ޕެރިސް (އޮގަސްޓް 14) - ސްޕެއިނުގެ ހުނަރުވެރި ފޯވާޑް، ފެރާން ޓޮރޭސް، ޔޫރަޕްގެ ޗެމްޕިއަން، ޕީއެސްޖީ އަށް ވިއްކާލުމަށް ބާސެލޯނާ އިން އެއްބަސްވުމަކަށް އަތުވެއްޖެ އެވެ.
އެމެރިކާ، މެކްސިކޯ އަދި ކެނަޑާގައި ކުރިއަށްދިޔަ ފީފާ ވޯލްޑް ކަޕް ފުޓްބޯޅަ މުބާރާތުގެ ޗެމްޕިއަންކަން ސްޕެއިނަށް ހޯދައިދިން ގޯލު ޖަހައިދިން ފޯވާޑް، ފެރާން، ބާސެލޯނާގައި މަޑުކުރުވުމަށްޓަކައި، އާ ކޮންޓްރެކްޓެއް ދޭން އެ ކްލަބުން މަސައްކަތް ފެށި އެވެ. އެކަމަކު، އެކަން ކާމިޔާބުނުވީ، ފެރާން، ކެރިއަރުގައި އާ ޗެލެންޖެއް ނަގަން ބޭނުންވުމުންނެވެ.
އުމުރުން 26 އަހަރުގެ ފެރާން މި ވަގުތު ބާސެލޯނާއާ އެކު ހަދާފައި އޮތް ކޮންޓްރެކްޓްގައި ބާކީ އޮތީ އެންމެ އަހަރެކެވެ. ޕީއެސްޖީން ފެރާން ގަންނަން ބާސެލޯނާ އަށް ޖުމްލަ އެކު، 55 މިލިއަން ޑޮލަރު ދައްކާނެ އެވެ.
ސިޓީން ބާސެލޯނާ އަށް ފެރާން ވިއްކާލީ، 2021 ވަނަ އަހަރުގެ ޑިސެމްބަރު މަހު އެއްބަސްވި ޑީލެއްގަ އެވެ. އެއީ، އެ ވަގުތު 60 މިލިއަން ޑޮލަރު ދެއްކުމަށް ފަހު، ފަހުން އިތުރު 10 މިލިއަން ޑޮލަރު ދޭ ގޮތަށެވެ.
ބާސެލޯނާ އިން މި ފަހަރުގެ ޓްރާންސްފާގައި އެންމެ ގެންނަން ބޭނުންވި އާޖެންޓީނާގެ ފޯވާޑް، ހޫލިއަން އަލްވަރޭޒް އެވެ. އެކަަމަކު، އަލްވަރޭޒް ދޫކުރަން، އޭނާގެ ކްލަބް، އެތުލެޓިކޯ މެޑްރިޑުން ވަނީ ދެކޮޅު ހަދައިފަ އެވެ. ބާސެލޯނާ އިން ވަނީ، ފެރާން ހިމެނޭ ޑީލެއްގައި އަލްވަރޭޒް ގެންނަން ވެސް މަސައްކަތްކޮށްފަ އެވެ. އެކަމަކު، އެ ޑީލުގައި ހިމެނެން ފެރާން ވެސް ދެކޮޅު ހެދި އެވެ.
މިދިޔަ ސީޒަނުގެ ހުރިހާ މުބާރާތެއްގައި ބާސެލޯނާ އަށް 49 މެޗުން ޖުމްލަ އެކު، 21 ގޯލު ޖަހައިދިން ފެރާން، ޕީއެސްޖީ އަށް ގެންނަން އެންމެ މަސައްކަތްކުރީ އެ ޓީމުގެ ކޯޗަކަށް ހުރި ސްޕެއިނުގެ ލުއިސް އެންރީކޭ އެވެ. އެންރީކޭގެ ކޯޗުކަމުގައި ސްޕެއިނަށް ވެސް ކުޅެފައިވާ ފެރާން ވަނީ ސްޕެއިން ގައުމީ ޓީމަށް ކުޅުނު 65 މެޗުން 25 ލަނޑު ޖަހައިފަ އެވެ.
