ޓޫރިޒަމްގެ ބޭނުންތަކަށް ތަންތަން ދޫކުރާ އިރުގައި އަދި ކޮންސްޓްރަކްޝަން މުއްދަތު އިތުރުކުރާއިރު ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގެ ގޮތުގައި ރިސޯޓު ވިޔަފާރިތަކުން ޓޫރިޒަމް ޓްރަސްޓް ފަންޑަށް ދައްކަން ޖެހޭ 56.8 މިލިއަން ރުފިޔާ ރިސޯޓު އެބައޮތް ކަމަށް އެ ފަންޑުގެ އޮޑިޓު ރިޕޯޓުން ދައްކައިފި އެވެ.
އޮޑިޓާ ޖެނެރަލް އޮފީހުން އާންމުކޮށްފައިވާ އެ ފަންޑުގެ އޮޑިޓު ރިޕޯޓުން ދައްކާ ގޮތުގައި މިދިޔަ އަހަރުގެ ނިޔަލަށް އެ ފަންޑުގައި ހުރީ 149.2 މިލިއަން ރުފިޔާ ކަމަށެވެ. ފަންޑަށް ލިބެން ޖެހޭ ފައިސާތައް ހިމެނުމުން މި ފަންޑުގައި ހުރި އަދަދު 200 މިލިއަން ރުފިޔާއަށް އިތުރެވެ.
ނަމަވެސް ފަންޑަށް ލިބެން ޖެހޭ ފައިސާ ހިސާބުކުރާ ގޮތާއި އެއީ ކޮން ގޮތަކުން ލިބެން ޖެހޭ ފައިސާއެއްކަން އޮޑިޓުން ސާފު ނުވާތީ، ނުލިބިވާ އަދަދަކީ ކޮންސްޓްރަކްޝަން މުއްދަތު އިތުރުކުރަން ޖެހޭއިރު ދައްކަން ޖެހޭ ފައިސާ ކަމެއް ނޫނީ ތަނެއް ކުއްޔަށް ދިންއިރު ދައްކަން ޖެހޭ ފައިސާ ކަމެއް ސާފެއް ނޫނެނެވެ. އަދި އެއީ ބަހާލައިގެން ދައްކަން އެއްބަސްވެފައިވާ ކަމެއް ނޫނީ އެއްބަސްވީ މުއްދަތު ފަހަނައަޅާ ދިޔައިރު ނުދައްކައިވާ ފައިސާ ކަމެއް ވެސް ރިޕޯޓުން ސާފެއް ނުވެ އެވެ.
ޓޫރިޒަމް ޓްރަސްޓު ފަންޑުގެ ގަވާއިދު އެކުލަވާލައިފި
މިއީ ޓޫރިޒަމް ދާއިރާއަށް މާލީ އެހީތެރިން ފޯރުކޮށްދިނުމަށާއި އެފަދަ އެހީތައް ޒިންމާދާރު ގޮތެއްގައި އަމާނާތްތެރިކަމާ އެކު ބެލެހެއްޓުމުގެ ނިޒާމެއް ގާއިމުކުރެވުމުގެ ގޮތުން އެކުލަވާލެވުނު ފަންޑެއް.
ޓޫރިޒަމާބެހޭ ގަވާއިދުގައް ބުނާ ގޮތުން، ރިސޯޓު ތަރައްގީކުރަން ދީފައިވާ ކޮންސްޓްރަކްޝަން މުއްދަތު އިތުރުކުރާއިރު ސީއެސްއާރުގެ ގޮތުގައި ދައްކަން ޖެހޭ ފައިސާ ދައްކަން ޖެހެނީ ތަން ތަރައްގީކޮށް ނިމި، ހިންގަން ފަށާ ތާރީހުން ފެށިގެން ތިން އަހަރު ދުވަހަށް ބަހާލައިގެން ކަމަށެވެ. ތަނެއް ކުއްޔަށް ނަގާއިރު ސީއެސްއާރުގެ ގޮތުގައި ދައްކަން ހުށަހަޅާ ފައިސާގެ އަދަދު ދައްކަން ޖެހެނީ ރިސޯޓު ތަރައްގީކުރަން ފަށާ ތާރީހުން ފެށިގެން ދެ އަހަރަށް ބަހާލައިގެންނެވެ.
ޓޫރިޒަމް ޓްރަސްޓް ފަންަޑުން ކޮށްފައިވާ ހަރަދުތަކަށް ބަލާއިރު، އެ ފަންޑު އޮޑިޓު ކުރި މުއްދަތު ކަމުގައިވާ މިދިޔަ އަހަރުގެ ސެޕްޓެމްބަރުން ފެށިގެން އެ އަހަރުގެ ނިޔަލަށް ހަރަދުކޮށްފައި ވަނީ އެންމެ ކަމަކަށެވެ. އެއީ ސަލްޓަން ޕާކާއި ޖުމްހޫރި މައިދާނުގައި ހުރި ފެންއަރުވާ ވަޑާންތައް މަރާމާތުކުރުމަށެވެ. މިކަމަށް އެ ފަންޑުން 8.5 މިލިއަން ރުފިޔާ ހަރަދުކޮށްފައި ވެ އެވެ.
މި ފަންޑުގެ އެންމެ މައި މަގުސަދުތަކުގެ ތެރޭގައި ޓޫރިޒަމް ސިނާއަތް ތަރައްގީކުރުމާއި، ޓޫރިޒަމް ދާއިރާއަށް ދިވެހިން ތަމްރީނުކުރުން ހިމެނުނު ކަމުގައި ވިޔަސް މިއިން އެއްވެސް ކަމަކަށް އެ ފަންޑުން އަދި ހަރަދުކޮށްފައި ނެތެވެ.
ޓޫރިޒަމް ޓްރަސްޓު ފަންޑު ބަލަހައްޓަނީ ރައީސް އޮފީހާއި ބޮޑެތި ވުޒާރާތަކާއި މީރާގެ މަންދޫބުން ހިމެނޭ ހަތް މެންބަރުންގެ ޓްރަސްޓު ފަންޑު ކޮމިޓީން ކަނޑައަޅާ ގޮތެއްގެ މަތިން ޓޫރިޒަމް މިނިސްޓްރީންނެވެ. މި ކޮމިޓީން ފަންޑު ހިންގަން ޖެހެނީ ފަންޑުގެ ޓްރަސްޓް ސްޓޭޓްމަންޓާ އެއްގޮތަށެވެ.
