ރަށްތަކާއި ސިޓީ ކައުންސިލުތަކުގެ އިހުތިސޯސުގެ ތެރޭގައި ހިމެނޭ ބިންތައް ސަރުކާރަށް ބޭނުން އިރެއްގައި ނެގޭ ގޮތަށް ލާމަރުކަޒީ ގާނޫނު ބަދަލުކުރަން ހުށަހެޅި ބިލު އަނބުރާ ގެންދަން ގޮވާލައި ހުށަހަޅާފައިވާ ޕެޓިޝަނަށް ރިއާޔަތްނުކޮށް އެ އިސްލާހު ލާމަރުކަޒީ ކޮމިޓީން މިރޭ ފާސްކޮށްފި އެވެ.
ސަރުކާރު ހިންގާ ޕީއެންސީން އެންޑޯސްކޮށްފައިވާ މި ބިލަކީ ސަރުކާރާ އެކީ މަސައްކަތް ކުރާ މިނިވަން މެންބަރު، ތުޅާދޫ ދާއިރާގެ އަބްދުލްހަންނާން އަބޫބަކުރު ހުށަހެޅުއްވި ބިލެކެވެ.
ލާމަރުކަޒީ ކޮމިޓީގެ ބައްދަލުވުމުގައި އެ ބިލު ކޮމިޓީން ފާސްކުރީ ކައުންސިލް އިހްތިސޯސުން ވަކިކުރެވޭ ބިމުގައި ކައުންސިލަށް ނުވަތަ ތިންވަނަ ފަރާތަކުން އިންވެސްޓްމަންޓެއް ކޮށްފައިވާނަމަ އެފަދަ އިންވެސްޓްމަންޓަކަށް ފިނޭންސް މިނިސްޓްރީން ކަނޑައަޅާ ބަދަލެއް ދެވޭ ގޮތަށް ބަދަލުކޮށްގެންނެވެ.
މީގެއިތުރުން ބިލުގެ މަސައްކަތްތައް ނިންމުމުގެ ސުންގަޑި މާދަމާ މެންދުރު 2:00 ޖެހުމާ ހަމައަށް ވަނީ އިތުރުކޮށްފަ އެވެ. މިއާއެކު އަންނަ ބުދަ ދުވަހު ބާއްވާ މަޖިލީހުގެ ޖަލްސާއަށް ބިލު ހުށަހަޅާނެ އެވެ.
ލާމަރުކަޒީ ގާނޫނަށް ގެންނަން އުޅޭ ބަދަލުތައް އަވަސްކުރަން ސަރުކާރުން މަސައްކަތް ކުރަމުންދާއިރު، މި ބަދަލުތައް ގެނައުމާ ދެކޮޅަށް 2300 އަށް ވުރެ ގިނަ މީހުން ސޮއިކޮށްފައިވާ ޕެޓިޝަނެއް ވަނީ ހުށަހަޅާފަ އެވެ.
މީގެއިތުރުން ބިންތައް އަތުލެވޭ ބިލު މަޖިލީހުން ފާސްކުރަން ބާރުއަޅައި ސަރުކާރުން އިސްނަގައިގެން މުވައްޒަފުން ލައްވައި ސޮއިކޮށްގެން ޕެޓިޝަނެއް ވަނީ މަޖިލީހަށް ހުށަހަޅައިފަ އެވެ. އެ ޕެޓިޝަނުގައި 10،000 އަށްވުރެ ގިނަ މީހުން ސޮއިކޮށްފައިވާއިރު، ބިލު ލާމަރުކަޒީ ކޮމިޓީން ފާސްކުރިއިރު އެ ޕެޓިޝަނަށްވެސް ރިއާޔަތްކޮށްފައެއް ނުވެ އެވެ.
ތުޅާދޫ ދާއިރާގެ މެންބަރު އަބްދުލްހަންނާނު މަޖިލީހަށް ހުށަހަޅުއްވާފައިވާ އިސްލާހުގައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
ލާމަރުކަޒީ ގާނޫނަށް ދެން ގެންނަ ބަދަލުތައް ހުށަހަޅާފައި ވަނީ ކައުންސިލު މެންބަރުންގެ ސުލޫކީ މިންގަނޑަށެވެ. މި މިންގަނޑަށް އިތުރުކުރާ ކަންކަމުގައި ވަނީ، ސަރުކާރަށް ފުރިހަމައަށް އެއްބާރުލުން ދޭން ކައުންސިލަރުންނަށް މަޖުބޫރުކުރާ ގޮތަށެވެ.
އޭގެ އިތުރުން، މަގުބޫލު ސަބަބެއް ނެތި ސަރުކާރުގެ މަޝްރޫއުތަކަށް ހުރަސްއެޅޭ ގޮތަށް އަމަލުކޮށްގެން ނުވާނެ ކަމަށް ހިމަނަން ވެސް ވަނީ ހުށަހަޅާފަ އެވެ. އަދި، އެފަދަ މަޝްރޫއުތައް ހުއްޓުވުމަށް ނިންމުންތައް ނިންމައިގެން ނުވާނެ ކަމަށް ވެސް ބަދަލުތަކުގައި ވެ އެވެ.
