގެ މިޑްފީލްޑަރު، ކާލޮސް ބަލޭބާގެ ޑީލް ނިންމައިފި އެވެ.
މި ޓްރާންސްފާގައި އެއްބަސްވެފައި އޮތީ އުމުރުން 22 އަހަރުގެ ބަލޭބާ އަށް އެންމެ ފުރަތަމަ ޔުނައިޓެޑުން 80 މިލިއަން ޑޮލަރު ދޭ ގޮތަށެވެ. އަދި، ބާކީ އަށް މިލިއަން ޑޮލަރަކީ ޔުނައިޓެޑްގައި ބަލޭބާ ދައްކާ ކުޅުމަށް ބަލާފައި ޔުނައިޓެޑުން ދައްކާނެ ބައެކެވެ.
ފަސް އަހަރުގެ ކޮންޓްރެކްޓެއްގައި ޔުނައިޓެޑާ އެކު ސޮއިކުރި ބަލޭބާ އަކީ މިދިޔަ ސީޒަނުގަައި ވެސް ޔުނައިޓެޑުން ގަންނަން މަސައްކަތްކުރި ކުޅުންތެރިއެކެވެ. ބަލޭބާ، އެ ޑީލް ކުރިއަށްގެންދަން ބޭނުންވި ނަމަވެސް، ބްރައިޓަން އިން އޭނާ ވިއްކާލަން ކީ އަގު 100 މިލިއަން ޑޮލަރަށް ވުރެން މަތި ވުމުން، ޔުނައިޓެޑުން އެ ޑީލް މަޑުޖައްސާލީ އެވެ.
"ވަރަށް އާދަޔާހިލާފު އިހުސާސެއް ކުރެވެނީ. ޔުނައިޓެޑަށް ސޮއިކުރެވުމަކީ ހުވަފެނެއް ހަގީގަތަކަށް ވުން. އޯލްޑް ޓްރެފޯޑްގައި ކުޅުމަކީ އަބަދުވެސް ހާއްސަ ކަމެއް. ޔުނައިޓެޑްގެ ކުޅުންތެރިއަކަށް ހުރެ އެކަން ކުރުން ވާނީ ޝަރަފަކަށް،" ބަލޭބާ ބުންޏެވެ.
ފްރާންސްގެ ލިލް އިން 2023 ވަނަ އަހަރު ބްރައިޓަންއާ ގުޅުނު ބަލޭބާ މި ވަގުތު ހުރީ ފައިގެ ކުޑަހުޅަށް ލިބިފައިވާ އަނިޔާއަކަށް ފަރުވާ ހޯދަން ކުޅުމާ ދުރުގަ އެވެ. އެއީ، ބްރައިޓަން އިން އޮސްޓްރިއާގައި ކުރިއަށްގެންދިޔަ ޕްރީ ސީޒަން ޓްރެއިނިން ތެރެއިން ލިބުނު އަނިޔާއެކެވެ.
ޔުނައިޓެޑުން ބަލޭބާގެ ޑީލް ނިންމާފައިވާއިރު، މިއީ، މި ސީޒަނަށް އެ ޓީމުން ގެނައި ތިން ވަނަ މިޑްފީލްޑަރެވެ. މީގެ ކުރިން، އެސްޓަން ވިލާގައި ހުރި ބެލްޖިއަމްގެ މިޑްފީލްޑަރު، ޔޫރީ ޓީލަމަންސް އާއި ޗެލްސީގައި ހުރި ބްރެޒިލްގެ މިޑްފީލްޑަރު، އަންޑްރޭ ސަންޓޯސް ވެސް ވަނީ ޔުނައިޓެޑަށް ބަދަލުވެފަ އެެވެ. މި ތިން މިޑްފީލްޑަރުންނަށް ޔުނައިޓެޑުން، ޖުމްލަ އެކު، 200 މިލިއަން ޑޮލަރު ހަރަދުކޮށްފައިވެ އެވެ.
އިނގިރޭސި ޕްރިމިއާ ލީގުގެ އާ ސީޒަނުގައި މެންޗެސްޓާ ޔުނައިޓެޑުން ކުޅުނު ފުރަތަމަ މެޗުން ވަނީ ހަތް އަހަރަށް ފަހު ލީގަށް ޕްރޮމޯޓްވި ހަލް ސިޓީ އަތުން 2-0 އިން ބަލިވެފަ އެވެ.
