އެމްއެމްއޭއިން ދޫކުރާ މަނީ އެކްސްޗޭންޖް ލައިސަންސް ނެތި، ގާނޫނާ ހިލާފަށް ވިޔަފާރި އުސޫލުން ބޭރު ފައިސާ މާރުކުރުމުގެ އަމަލުތައް ހިންގާ ފަރާތްތަކާބެހޭ މައުލޫމާތު ހިއްސާކުރުމަށް ފުލުހުން އާންމުންގެ ކިބައިން އެދިއްޖެއެވެ.
ފުލުހުން މިރޭ ނެރުނު ބަޔާނެއްގައި ބުނީ، މިފަދަ މައްސަލަތައް ތަހުގީގުކުރުމަށް އެކުލަވާލާފައިވާ ހާއްސަ ޓާސްކްފޯސްގެ އޮޕަރޭޝަންސް ނަންބަރު 9388733 އަށް އެސްއެމްއެސް، ވައިބަރ، ވަޓްސްއެޕް ނުވަތަ ޓެލެގްރާމް މެދުވެރިކޮށް މައުލޫމާތު ހިއްސާކުރެވޭނެ ކަމަށެވެ.
މައުލޫމާތު ދޭ ފަރާތްތަކުގެ ވަނަވަރު ފުރިހަމައަށް ރައްކާތެރިކޮށްދެވޭނެ ކަމަށާއި، އެފަރާތްތަކުން ތަހުގީގީ އެއްވެސް އިޖުރާއަތެއްގައި ބައިވެރިވާން ނުޖެހޭނެ ކަމުގެ ޔަގީންކަން ދޭ ކަމަށްވެސް ފުލުހުން ބުންޏެވެ.
މިފަދަ ފިޔަވަޅުތަކެއް ވަރުގަދަކުރަން މިފެށީ ދިވެހި ރުފިޔާގެ އަގު ވެއްޓި، ކަޅު ބާޒާރުގައި ޑޮލަރެއްގެ އަގު 23 ރުފިޔާއަށް އަރައިގެން ދިއުމާ ގުޅިގެން އެކަން މައިތިރިކުރަން އަޅަމުންދާ ފިޔަވަޅުތަކުގެ ތެރެއިންނެވެ.
ވިޔަފާރިތަކުގެ އިމްޕޯޓަށް ބޭނުންވާ ޑޮލަރު ލިބުން އިންތިހާއަށް ދަތިވެ، މުދަލުގެ އަގު ބޮޑުވާން ފެށުމުން، ސަރުކާރަށް ރިސޯޓުތަކުގެ އާމްދަނީގެ 40 ޕަސެންޓު މާރުކުރަން ވަނީ މަޖުބޫރުކޮށްފަ އެވެ.
މަޓީންވެސް ބުނެފައިވަނީ 40 ޕަސެންޓު ޑޮލަރު މާރު ނުކުރެވޭނެ ކަމަށެވެ.
ޑޮލަރުގެ ތާށިކަން ބޮޑުވެ، ކަޅު ބާޒާރުގައި އަގު އުފުލެން ދިއުމުން، ޑޮލަރު މާރުކުރަން މަޖުބޫރުވާ މިންވަރު އިތުރުކުރުމުގެ ބިލު ރައީސް މުހައްމަދު މުއިއްޒު ވަނީ ތަސްދީގުކުރައްވާފައެވެ.
ރައީސް މުއިއްޒު ވިދާޅުވީ، ރިސޯޓުތަކަކީ ދައުލަތުގެ އެއްޗެހި ކަމަށާއި ރިސޯޓު އޯނަރު މުއްސަނދިވެފައި، އެހެން އެންމެން ދަތިހާލުގައި އުޅެން ދޫކޮށްނުލެވޭނެ ކަމަށެވެ. ނަމަވެސް، ރިސޯޓުތަކުން މުވައްޒަފުންގެ މުސާރައާއި، ސާވިސް ޗާޖު، ރިސޯޓު ސަޕްލައި، ތެޔޮ ބިލު، ޓެކްސްތައް، ރަށު ކުލި އަދި ލޯނުތައްވެސް މިހާރު ދައްކަމުން ދަނީ ޑޮލަރުންނެވެ.
