ސިޓީ ފަހު ވަގުތު މޮޅު، ލިވަޕޫލް އެއްވަރު

Aug 23, 2026, 10:56 PM
އިނގިރޭސި ޕްރިމިއާ ލީގުގައި ނިއުކާސަލާ އެއްވަރުކުރުމަށް ފަހު ލިވަޕޫލްގެ ކުޅުންތެރިން އުފާފާޅުކުރަނީ.

އިނގިރޭސި ޕްރިމިއާ ލީގުގައި ނިއުކާސަލާ އެއްވަރުކުރުމަށް ފަހު ލިވަޕޫލްގެ ކުޅުންތެރިން އުފާފާޅުކުރަނީ.

މެންޗެސްޓާ (އޮގަސްޓް 23) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީން ފަހު ވަގުތު ފަހަތުން އަރައި 2-1 އިން ބޯންމައުތު އަތުން މޮޅުވިއިރު، އިތުރު ވަގުުތުގެ ތެރޭގައި ލަނޑު ޖަހައި، ލިވަޕޫލުން 2-2 އިން ނިއުކާސަލް ޔުނައިޓެޑާ އެއްވަރުކޮށްފި އެވެ. 

ޕެޕް ގާޑިއޯލާ 10 ވަރަކަށް އަހަރަށް ފަހު ސިޓީ ދޫކޮށްލުމުން އެ ޓީމާ ހަވާލުވި ކޯޗު އެންޒޯ މަރެސްކާއާ އެކު ސިޓީ ވަނީ ފުރަތަމަ މެޗުގައި ޗެރިޓީ ޝީލްޑްގައި އާސެނަލް އަތުން ބަލިވެފަ އެވެ. ލީގުގައި މިރޭ އަމިއްލަ ދަނޑުގައި ސިޓީ އޮތީ 84 ވަނަ މިނިޓާ ހަމައަށް އެއް ގޯލު ފަހަތުގަ އެވެ. އެކަމަކު، ފަހު ވަގުތު ދެ ގޯލު ޖަހައި، ނަތީޖާ އަނބުރާލީ އެވެ. 

ސިޓީގެ އިއްތިހާދު ސްޓޭޑިއަމްގައި މިރޭ ކުޅުނު މެޗުގެ ފުރަތަމަ ހާފުގައި ބޯންމައުތުން ވަނީ ލީޑުަނަގައިފަ އެެވެ. ސިޓީ އެކޭ އެއްގޮތަށް ބޯންމައުތުން ވެސް ލީގުގައި އާ ކޯޗެއްގެ އިރުޝާދުގެ ދަށުން ފުރަތަމަ މެޗުގައި ކުޅުނުއިރު، މާކޯ ރޯސްގެ ކޯޗުކަމުގައި ބޯންމައުތަށް މެޗުގެ 26 ވަނަ މިނިޓްގައި ލީޑުނެގީ މާކަސް ޓަވެނިއާ އެވެ. މިއީ، އެވަނިލްސަން ދިން ބޯޅައަކުން ޓަވެނިއާ ޖެހި ގޯލެކެވެ. 

މެޗުގެ 84 ވަނަ މިިނިޓްގައި ސިޓީން އެއްވަރުކުރީ ކޯނަރަކުން ރަޔާން ޗާކީ ހުރަސްކުރި ބޯޅަކުން، މާކް ގޭހީ ބޮލުން ޖެހި ގޯލުންނެވެ. ގޭހީ އެ ބޯޅަ ގޯލަށް ފޮނުވާލީ އޭރިއާތެރެއިން ހުސްކޮށްއަރަ އެވެ. އިތުރު ވަގުތުގެ ފުރަތަމަ މިނިޓްގައި ސިޓީ މޮޅުކޮށްދިން ލަނޑު ޖެހީ ޖޮސްކޯ ގްވާޑިއޯލް އެވެ. ޗާކީ ދިން ބޯޅައެއް ކޮންޓްރޯލް ކޮށްލައި ތިރިތިރިން ގޯލަށް ވައްދާލައިގެން، ގްވާޑިއޯލް މި ޖެހި ގޯލު ފުރަތަމަ ނިންމީ އޮފްސައިޑް ކަމަށެެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ރެފްރީ ނިންމީ ގޯލެއް ކަމަށެވެ. 

އިނގިރޭސި ޕްރިމިއާ ލީގުގައި މިރޭ ބޯންމައުުތު ކޮޅަށް ލަނޑު ޖެހުމަށް ފަހު ސިޓީގެ ގްވާޑިއޯލް އުފާފާޅުކުރަނީ.
އިނގިރޭސި ޕްރިމިއާ ލީގުގައި މިރޭ ބޯންމައުުތު ކޮޅަށް ލަނޑު ޖެހުމަށް ފަހު ސިޓީގެ ގްވާޑިއޯލް އުފާފާޅުކުރަނީ.

