ޕެރިސް (އޮގަސްޓް 25) - މޮރޮކޯ އަށް މި ފަހަރުގެ ފީފާ ވޯލްޑް ކަޕް ފުޓްބޯޅަ މުބާރާތުގައި މޮޅު ކުޅުމެއް ދެއްކި މިޑްފީލްޑަރު، އައްޔޫބް ބުއާދީ ވިއްކާލަން އޭނާ ކުޅެމުން އަންނަ ކްލަބް، ފްރާންސްގެ ލިލް އިން ކީ އަގު ކަމަށްވާ 116 މިލިއަން ޑޮލަރު ދީފައި އެ ޑިލް ނިންމަން މެންޗެސްޓާ ސިޓީން ތައްޔާރުވެއްޖެ އެވެ.
ފްރާންސްގެ ފަސް އުމުރުފުރާއެއްގެ ގައުމީ ޓީމަށް ކުޅެ، 20 އަހަރުން ދަށުގެ ގައުމީ ޓީމުގެ ކެޕްޓަންކަން ވެސް ކުރި 18 އަހަރުގެ ބުއާދީ ވަނީ މޮރޮކޯގެ ފުރަތަމަ އެގާރައިގައި ހިމެނިގެން، މި އަހަރުގެ ފީފާ ވޯލްޑް ކަޕްގައި މޮޅު ކުޅުމެއް ދައްކަައިފަ އެވެ.
ބުއާދީ ވިއްކާލަން ލިލް އިން ކިޔާ އަގުބޮޑުވުމުން، ކްލަބްތަކުން އެ ޑީލް ކުރިއަށް ގެންދިއުން މަޑުޖައްސާލި އެވެ. އެކަމަކު، މެންޗެސްޓާ ސިޓީ އަށް އަލުން އެ ޑީލަށް ވަންނަން މަޖުބޫރުވީ އެ ޓީމަށް ކުޅޭ ސްޕެއިންގެ މިޑްފީލްޑަރު، ރޮޑްރީ، އެ ކްލަބް ދޫކޮށް ބާސެލޯނާ އަށް ބަދަލުވުމުންނެވެ. އެއާ އެކު، ސިޓީން ވަނީ، ލިލްއާ އެކު މަޝްވަރާކޮށް، ޖުމްލަ އެކު 116 މިލިއަން ޑޮލަރުގެ ފީއެއް އަރާ ޕެކޭޖެއްގެ ތެރެއިން ބުއާދީގެ ސޮއި ހޯދަން ތައްޔާރުވެފަ އެވެ.
ރިޕޯޓްތައް ބުނާގޮތުން، ސިޓީން އެންމެ ފުރަތަމަ ދައްކާ ފީ އަކީ 100 މިލިއަން ޑޮލަރެވެ. ބާކީ 16 މިލިއަން ޑޮލަރަކީ ސިޓީގައި ބުއާދީ ހާސިލްކުރާ ކަންތައްތަކަށް ބަލާފައި ދޭން ނިންމާފައިވާ ޕޭމެންޓްތަކެކެވެ.
މީގެ ތިން އަހަރު ކުރިން، އުމުރުން 16 އަހަރާއި ތިން ދުވަސް ވެފައި ވަނިކޮށް، ލިލް ސީނިއާ ޓީމަށް ކުޅެފައިވާ ބުއާދީ، މި ވަގުތު އެ ކްލަބްގެ ކޮންޓްރެކްޓްގައި ހުރީ 2029 ވަނަ އަހަރުގެ ޖޫން މަހުގެ ނިޔަލަށް ހަދާފައިވާ ކޮންޓްރެކްޓެއްގަ އެވެ.
ސިޓީން ވަނީ މި ފަހަރުގެ ޓްރާންސްފާ މާކެޓްގައި ނޮޓިންހަމް ފޮރެސްޓަށް ކުޅޭ އިނގިރޭސި މިޑްފީލްޑަރު، އެލިއަޓް އެންޑަސަން، 116 މިލިއަން ޑޮލަރު ދީފައި ގަނެފަ އެވެ. އެކަމަކު، އެ ޑީލްގެ އަގު ޖުމްލަ އެކު، 145 މިލިއަން ޑޮލަރަށް އެރުމުގެ ފުރުސަތު އެބައޮތެވެ. ސިޓީން ވަނީ މި ފަަހަރުގެ ޓްރާންސްފާގައި، 30 މިލިއަން ޑޮލަރަށް ޓްރޯޔެސްގެ މަތީސް ޑެޓޯބެޓް، 15 މިލިއަން ޑޮލަރަށް ލެސްޓާ ސިޓީގެ ވިންގް ޖެރެމީ މޮންގާ، ހަ މިލިއަން ޑޮލަރަށް މާސޭގެ ކީޕަރު ޖެރޯނިމޯ ރޫއީ އާއި ހަ މިލިއަން ޑޮލަރަށް ޝެފީލްޑް ވެނެސްޑޭގެ ޕީއާސް ޗާލްސްގެ ސޮއި ހޯދައިފަ އެވެ.
ބުއާދީގެ އިތުުރުން، ޕަލްމެއިރާސް އަށް ކުޅޭ އަލާން އެލިއާސްގެ ސޮއި ހޯދަން ސިޓީން އަންނަނީ މަސައްކަތް ކުރަމުންނެވެ.
