މެންޗެސްޓާ (އޮގަސްޓް 19) - ތުުރުކީ ސުޕަ ލީގުގެ ގަދަބާރު، ގަލަތަސަރާއި އިން މެންޗެސްޓާ ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އަށް ބޮޑު އޮފާއެއް ކުރުމާ އެކު، އެ ޓީމުން އޭނާ އަށް އާ ކޮންޓްރެކްޓެއް ހުށަހަޅަން ތައްޔާރުވެއްޖެ އެވެ.
ޕްރިމިއާ ލީގުގެ މޮޅު ކުޅުންްތެރިޔާގެ މަގާމު މިދިޔަ ސީޒަނުގައި ހޯދި އުމުރުން 31 އަހަރުގެ ފެނާންޑޭސް، މި ވަގުތު ޔުނައިޓެޑްގެ ކޮންޓްރެކްޓްގައި ހުރީ އަންނަ އަަހަރުގެ ޖޫން މަހުގެ ނިޔަލަށެވެ. ދާދި ފަހުން، ގަލަތަސަރާއި އިން ވަނީ އަހަރަކު 22 މިލިއަން ޑޮލަރު ލިބޭ ކޮންޓްރެކްޓެއް ފެނާންޑޭސް އަށް ހުށަހަޅައިފަ އެވެ.
ޔުނައިޓެޑުން ފެނާންޑޭސްއާ އެކު ހަދާފައި އޮތް އެއްބަސްވުމުގައި، މިދިޔަ މަހުގެ 31 ވަނަ ދުވަހުގެ ކުރިން، އިނގިރޭސި ނޫން ގައުމެއްގެ ކްލަބަކަށް 70 މިލިއަން ޑޮލަރު ދީފައި ޑީލެއް ކުރިއަށްގެންދެވޭނެ މާއްދާއެއް އޮވެ އެވެ. އެކަމަކު، މިހާރު އެ މުއްދަތު ގޮސްފައިވާއިރު، ފެނާންޑޭސް މެދުވެރިކޮށް ކްލަަބަކުން ބޭނުންނަމަ އެ އަށް ވުރެން ދަށް ފީ އަކަށް ޑީލެއް ކުރިއަށްގެންދިއުމުގެ ފުރުސަތު އެބައޮތެވެ.
ދި އެތުލެޓިކުން ރިޕޯޓްކުރާ ގޮތުގައި ޔުނައިޓެޑުން ވަނީ މިހާރު ފެނާންޑޭސްއާ އެކު އާ އެއްބަސްވުމެއް ހެދުމަށް މަޝްވަރާތައް ފަށައިފަ އެވެ.
ސްޕޯޓިން ލިޒްބަންގެ ކުރީގެ ކެޕްޓަން، ފެނާންޑޭސް، ޔުނައިޓެޑާ ގުޅުނީ، 2020 ވަނަ އަހަރުގެ ޖެނުއަރީ މަހުގަ އެވެ. އެއީ 80 މިލިއަން ޑޮލަރުގެ ޑީލެއްގަ އެވެ. އޭނާ ވަނީ، ފުރަތަމަ ފަހަރަށް 2022 ވަނަ އަހަރު ޔުނައިޓެޑާ އެކު އާ އެއްބަސްވުމެއްގައި ސޮއިކޮށްފަ އެވެ. އެ ކޮންޓްރެކްޓް އޮތީ، މި އަހަރުގެ ޖޫން މަހުގެ ނިޔަލަށެވެ. ފެނާންޑޭސް، ޔުނައިޓެޑް ދޫކޮށްލަން އުޅޭ ކަމުގެ ވާހަަކަތަކެއް ދެކެވެން ފެށުމާ އެކު، އެ ކްލަބުން ވަނީ ފެނާންޑޭސްގެ ކޮންޓްރެކްޓް، އަންނަ އަހަރުގެ ޖޫންގެ ނިޔަލަށް އާ ކޮށްފަ އެވެ. ރިޕޯޓްތައް ބުނާގޮތުން މި ފަހަރު ޔުނައިޓެޑުން ފެނާންޑޭސަށް ދެނީ ދެ އަހަރުގެ ޑީލެކެވެ.
އިނގިރޭސި ނޫސްވެރިންގެ ޖަމިއްޔާ، ފުޓްބޯލް ރައިޓާސް އެސޯސިއޭޝަނުން މިދިޔަ ސީޒަނުގައި ހޮވި މޮޅު ކުޅުންތެރިޔާގެ މަގާމު ވެސް ލިބުނީ ފެނާންޑޭސް އަށެވެ. ޔުނައިޓެޑަށް މިހާތަނަށް ކުޅެދިން 327 މެޗުން ފެނާންޑޭސް ވަނީ 107 ގޯލު ޖަހައި، 105 ގޯލު ޖަަހަން ފުރުސަތު ތަނަވަަސްކޮށްދީފަ އެވެ. މިދިޔަ ސީޒަނުގައި ފެނާންޑޭސް ވަނީ އިނގިރޭސި ޕްރިމިއާ ލީގުގެ އެސިސްޓް ރެކޯޑް މުގުރާލައިފަ އެވެ. އެއީ، 35 މެޗުން 21 ލަނޑު ޖަހަން ފުރުސަތު ތަނަަވަސްކޮށްދީގެންނެވެ.