ސިޓީ އާއި ބޯންމައުތެކޭ އެއްގޮތަށް ލީގުގަައި މިރޭ ނިއުކާސަލް އާއި ލިވަޕޫލް ކުޅުނު މެޗަކީ ވެސް ދެ ޓީމަށް ވެސް އާ ކޯޗަކާ އެކު ފުރަތަަމަ ރަސްމީ މެޗެވެ. ބޯންމައުތުގެ ކުރީގެ ކޯޗު އަންޑޯނީ އިރައޯލާ ލިވަޕޫލްގައި ހުރިއިރު، ނިއުކާސަލްގައި ހުރީ ސައުދީ ޕްރޯ ލީގުގެ އަލް އަހްލީގައި ކުރިން ހުރި ޖަރުމަނުގެ މަޓިއަސް ޖައިސްލާ އެވެ. 

ނިއުކާސަލް ދަނޑުގައި ކުޅުނު މެޗުގެ ފަސް ވަނަ މިނިޓްގައި ކައުންޓަ އެޓޭކަކުން އެ ޓީމުން ލީޑުނެގި އެެވެ. މިއީ، ވިލިއަން އޮސޫލާ ދިން ބޯޅައަކަށް އަރައި ތިރިތިރިން ގޯލަށް ބޯޅަ ފޮނުވާލައިގެން އެންތަނީ އެލަންގާ ޖެހި ގޯލެކެވެ. މިއީ، ޕްރިމިއާ ލީގުގައި އެލަންގާ، ނިއުކާސަލަށް ޖަހައިދިން ފުރަތަމަ ގޯލެވެ. މި ލަނޑާ އެކު، ލީޑުގައި އޮވެގެން ނިއުކާސަލް އިން ފުރަތަަމަ ހާފު ނިންމާލިއިރު، ދެ ވަނަ ހާފުގެ ކުޅުން ފަށައިގެން 10 މިނިޓް ތެރޭ ލިވަޕޫލުން އެއްވަރުކުރި އެވެ. މިއީ، އޭރިއާބޭރުން ތިރީ ކަނަށް ބޯޅަ ފޮނުވާލައިގެން ކޯޑީ ގަކްޕޯ ޖެހި ގޯލެކެވެ. 

ލިވަޕޫލުން އެއްވަރުކުރިތާ ދޮޅުމިނިޓެއްހާއިރު ތެރޭ ނިއުކާސަލް އިން އަނެއްކާ ވެސް ލީޑުނެގި އެވެ. މިއީ، ބަދަލަކަށް ކުޅެން އެރި ޖޯ ވިލޮކް ޖެހި ގޯލެކެވެ. މި ލަނޑަކީ ވެސް ނިއުކާސަލް އިން ކައުންޓަ އެޓޭކުގައި ޖެހި ގޯލެކެވެ. ނިއުކާސަލް އަށް ލީޑުފުޅާކޮށްދޭން ޖޮއާން ވިއްސާ އަށް ހުސްކޮށް ލިބުނު ފުރުސަތަކުން ޖެހި ބޯޅަ ލިވަޕޫލްގެ ކީޕަރު، އެލިސަން ބެކާ ވަނީ މަތަކޮށްފަ އެވެ. 

ދިހަ އަހަރު ތެރޭ ލީގުގައި ނިއުކާސަލުން ލިވަޕޫލް ބަލިކުރުމާ ގާތުގައި ވަނިކޮށް ހުރިހާ ކަމެއް ބަދަލުވީ އިތުރު ވަގުތުގެ ވެސް ފަހު ވަގުތުގަ އެވެ. މިއީ، ބަދަލަކަށް ކުޅެން އެރި، ލިވަޕޫލްގެ ޑެނިއަލް މުނޯޒަށް ނިއުކާސަލްގެ ލެވިސް ހޯލް ކުރި ފައުލަަކަށް ދިން ޕެނަލްޓީ އެކެވެ. އެ ޕެނަލްޓީ ލިވަޕޫލްގެ ޑޮމިނިކް ސޮބޯސްލާއި ވަނީ ކާމިޔާބުކޮށްފަ އެވެ. 

ލީގުގައި މިރޭ އެސްޓަން ވިލާ އަތުން ބްރައިޓަން ވަނީ 4-0 އިން މޮޅުވެފަ އެވެ. މެޗުގެ ބޮޑުބައިގައި ވިލާ އިން ކުޅުނީ ކުޅުންތެރިއަކު މަދުކޮށެވެ. އެއީ، ބްރައިޓަން އިން ހަތަރު ގޯލު ޖެހި ފަހުން، ވިލާގެ ޖޮއާއޯ ގޯމޭސަށް ދެއްކި ރަތެކެވެ. 

