ބޭރު ގައުމުތަކުން މުދާ ގެންނަން ކަމުގައި ބުނެ، ޓެލެގްރަފިކް ޓްރާންސްފާ (ޓީޓީ) ފޮނުވުމަށް ފަހު ރާއްޖެއަށް މުދާ ނުގެންނަ މައްސަލަ ހުއްޓުވުގެ ގޮތުން ޓީޓީ ވެރިފިކޭޝަނާ ގުޅޭ އެމްއޯޔޫއެއްގައި ރާއްޖޭގެ ހުރިހާ ބޭންކުތަކާއެކު ކަސްޓަމްސްއިން މިއަދު ސޮއިކޮށްފި އެވެ.
މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިވެގެން ގާއިމުކުރާ މި ނިޒާމުގެ ދަށުން، ރާއްޖެއަށް އިމްޕޯޓުކުރާ މުދަލާއި ރާއްޖެއިން އެކްސްޕޯޓުކުރާ މުދަލާ ގުޅޭގޮތުން، ބޭންކުތައް މެދުވެރިކޮށް ހިންގާ ވިޔަފާރި ޓްރާންސެކްޝަންތަކުގެ މައުލޫމާތު ބަދަލުކުރެވޭނެ އެވެ.
އެމްއެމްއޭގައި ބޭއްވި ރަސްމިއްޔާތުގައި ބޭއްވި ރަސްމިއްޔާތެއްގައި ކަސްޓަމްސްގެ ފަރާތުން މި އެމްއޯޔޫތަކުގައި ސޮއިކުރެއްވީ ކަސްޓަމްސް ކޮމިޝަނަރު، ފާތިމަތު ދިޔާނާ އެވެ. އަދި ބޭންކުތަކުގެ ފަރާތުން ސޮއިކުރީ އެ ބޭންކުތަކުގެ ސީއީއޯ އިންނާއި މެނޭޖިން ޑިރެކްޓަރުންނެވެ.
އެމްއެމްއޭއިން ބުނި ގޮތުގައި މި މަސައްކަތް ވިލަރެސްކުރާނީ އެ އިދާރާގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) އިންނެވެ. މިއީ މާލީ ނިޒާމުގެ ތެރެއިން މަނީ ލޯންޑަަރިން އާއި ޓެރަރިޒަމް ފައިނޭންސިންގެ މައްސަލަތައް ދެނެގަންނަން އޮންނަ ހާއްސަ ޔުނިޓެކެވެ.
ޑޮލަރުގެ ތާށިކަން ބޮޑުވާތީ ވަގު ޓީޓީ ހުއްޓުވަން މަސައްކަތް ފަށައިފި
ވިޔަފާރިވެރިންނަށް ޑޮލަރު ލިބުމުގައި ހުރި ދަތިތަކަށް ބޭންކިން ނިޒާމުގެ ތެރެއިން ދާއިމީ ހައްލެއް ހޯދައިދިނުމަށް އެމްއެމްއޭއިން ވަނީ މަސައްކަތް ފަށާފަ. މީގެ އިތުރުން، ބޭންކުތަކުން ޑޮލަރު ހޯދުމަށް ހަދާ "ވަގު ޓީޓީ" ތައް ހުއްޓުވުމަށްޓަކައި ހޯމްލޭންޑް ސެކިއުރިޓީ މިނިސްޓްރީއާ ގުޅިގެން ހާއްސަ ސިސްޓަމެއް ގާއިމުކުރުމުގެ މަސައްކަތް ވެސް ކުރަމުން.
މި އެމްއޯޔޫގައި ސޮއިކޮށްފައި މި ވަނީ ޑޮލަރު މައްސަލައިގައި ސަރުކާރުން އަޅާ ފިޔަވަޅުތައް އިއުލާންކުރަން ބޭއްވި ނޫސްވެރިންގެ ބައްދަލުވުމުގައި، ޓީޓީތަކަށް ގެންނަ މުދާ މޮނިޓާކުރެވޭނެ ނިޒާމެއް ގާއިމުކުރައްވާނެ ކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވުމަށް ފަހުގަ އެވެ.
އެ ދުވަހު މުނައްވަރު ވިދާޅުވީ އިމްޕޯޓް މުދާ ބޭރުން ގެންނައިރު ފޭކް ޓީޓީ ހަދައިގެން ބޭންކުތަކުން ދޫކުރާ ބޭރު ފައިސާގެ ނާޖާއިޒު ފައިދާ ބަޔަކު ނަގަމުންދާ ކަން ފާހަގަކުރެވިފައިވާ ކަމަށެވެ.
"ހޯމް ލޭންޑް މިނިސްޓްރީއަކު އިތުރަށް މޮނިޓަކުރުމަށްޓަކައި ހާއްސަކޮށް އިމްޕޯޓްމުދާ ބޭރުން ގެންނައިރު ވަރަށް ބޮޑަށް އަޅުގަނޑުމެންނަށް ފާހަގަ ކުރެވޭ ޓީޓީ ހެދިގެން އެބަދޭ ފޭކް ޓީޓީގެ ގޮތުގައި. މާނައަކީ ބޭރު ފައިސާ ބޭންކުތަކަށް މިދޭއިރު ވެސް އޭގެ ނާޖާއިޒު ފައިދާ [ނެގުން] ހުއްޓުވުމަށްޓަކައި އަޅުގަނޑުމެންގެ ސިސްޓަމެއް ހެދި މިހާރު ވަނީ ގާތްގަނޑަކަށް ލައިވްކުރުމުގެ މަސައްކަތުގައި،" މުނައްވަރު ވިދާޅުވި އެވެ.
ގަވަރުނަރު ވިދާޅުވި ގޮތުގައި މިއީ ޑޮލަރު ބޭރުވާ މައްސަލަ އާއި ރަސްމީ ބޭންކިން ނިޒާމުގެ ތެރެއިން ޑޮލަރު ނުލިބޭ މައްސަލަ ހައްލުކުރަން އެޅޭ މުހިންމު ފިޔަވަޅެކެވެ.
