ހަލް، އިންގްލެންޑް (އޮގަސްޓް 22) - އަށް އަހަރަށް ފަހު، އިނގިރޭސި ޕްރިމިއާ ލީގަށް އެނބުރި އައި ހަލް ސިޓީން 2-0 އިން މެންޗެސްޓާ ޔުނައިޓެޑް ބަލިކޮށްފި އެވެ.
މިއީ، ހަލްގެ ތާރީހުގައި ވެސް އެ ޓީމުން އިނގިރޭސި ފުރަތަމަ ޑިވިޝަން ނޫނީ ޕްރިމިއާ ލީގުގައި ޔުނައިޓެޑް އަތުން މޮޅުވި ފުރަތަމަ ފަަހަރެވެ. މީގެ ކުރިން މި ދެ ޓީމު ލީގުގައި ކުޅުނު 10 މެޗުގެ ތެރެއިން އަށް މެޗުން ޔުނައިޓެޑް މޮޅުވިއިރު، ދެ މެޗު ވީ އެއްވަރެވެ. ހަލް އިން ވަނީ 2017 ވަަނަ އަހަރު ލީގު ކަޕް ސެމީ ފައިނަލުގެ ދެ ވަނަ ލެގުގައި ޔުނައިޓެޑް ބަލިކޮށްފަ އެެވެ. އެކަމަކު، ދެ ލެގަށް ބަލާއިރު، އެގްރިގޭޓުން ކުރި ލިބުނީ ޔުނައިޓެޑަށެވެ.
ހަލް އިން ޕްރިމިއާ ލީގަށް މި އައީ ނުވަ އަހަރު ތެރޭ ފުރަތަމަ ފަހަރަށެވެ. އެ ޓީމު އެންމެ ފަހުން ޕްރިމިއާ ލީގުގައި ކުޅުނީ 2016/17 ވަނަ އަހަރު އެވެ. މި ފަހަރުގެ ޕްރިމިއާ ލީގަށް ހަލް ޕްރޮމޯޓްވީ ފުޓްބޯޅައިގެ އެންމެ އަގުބޮޑު މެޗުން މޮޅުވެގެންނެވެ. އެއީ، އިނގިރޭސި ޕްލޭއޮފް ފައިނަލް އެވެ. ޕްލޭއޮފް ބުރުގައި ކުޅެނީ ޗެމްޕިއަންޝިޕްގެ ހަތަރު ވަނަ އިން ފެށިގެން ހަ ވަނައާ ދެމެދުގައި ނިންމާ ހަތަރު ޓީމެވެ. އެ ގޮތުން، ހަލް އަކީ 2010ގެ ކާޑިފް ސިޓީ އަށް ފަހު، ލީގުގެ ހަ ވަނަ ހޯދުމަށް ފަހު، ޕްލޭއޮފް ފައިނަލުން މޮޅުވި ފުރަތަމަ ޓީމެވެ.
ހަލްގެ އެމްކޭއެމް ސްޓޭޑިއަމްގައި ކުޅުނު މެޗުގެ ފުރަތަަމަ ހާފުގައި އެ ޓީމުން ވަނީ ދެ ލަނޑު ޖަހައިފަ އެވެ. އެ ގޮތުން، ހަލް އިން ލީޑުނެގީ 17 ވަނަ މިނިޓްގައި ސެމީ އަޖާޔީ ޖެހި ގޯލުންނެވެ. މިއީ، ކޯނަރަކުން ހުރަސްވި ބޯޅައަކުން ހަލްގެ ފޯވާޑް، އޮލީ މެކްބާނީ ޖެހި ޝޮޓެއް ޔުނައިޓެޑްގެ ކީޕަރު، ސެން ލަމެންސް އަތުގައި ޖެހި، ދަނޑީގައި ވެސް ޖެހިފައި ބޭރަށް ނުކުތް ވަގުުތު އަޖާޔީ ޖެހި ގޯލެކެވެ.
ލީޑުލިބުމާ އެކު އިތުބާރު ހޯދައިގެން ކުޅެން ފެށި، ހަލް އިން ވަނީ 38 ވަނަ މިނިޓްގައި ދެ ވަނަ ލަނޑު ޖަހައިފަ އެވެ. މިއީ، ހިލޭ ޖެހުމަކުން، ރޭގަން ސްލޭޓާ ނެގި ހުރަހަކުން ނޯބެލް މެންޑީ ބޮލުން ޖެހި ގޯލެކެވެ.
ޔުނައިޓެޑުން ދެ ވަނަ ހާފަށް ނުކުތީ ޕެޓްރިކް ޑޯގޫގެ ބަދަލުގައި މާކަސް ރެޝްފޯޑް ކުޅެން އަރުވައިގެންނެވެ. ފުރަތަމަ ހާފުގަައި ޔުނައިޓެޑަށް ލަނޑު ޖަހައިދޭން ޑޯގޫ އަށް ހުސް ފުރުސަތެއް ލިބުނެވެ. އެ ގޮތުން، ޔުނައިޓެޑްގެ ހެރީ މެގުއާ ނެގި ހުރަހަކަށް އޭރިއާތެރެއިން އަރައި. ޑޯގޫ ފޮނުވާލަން އުޅުނު ބޯޅަ ރަަނގަޅަށް ފައިގައި ލައްވާލާ ގޮތެއްނުވި އެވެ.
ރެޝްފޯޑް ކުޅެން އަރައި ޔުނައިޓެޑުން އެޓޭކަށް ދާ ބޯޅަތައް އަވަސްކޮށްގެން ކުޅެ، ގޯލެއް ޖެހޭތޯ ބަލަމުންދިޔައިރު، އޭރިއާބޭރުން ބްރޫނޯ ފެނާންޑޭސް ރަނގަޅު ހަމަލާތަކެއް ފޮނުވާލި އެވެ. އޭގެ ތެރެއިން އެއް ބޯޅަ، ހަލްގެ ކީޕަރު، ކޮންސްޓަންޓީނޯސް ޒޮލާކިސް ވަނީ މަތަކޮށްފަ އެވެ. ހަލްގެ ޑިފެންސް ފަހަތުން ޔުނައިޓެޑްގެ ބްރަޔަން އެމްބެއުމޯ އަށް ހުސް ފުރުސަތެއް ލިިބިގެން ގޯލަށް ފޮނުވާލި ނަމަވެސް، އެ ބޯޅަ ވެސް ހުއްޓުވީ މެޗުގައި ރަނގަޅު ކުޅުމެއް ދެއްކި ކީޕަރު ޒޮލާކިސް އެވެ.
ލީގުގެ އާ ސީޒަނުގައި ކުޅުނު ފުރަތަމަ މެޗުގައި ޕްރިމިއާ ލީގުގެ އެންމެ ފަހުގެ ޗެމްޕިއަން، އާސެނަލުން ވަނީ 3-0 އިން ކަވެންޓްރީ ސިޓީ ބަލިކޮށްފަ އެވެ. ފަންސަވީސް އަހަރަށް ފަހު ޕްރިމިއާ ލީގަށް އެނބުރި އައި، ފްރޭންކް ލަމްޕާޑްގެ ކޯޗުކަމުގައި ކުޅޭ ކަވެންޓްރީ އަކީ މިދިޔަ ސީޒަނުގައި ދެ ވަނަ ޑިވިޝަންގެ ޗެމްޕިއަނެވެ.
