ރާއްޖެއަށް ކަނޑުމަގުން ސިއްރުން އެތެރެކުރަން އުޅުނު އަށް މިލިއަނަށްވުރެ ގިނަ ސިނގިރޭޓު މޯލްޑިވްސް ކަސްޓަމް ސާވިސްއިން އަތުލައިގަނެފި އެވެ.
ކަސްޓަމުން ބުނީ ކަނޑުމަގުން ރާއްޖެ ގެނައި ޝިޕްމަންޓެއްގައި ގަވާއިދާ ހިލާފު ތަކެތި ހުރެދާނެ ކަމަށް ބެލެވިގެން ހިންގި އޮޕަރޭޝަނުގައި "ޖެނެރަލް ކާގޯ" ގެ ގޮތުގައި ޑިކްލެއާ ކޮށްފައިވާ ޝިޕްމަންޓް ބަލައި ފާސްކުރިއިރު އޭގެ ތެރޭގައި ފޮރުވާފައި ހުއްޓާ ފެނުނީ 8،527،480 ސިނގިރޭޓް ސްޓިކް ކަމަށެވެ.
މި މައްސަލައިގައި ހިމެނޭ ސިނގިރޭޓުތައް ކަސްޓަމުގެ ބެލުމުގެ ދަށަށް ގެނެސް މައްސަލަ އިތުރަށް ތަހުގީގު ކުރަމުންދާ ކަމަށް ކަސްޓަމުން ބުންޏެވެ.
ސިނގިރޭޓުން ނަގާ ޑިއުޓީ ބޮޑުކުރަން ސަރުކާރުން ނިންމިތާ ދެ އަހަރު ނުވަނީސް، އެ ނިންމުން ބަދަލުކޮށް ޑިއުޓީ އަލުން ވަނީ ކުޑަކޮށްފަ އެވެ. މިގޮތަށް ސަރުކާރުން ނިންމާފައިވަނީ ސިނގިރޭޓު ޑިއުޓީ ބޮޑުކުރުމާ ގުޅިގެން ފޭކު ސިނގިރޭޓު ދައުރުވާ މިންވަރު އިތުރުވުމުންނެވެ.
ސިނގިރޭޓު ޑިއުޓީ އަގުހެޔޮކުރުމުން ސިނގިރޭޓު ފޮށީގެ އަގު 240ރ. އިން 150ރ. އަށް ވަނީ ވެއްޓިފަ އެވެ. އޭގެތެެރެއިން ބައެއް ބްރޭންޑްގެ ސިނގިރޭޓް ފޮށި މިހާރު 120ރ. އަށް ލިބެ އެވެ. އޭގެއިތުރުން ފޭކު ސިނގިރޭޓު ދައުރުވާ މިންވަރުވެސް މިހާރު ވަނީ މަދުވެފަ އެވެ.
ސަރުކާރުން މި ބަދަލު ގެނައީ ކަޅު ބާޒާރުގައި ފޭކު ސިނގިރޭޓު އާންމުވުން ހުއްޓުވުމަށާއި ޑަބްލިއުއެޗްއޯގެ ލަފާގެ މަތިން ކަމަށް ސަރުކާރުން ވަނީ ބުނެފަ އެވެ. ނަމަވެސް ޑަބްލިއުއެޗްއޯއިން ރަސްމީކޮށް މިހާތަނަށް ވެސް އެކަމާ ގުޅިގެން އެއްޗެއް ބުނެފައެއް ނުވެ އެވެ.
