ސަލްޒްބާގް، އޮސްޓްރިއާ (އޮަގަސްޓް 13) - އެސްޓަން ވިލާ އަތުން 2-1 އިން މޮޅުވެ، ޕީއެސްޖީން ޔޫރަޕްގެ ފުޓްބޯޅަ ސީޒަން ފެއްޓުމަށްޓަކައި ކުޅޭ، ޔުއެފާ ސުޕަ ކަޕްގެ ތަށި ދިފާއުކޮށްފި އެެވެ.
ޕީއެސްޖީ އަކީ ރެއާލް މެޑްރިޑާއި އޭސީ މިލާނަށް ފަހު، ޔުއެފާ ސުޕަ ކަޕް ދިފާއުުކުރި ފުރަތަމަ ޓީމެވެ.
ފާއިތުވި ދެ ސީޒަނުގައި ޔުއެފާ ޗެމްޕިއަންސް ލީގުގެ ޗެމްޕިއަންކަން ހޯދި ޕީއެސްޖީން، މިދިޔަ އަހަރު ސުޕަ ކަޕް ކާމިޔާބުކުރީ ޓޮޓެންހަމް ހޮޓްސްޕާސް އަތުން ޕެނަލްޓީ ޖަހައިގެން މޮޅުވެގެންނެވެ. އެކަމަކު، މި ފަހަރުގެ ސުޕަ ކަޕް މެޗުގައި އެސްޓަން ވިލާ އަތުން ފުރިހަމަ ވަގުތުގެ ތެރޭގައި މޮޅުވީ އެވެ.
ރެޑްބުލް އެރީނާގައި މިރޭ ކުޅުނު މެޗުގައި ތާރީހީ ކަންތައްތަކެއް ވެސް ހިނގައިދިޔަ އެެވެ. އެ ގޮތުން، މެޗުގެ ރެފްރީ އަކީ، ސޯމާލިއާގެ ރެފްރީ، އޮމާރް އަރްޓާން އެވެ. އޭނާ އަކީ ޔުއެފާ ސުޕަ ކަޕް މެޗެއްގައި އިންސާފުކުރި އެފްރިކާގެ ފުރަތަަމަ ރެފްރީ އެވެ. އަރްޓާން އަށް ގިނަ ބަޔެއްގެ ސަމާލުކަން ހުއްޓުނީ، މި ފަހަރުގެ ފީފާ ވޯލްޑް ކަޕަށް، އެމެރިކާ އަށް އެތެރެވާން ވިސާ ނުލިބި، އެނބުރި ގައުމަށް ދާން ޖެހުމުންނެވެ.
މެޗު ފަށައިގެން، 20 ވަނަ މިނިޓްގައި، ޕީއެސްޖީން ވަނީ ލީޑުނަގައިފަ އެވެ. އެ ގޮތުން، ޕީއެސްޖީގެ ފްރާންސް ފޯވާޑް، ޑެޒީރޭ ޑޫއޭ ދިން ބޯޅައެއް ހިފައިގެން އޭރިއާތެރެއަށް ވަދެ، އެ ޓީމުގެ ޖޯޖިއާ ތަރި، ކްވިޗާ ކްވަރަޝްކޭލިއާ ފޮނުވާލި ބޯޅަ އަމާޒުވީ ގޯލުގެ މަތީ ދާގަނޑަށެެވެ.
އެސްޓަން ވިލާ އިން ނަތީޖާ ހަމަހަމަކުރެވޭތޯ ކުރި މަސައްކަތް ފުރަތަމަ ހާފުގައި ކާމިޔާބުކުރި އެވެ. މެޗުގެ 45 ވަނަ މިނިޓްގައި މި ލަނޑު ޖެހީ ޖޯން މެކްގިން ނެގި ހުރަަހަކަށް އަރައި، 17 އަހަރުގެ ފޯވާޑް، ބްރަޔަން މަޑްޖޯ އެވެ. މަޑްޖޯ އަކީ ސުޕަ ކަޕް ފައިނަލުގައި ލަނޑު ޖެހި އެންމެ ޒުވާން ކުޅުންތެރިޔާ އެވެ. މި ލަނޑު ޖެހުމުގެ ކުރިން ވެސް މަޑްޖޯ އަށް ރަނގަޅު ފުރުސަތުތަކެއް ލިބި ބޭނުމެއް ނުކުރެވުނެވެ.
މެޗުން ޕީއެސްޖީ މޮޅުވި ލަނޑު ޖެހީ 61 ވަނަ މިނިޓްގަ އެެވެ. ބަދަލަކަށް ކުޅެން އެރި، އޮސްމާން ޑެމްބެލޭ ދިން ބޯޅައަކުން ޑޫއޭ މި ގޯލު ޖެހިއިރު، ފުރަތަމަ ނިންމީ އޮފްސައިޑް ކަމަށެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލިއިރު، އޮފްސައިޑް ނުވާތީވެ، މެޗުގެ ރެފްރީ އަރްޓާން ވަނީ ގޯލެއް ކަމަށް ބަލައިގަނެފަ އެވެ.
ވިލާ އިން ދެ ވަނަ ފަަހަރަށް މެޗުގެ ނަތީޖާ އެއްވަރުކުރަން މަސައްކަތްކުރަމުންދިޔައިރު، އެ ޓީމުގެ ހަމަލާތައް ހުއްޓުވަން، ޕީއެސްޖީގެ ރަޝިއާގެ ކީޕަރު، މަޓްވެއި ސަފޯނޯވް ވަނީ މޮޅު ކުޅުމެއް ދައްކައިފަ އެވެ. އެ ގޮތުން، މެކްގިން ފޮނުވާލި ނުރައްކާތެރި ހަމަލާއެއް ހުއްޓުވި އެވެ. އަދި، އޭރިއާތެރެއިން، ވިލާގެ ޖޮއާއޯ ގޯމޭސް ފޮނުވާލި ޝޮޓެއް، ޕީއެސްޖީގެ ވަރެން ޒައިރް އެމެރީ ވަނީ މަތަކޮށްފަ އެވެ.
މި މެޗުން މޮޅުވެ، ޕީއެސްޖީގެ ކޯޗުކަމާ މީގެ ތިން އަހަރު ކުރިން ހަވާލުވި ލުއިސް އެންރީކޭ ވަނީ އެ ކްލަބާ އެކު، 13 ވަނަ ޓްރޮފީ ހޯދައިފަ އެވެ. އަނެއްކޮޅުން، ޔޫރޮޕާ ލީގުގެ އެންމެ ކާމިޔާބު ކޯޗު، އެސްޓަން ވިލާގައި މި ވަގުތު ހުރި، އުނާއި އެމެރީ ވަނީ ހަތަރު ވަނަ ސުޕަ ކަޕް ފައިނަލުން ބަލިވެފަ އެވެ.
