ގދ. ތިނަދޫގައި އެއާޕޯޓެއް ތަރައްގީކޮށްފިއްޔާ، އެ ރަށުގެ ތަރައްގީއަށް ހުރަސް އެޅޭނެ ކަމަށް ކުރީގެ ރައީސް މުހައްމަދު ނަޝީދު ރޭ ވިދާޅުވެއްޖެ އެވެ.
ތިނަދޫގައި ބޭއްވި "އާބާދީ 60" ޖަލްސާގައި ނަޝީދު ވިދާޅުވީ ތިނަދޫގައި އެއާޕޯޓެއް އެޅުމާ ގުޅޭގޮތުން ރައްޔިތުން ވަރަށް ބޮޑަށް ވިސްނަން ޖެހޭ ކަމަށާއި އެ ރަށުގައި އެއާޕޯޓެއް އެޅުމުގެ ބަދަލުގައި ތިނަދޫ ކައިރީގައި އޮތް ކާޑެއްދޫ އެއާޕޯޓު އިތުރަށް ތަރައްގީކުރަން ފެންނަ ކަމަށެވެ.
"މިތަނުގައި [ގދ. ތިނަދޫ] ގައި އެއާޕޯޓެއް ހައްދަވައިފިނަމަ ތިބޭފުޅުންގެ ތަރައްގީއަށް އެ އެޅެނީ ބޮޑު ހުރަހެއް. ތިބޭފުޅުންނާ ޖެހިގެން އޮތް ރަށުގައި އެއޮތީ ހަތް މިނެޓު، ފަސް މިނެޓު ދުރުގައި އެއާޕޯޓެއް. އެތަން އަވަހަށް ތަރައްގީކުރުމަށް އަވަހަށް ނިންމަވަންވީ. އަޅުގަނޑަށް ޔަގީން ތިނަދޫ ރައްޔިތުން ވިސްނާނެކަން. އަޅުގަނޑަކަށެއް ނޯޅޭ އެ ރައްޔިތުންގެ ތޫނުކަމާއި ވިސްނުންތެރިކަމެއް. އެ ރައްޔިތުން އަބަދުވެސް ނިންމަމުން ގެންދާނީ ރައްޔިތުންނަށް އެންމެ ރަނގަޅު ގޮތް،" ނަޝީދު ވިދާޅުވި އެވެ.
އެމަނިކުފާނު އިތުރަށް ވިދާޅުވީ ރަށްރަށުގެ ދިރުންތައް ހިމާޔަތް ކުރެވޭނެ ގޮތްތައް ހޯދައި، ގުދުރަތީ ރޭވުންތެރިކަން ހަނދާން ނައްތާލައިގެން ނުވާނެ ކަމަށެވެ. އެގޮތުން ފަރެއް އޮތިއްޔާ ހިއްކާލުމުގެ ސަބަބުން އެންވެރިކަން ދަށްވަމުންދާކަން ވެސް ނަޝީދު ފާހަގަކުރެއްވި އެވެ.
"އެބަ އާދޭ އެނގޭތޯ މޫސުމަށް ބަދަލު. އަޅުގަނޑުމެންގެ ފަރުތަކާއި، އަޅުގަނޑުމެންގެ ފަޅުތަކާއި، އަޅުގަނޑުމެންގެ ތުނޑިތަކާއި، އަޅުގަނޑުމެންގެ ގޮނޑުދޮށްތައް ހިމާޔަތް ކުރެވޭނެ ގޮތްތައް އަޅުގަނޑުމެން ވިސްނާން ޖެހޭނެ،" ނަޝީދު ވިދާޅުވި އެވެ.
"ގުދުރަތީ ރޭވުން ހަނދާން ނައްތައިގެން އަޅުގަނޑުމެން ނުވާނެ. އެން ދަމާ، ދަމާ، ދަމާ، ދަމާ ގޮސް ދަމާނެ އެމެއް ނެތި މަސްވެެރިކަން ހީނަރުވެދަނީ. އަޅުގަނޑުމެން ވިސްނަން ޖެހޭނެ. ފަރެއް އޮތިއްޔާ ހިއްކާލާނެ. ހިއްކީމާ ދެން އެމެއް ނާރާނެ."
މީގެއިތުރުން ތަރައްގީއަކީ މާލެ ކަމަށް ހިތަށް ވައްދާފައިވީ ނަމަވެސް، ތިނަދޫއަކީ މާލެއެއް ކަމަށް ހަދަން އުޅެފިނަމަ މުޅި ރާއްޖެއަށް އޭގެ ގެއްލުން ލިބޭނެ ކަމަށް ނަޝީދު ވިދާޅުވި އެވެ. އެމަނިކުފާނު ވިދާޅުވީ ރަށުގެ ދިރުންތައް ބަހައްޓައިގެން ތަރައްގީ ހޯދޭނެ ކަމަށެވެ.
ނަޝީދު ވަނީ މީގެ ކުރިންވެސް ކައިރި ކައިރީގައި އެއާޕޯޓުތައް އެޅުމާ ދެކޮޅަށް ވާހަކަ ދައްކަވާފަ އެވެ. އެމަނިކުފާނު ވިދާޅުވާ ގޮތުގައި ކައިރިކައިރީގައި އެއާޕޯޓު އެޅުމަކީ ބޮޑު އިސްރާފެކެވެ.
ކޮންމެ ރަށަކުން 20-30 މިނެޓުން ދެވޭނެ އެއާޕޯޓެއް ތަރައްގީ ކުރުމަކީ ރާއްޖޭގެ މައި ދެ ސިޔާސީ ފިކުރުން ވެސް ވެރިކަމަށް އައުމަށް ވި ވައުދެކެވެ. އެމްޑީޕީ ސަރުކާރުން ވެސް ގިނަ އެއާޕޯޓުތަކެއް ތަރައްގީ ކުރަން ފެށިއިރު މި ސަރުކާރުން ވެސް އެ ސިޔާސަތު ބަދަލުކުރުމެއް ނެތި އަންނަނީ ތަންފީޒު ކުރަމުންނެވެ.
ކޮންމެ އެއާޕޯޓެއް ހިންގުމަކީ ވެސް ބޮޑު ހަރަދުތަކެއް ދާނެ ކަމެއް ކަމަށްވާއިރު ފައިދާވާނެ ގޮތަށް ރާއްޖޭގައި ގިނަ އެއާޕޯޓުތަކެއް ނުހިންގޭނެ އެވެ. ގިނަ އެއާޕޯޓުތަކަށް ދުވާލަކު އެއް ފްލައިޓު ވެސް ނޯންނައިރު ބައެއް އެއާޕޯޓުތަކަށް ހަފްތާއަކު ޖައްސަނީ އެއް ފްލައިޓެވެ. އެހެންވެ ގިނަ އެއާޕޯޓުތައް ހިންގަނީ ގެއްލުމުގަ އެވެ.
ރާއްޖެއަކީ މާ ބޮޑު އޭވިއޭޝަން އިންޑަސްޓްްރީއެއް އޮތް ގައުމެއް ނޫނެވެ. އަދި އެ އިންޑަސްޓްރީން ފައިދާ ނެރެވޭނެ ވަރުގެ އާބާދީއެއް އޮތް ގައުމެއް ނޫނެވެ. އެއާޕޯޓުތައް އަޅަމުން އަންނަނީ ސިޔާސީ ވައުދުތަކެއް ތަންފީޒު ކުރުމުގެ ގޮތުން ކަމަށްވުމުން ގިނަ ބައެއްގެ ފާޑުކިޔުން އެކަމަށް އަމާޒުވެ އެވެ.
