ކައުންސިލުތަކުގެ އާމްދަނީ އާއި ބިންތައް ސަރުކާރަށް ނަގަން ގާނޫނުތައް ބަދަލުކުރަމުންދާއިރު، ކައުންސިލުތަކުން ދިގުމެދިގެންދާ އިހުތިޖާޖަށް ނުނިކުމެއްޖެ ނަމަ ލާމަރުކަޒީ ނިޒާމު އެކަށް ގެއްލިގެން ހިނގައިދާނެ ކަމަށް ކުރީގެ ރައީސް އަދި އިދިކޮޅު އެމްޑީޕީގެ ޗެއާޕާސަން މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދުގެ ރަސްމީ އެކްސް އެކައުންޓުގައި އެމަނިކުފާނު މިހެން ވިދާޅުވީ، ކައުންސިލުތަކުގެ ބާރުުތައް އިތުރަށް ނިގުޅައިގަަންނަ ގޮތަށް ލާމަރުކަޒީ ގާނޫނަށް ގެންނަމުންދާ ބަދަލުތައް ފާހަގަކުރައްވަމުންނެވެ.
އެ ގޮތުން ނަޝީދު ވިދާޅުވީ، ކައުންސިލު އިންތިހާބުގައި ނާކަމިޔާބީއާ ކުރިމަތިލާން ޖެހުނު ފަހުން ކައުންސިލުތަކުގެ އާމްދަނީ އާއި ބިން އަތުލަން ސަރުކާރުން ގާނޫނަށް އިސްލާހުތައް ގެންނަމުންދާ ކަމަށެވެ. މި ކަމުގައި ސަރުކާރާ ދެކޮޅަށް އަޑުއުފުލަން ކައުންސިލުތަކުން ކުރާ އިހުތިޖާޖުގައި، ރައްޔިތުން ބައިވެރިވާނެ ކަމަށް ވެސް އެމަނިކުފާނު ވިދާޅުވި އެވެ.
ލާމަރުކަޒީ ގާނޫނަށް ގެންނަ ބަދަލުތަކުގެ މައްސަލައިގައި މީގެ ކުރިން ވެސް ނަޝީދު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. އެ ގޮތުން މިއީ ސަރުކާރުން ވިސްނާނުލައި ގެންނަން އުޅޭ ބަދަލުތަކެއް ކަމަށް ބުނެ އެމަނިކުފާނު ވަނީ ކަންބޮޑުވުން ފާޅުކުރައްވާފަ އެވެ.
ސަރުކާރުން ބޭނުން ވެގެން ލާމަރުކަޒީ ގާނޫނަށް ގެންނަ ބަދަލުތަކުގެ ދަށުން ކައުންސިލުތަކުގެ އިހުތިސާސްގެ ތެރޭގައި ހުރި ބިންތައް ނެގޭނެ އިޖުރާއަތުތައް ވަނީ ފަސޭހަކޮށްފަ އެވެ. މި ބަދަލުތަކަކީ، ސަރުކާރު ހިންގާ ޕީއެންސީން ބުނާ ގޮތުގައި، ރަށްރަށުގެ ކައުންސިލުތަކުން ތަރައްގީއަށް ހުރަސް އަޅަމުންދާތީ ކޮންމެހެން ގެންނަން ޖެހޭ ބަދަލުތަކެކެވެ.
މިހެން ނަމަވެސް ރަށްރަށުގައި ކައުންސިލުތަކާއި އިދިކޮޅާއި ބައެއް މަދަނީ ޖަމިއްޔާތަކުން ވަނީ އެ ވާހަކަތައް ދޮގުކޮށް، މި ގޮތަށް ބަދަލުތައް ނުގެންނަން ގޮވާލާފަ އެވެ. އަދި ގިނަ އަދަދަކަށް ސޮއި ހޯދުމަށް ފަހު މި ބަދަލުތައް ނުގެންނަން ގޮވާލާ ޕެޓިޝަނެއް ވެސް ހުށަހެޅި އެވެ.
ރަށްރަށުގެ ބިންތައް ސަރުކާރަށް ނެގުމުގެ ބާރު ލިބޭ ބިލު މަޖިލީހުން ފާސްކޮށްފި
ސަރުކާރު ހިންގާ ޕީއެންސީގެ މެންބަރުންގެ ތާއީދާއެކު މި ބިލު ފާސްކުރީ، ރައްޔިތުންގެ ހިޔާލު ހޯދުމަށް އިދިކޮޅު މެންބަރުން ހުށަހެޅި އިސްލާހުތަކަށް އަމަލުކުރުމެއް ނެތިއެވެ.
މި ހުރިހާ އެންމެންގެ ކަންބޮޑުވުންތަކާއި ދެކޮޅު ހެދުންތަކަށް އެއްވެސް ވަރަކަށް އިޖާބަ ނުދީ، ރައްޔިތުންގެ މަޖިލީހުގައި ތިބި ޕީއެންސީގެ މެންބަރުން ވަނީ ކައުންސިލުތަކުގެ ބާރުތައް ހަނިވާ ގޮތަށް ބޭނުންވި ހުރިހާ ބަދަލުތަކެއް ގެންނަން އިއްޔެ ފާސްކޮށްފަ އެވެ. މި ބަދަލުތައް ގާނޫނުގައި ހިމަނާނީ ރައީސް މުހައްމަދު މުއިއްޒު މި ބިލު ތަސްދީގުކުރެއްވުމުންނެވެ.
