ރިސޯޓުތަކުގައި ދައުލަތާއި ރައްޔިތުންގެ ހައްގެއް އެކުލެވޭ ކަމަށް ވިދާޅުވެ، ރިސޯޓުތަކުގެ ވެރިންނަށް ރައީސް މުހައްމަދު މުއިއްޒު އިންޒާރެއް ދެއްވައިފި އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު މާރުކުރަން މަޖުބޫރުވާ ބިލު ތަސްދީގު ކުރެއްވުމަށްފަހު ބައެއް ނޫސްވެރިންނާ ވާހަކަ ދައްކަވަމުން މުއިއްޒު ވަނީ ރިސޯޓުތައް ހިންގާ ވިޔަފާރިވެރިންނަށް ވަރަށް ބޮޑަށް ފާޑުވިދާޅުވެފަ އެވެ.
އެ ބައްދަލުވުމުގައި ވާހަކަ ދައްކަވަމުން މުއިއްޒު ވިދާޅުވީ، ޑޮލަރު މާރުކުރަންޖެހޭ މިންވަރު އިތުރު ކުރުމުން ބައެއް ވިޔަފާރިވެރިން އެމަނިކުފާނަށް މެސެޖު ކުރައްވާ، ޑޮލަރުގެ އަގު ބޮޑުކޮށްލާނެކަމުގެ އިންޒާރު ދީފައިވާ ކަމަށެވެ.
"ކީއްވެތޯ ވަކި ބަޔަކު މުއްސަނދިވެފައި އެހެން ހުރިހާ އެންމެން ސަފާކުރަން [ދަތިހާލުގައި އުޅެން] ޖެހެނީ. ނުޖެހޭނެ އެކަން ކުރާކަށް، އަޅުގަނޑު މިކަމާ އުޅެން ފެށީމާ ބައެއް ބޭފުޅުން ވިދާޅުވި ރާއްޖޭގެ ބަޖެޓު ކުޑަ ކުރާށޭ، ރައްޔިތުންނަށް ވެފައި ހުރި ވައުދުތައް ހުއްޓާލާށޭ. އަޅުގަނޑު އަތުގައި މެސެޖު އެބަހުރި. ރައްޔިތުންނަށް އަޅުގަނޑުވެފައި ހުރި ވައުދުތައް ފުއްދަން ބޮޑެތި ބަޖެޓުތައް ހަދައިގެން، ރައްޔިތުންނަށް ތަރައްގީ އާއި ތަމައްދުން ގެނެސްދޭން މަސައްކަތްކުރާ ކަމަށްވަންޏާ ޑޮލަރު ރޭޓު ވެސް ބޮޑުވާނޭއޭ، ތިމަންނަމެން ބްލެކް މާކެޓުގައި ވެސް ވިއްކާނަމޭ، މިއީ ކަމުދާ ވާހަކައެއް ނޫން،" ރައީސް ވިދާޅުވި އެވެ.
މުއިއްޒު ވިދާޅުވީ ރިސޯޓުތައް ހިންގަނީ ރާއްޖޭގައި ކަމަށާއި އެތަންތަނުގައި ދައުލަތުގެ އަދި ރައްޔިތުންގެ ހައްގު އެކުލެވޭ ކަމަށެވެ. އަދި "މިއީ ދައުލަތުގެ" އެއްޗެހި ކަމަށް ވެސް މުއިއްޒު ވިދާޅުވި އެވެ.
"އަޅުގަނޑު ވީ ވައުދުތައްތޯ ހުއްޓާލަންވީ ނޫނިއްޔާ ތިމަންނަމެން ރިސޯޓު ހިންގައިގެން ލިބޭ ޑޮލަރުން ރައްޔިތުންނަށް ހައްގު މިންވަރު ދޭންވީތޯ، މިއީ ކުރަންވީ ސުވާލަކީ ތި ބޭފުޅުން ނޫސްވެރިން ވެސް. ކާކަށްތޯ އޮޅުވާލަނީ، އަމިއްލަ ނަފްސަށް އޮޅުވާލަނީ ކީއްކުރަންތޯ. ރައްޔިތުންގެ ހައްގު އެބައޮތޭ، ރާއްޖޭގައޭ މި ހިންގަނީ މި ރިސޯޓުތައް. މިއީ ދައުލަތުގެ އެއްޗެއްސޭ. ދައުލަތުގެ އެއްޗެހި މިއީ. އެހެންވީމާ އަޅުގަނޑުމެން ކަންކަން ކުރަނީ ޒިންމާދާރުކަމާއެކީގައި،" މުއިއްޒު ވިދާޅުވި އެވެ.
ބޭރު ފައިސާއިން ލިބޭ އާމްދަނީގެ 40 ޕަސެންޓު މާރުކުރަން އެއްވެސް ރިސޯޓަކަށް ދަތިނުވާނެ ކަމަށް ވެސް މުއިއްޒު މިއަދު ވިދާޅުވި އެވެ.
"އަޅުގަނޑު ހަމަ ވަރަށް އަދަބުވެރިކަމާއެކީގައި ދަންނަވާލަން ބޭނުން ރިސޯޓުތަކުން 40 އިންސައްތަ މާރުކުރުމަކަށް އެއްވެސް ދަތިކަމެއް ނޯންނާނެ ކަމަށް އަޅުގަނޑުމެންނަށް ޔަގީންކަމާއެކީގައި އެނގޭ. ރިސޯޓުތައް ހަދަން ނަގާފައިވާ ލޯނުތައް ދެއްކުމަށް ނޫނީއްޔާ މުވައްޒަފުންނަށް މުސާރަ ދިނުމަށް ނޫނިއްޔާ އޮޕަރޭޝަނަލް އެކްސްޕެންސޭސްތަކަކަށް އެއްވެސް ދައްޗެއް ނުވާނެ 40 އިންސައްތަ މާރުކޮށްގެންނެއް. އެއީ ޔަގީންކަމެއް،" ރައީސް ވިދާޅުވި އެވެ.
