ސަރުކާރުން ބޭރު ފައިސާގެ ގާނުނަށް ގެނައި ބަދަލުތަކާ ގުޅިގެން ކުރިއަށް އޮތް ދުވަސްތަކުގައި ޑޮލަރުން މުސާރަ އާއި ސާވިސް ޗާޖު ނުދެވޭނެކަން ރިސޯޓުތަކުގައި މަސައްކަތް ކުރާ މުވައްޒަފުންނަށް އަންގަމުންދާ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) ވިދާޅުވެއްޖެ އެވެ.
ރިސޯޓުތަކަށް ލިބޭ ޑޮލަރު އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރުމަކީ ކުރެވޭނެ ކަމެއް ނޫން ކަމަށް ބުނެ ރިސޯޓު ވިޔަފާރިތަކުން ކަންބޮޑުވުން ފާޅުކޮށްފައި ވަނިކޮށް، އެ ބަދަލު އިއްޔެ މަޖިލީހުން ވަނީ ގެނެސްފަ އެވެ. އަންނަ އޮކްޓޯބަރުން ފެށިގެން އެ އަދަދަށް ޑޮލަރު މާރުކުރަން ޖެހޭނެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މަޓޭ ވިދާޅުވި ގޮތުގައި ސަރުކާރުން ގެނައި ބަދަލުތަކުގެ ސަބަބުން ޓޫރިޒަމް އިންޑަސްޓްރީ ފުނޑުފުނޑުވެގެންދާނެ އެވެ. މިފަދަ ފިޔަވަޅެއް ސަރުކާރުން އަޅަން ނިންމާފައިވާއިރު ސަރުކާރަށް ރެކޯޑު މިންވަރަކަށް ޑޮލަރުން އާމްދަނީ ލިބިފައިވާ ކަމަށް މަޓޭ ވިދާޅުވި އެވެ.
"ޓޫރިޒަމް ދާއިރާގައި މަސައްކަތް ކުރާ މުވައްޒަފުން ވަރަށް ބޮޑަށް ކަންބޮޑުވުން އެބަ ފާޅުކުރޭ އެ މީހުންގެ ރިސޯޓުތަކުން އެބަ އަންގަމުންދާ ކަމަށް ކުރިއަށް އޮތް ދުވަސްތަކުގައި ޑޮލަރުން މުސާރަ އާއި ސާވިސް ޗާޖު ނުދެވޭނެ ކަމަށް. އެ މުވައްޒަފުން ކުރީ ކީއްތޯ،" މަޓޭ ވިދާޅުވި އެވެ.
މިހާރު އޮންނަ ތިން މަސް ދުވަހުގެ ބަދަލުގައި ޑޮލަރު މާރުކުރަން ޖެހޭ މުއްދަތު ވެސް 28 ދުވަހަށް ކުރު ކުރަން ވަނީ ފާސްކޮށްފަ އެވެ. މިހާރު ޓޫރިސްޓު ހިދުމަތްދޭ ތަންތަނުން މާރުކުރަން ޖެހެނީ ބޮލަަކަށް 500 ޑޮލަރު ނޫނީ އާމްދަނީގެ 20 ޕަސެންޓެވެ. އޮކްޓޯބަރުން ފެށިގެން މިއަދު ގެނައި ބަދަލުތަކަށް އަމަލުކުރާނެ އެވެ.
ރިސޯޓުތަކަށް ލިބޭ އާމްދަނީގެ 40 ޕަސަންޓު މާރުކުރުމަކީ ކުރެވޭނެ ކަމެއް ނޫން ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ވަނީ ބުނެފަ އެވެ. ރާއްޖޭގައި ހިންގާ 200 ރިސޯޓުގެ ތެރެއިން 146 ރިސޯޓު ތަމްސީލުކުރަނީ އެ ޖަމިއްޔާއިންނެވެ.