ކޮމެންޓް

ފަހުގެ ޚަބަރު

ބްރޭކްތައް އަންނަ ގޮތުން "ލީގުގެ ފީލްއެއް ނީނދޭ": އާތީ

ދިވެހި ޕްރިމިއާ ލީގު މެދުކަނޑާލަން ޖެހުމުން ކުޅުންތެރިންގެ ފިޓްނަސް އާއި ޕާފޯމަންސަށް އަސަރުކޮށް، ލީގުގެ އަސްލު ފޯރި ނުލިބޭ ކަމަށް ޓީސީގެ ކޯޗު އާތީ ބުނެފި. އާތީ ފާހަގަކުރި ގޮތުގައި ގިނަ ދުވަސްތަކެއްގެ ބްރޭކްތަކުގެ ސަބަބުން ޓީމުތަކުގެ ކޮންޓިނިއުޓީ ގެއްލި، މެޗުތަކަށް ތައްޔާރުވުމުގައި ބޮޑެތި ގޮންޖެހުންތަކެއް ކުރިމަތިވޭ

ފީފާގެ އިންތިހާބުގައި އަރަބިންގެ ތާއީދު އިންފަންޓީނޯ އަށް

އަންނަ އަހަރު ބާއްވާ ފީފާގެ އިންތިހާބުގައި މިހާރުގެ ރައީސް ޖިއާނީ އިންފަންޓީނޯއަށް ތާއީދުކުރުމަށް 22 ގައުމު ހިމެނޭ އަރަބް ފުޓްބޯޅަ ޔޫނިއަން (ޔޫއޭއެފްއޭ) އިން ނިންމައިފިއެވެ. އިންފަންޓީނޯއާ އެކު ޖުމްލަ ތިން ކެންޑިޑޭޓުން ވާދަކުރާ މި އިންތިހާބުގައި، އޭޝިއާ އާއި އެފްރިކާގެ ގައުމުތަކުގެ ބޮޑު ތާއީދަކާއެކު އޭނާއަށް މަގާމު ދިފާއުކުރުމުގެ ފުރުސަތު ބޮޑުކަމަށް ބެލެވެއެވެ. ފީފާގެ އާ ރައީސަކު ހޮވުމަށް ވޯޓުލުން އޮންނާނީ އަންނަ އަހަރުގެ މާޗް މަހު މޮރޮކޯގައި ބާއްވާ ފީފާ ކޮންގްރެސްގައެވެ.

އިންޑިއާގެ ލެޖެންޑުން ފުޓްބޯޅަ ރައީސްގެ ޝަކުވާ ސަރުކާރަށް

އިންޑިއާގެ ފުޓްބޯޅަ ފެޑެރޭޝަންގެ ރައީސް ކަލްޔާން ޗޯބޭގެ އިތުބާރު ނެތްކަމުގެ މައްސަލަ، ބައިޗުން ބުޓިއާ ހިމެނޭހެން އެ ގައުމުގެ 14 ލެޖެންޑުން ސްޕޯޓްސް މިނިސްޓަރަށް ހުށަހަޅައިފި. މި ސިޓީގައި ފާހަގަކޮށްފައިވަނީ ފެޑެރޭޝަންގެ މާލީ ހާލަތު ގޯސްވެ ބަނގުރޫޓުވަމުންދާ ކަމަށް

ސުޒޭނާއި މޯހަންގެ ދުލުން: ބަދުނަސީބާއި ހައްލެއްގެ ވާހަކަ!

ސަރަހައްދުގެ އެހެން ގައުމުތަކުން ބޭރުގައި އުޅޭ އެ ގައުމުތަކުގެ ދަރިފަސްކޮޅުގެ ކުޅުންތެރިންނަށް ރަށްވެހިކަން ދީގެން ގައުމީ ޓީމުތައް ވަރުގަދަކުރަމުންދާއިރު، ރާއްޖެއަށް އެ ފުރުސަތު ކުޑަކަމަށް ކުރީގެ ކޯޗުން ފާހަގަކުރެއެވެ. މިކަމުގެ ސަބަބުން ރާއްޖޭގެ ފުޓްބޯޅައަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމަށް އެކަށީގެންވާ ނިޒާމެއް ނެތްކަމުގެ ކަންބޮޑުވުން ވަނީ ފާޅުކޮށްފައެވެ.

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

Newsletter

Get the latest news delivered straight to your inbox