މެންޗެސްޓާ (އޮގަސްޓް 16) - އަންނަ ހަފްތާގައި އިނގިރޭސި ޕްރިމިއާ ލީގުގެ އާ ސީޒަނާ ކުރިމަތިލާއިރު، މެންޗެސްޓާ ޔުނައިޓެޑްގެ ކަންކަން ހުރީ ހާސްވާން ޖެހޭ ހާލަތެއްގައި ނޫން ކަމަށާއި ޓީމުގެ ކަންކަން ޕޮޒިޓިވް ކަމަަށް ޔުނައިޓެޑްގެ ކޯޗު، މައިކަލް ކެރިކް ބުނެފި އެވެ.
ދެ ފަހަރެއްގެ މަތިން ޔުނައިޓެޑުން ލީޑު ނެގި ނަމަވެސް، އެ ޓީމުގެ ކުރީގެ ކޯޗު ރުބެން އަމޮރިމް މިހާރު ހަވާލުވެ ހުރި އޭސީ މިލާން އަތުން ވަނީ ޕްރީ ސީޒަން މެޗެއްގައި 4-2 އިން ބަލިވެފަ އެވެ. އެ މެޗުގައި ޔުނައިޓެޑްގެ ފަރާތުން ފެނިގެންދިޔަ ކުޅުމަށް ގިނަ ބަޔެއްގެ ފާޑުކިޔުން އަމާޒުވިއިރު، ކެރިކް ބުނީ ފެނުނީ އޭނާ ވެސް އެދޭ ލެވަލްގެ ކުޅުމެއް ނޫން ކަމަށެވެ.
އެކަމަކު، ޔުނައިޓެޑުން މި ފަހަރުގެ ޕްރީ ސީޒަނުގައި މިހާތަނަށް ކުރި ހުރިހާ މަސައްކަތާ މެދު ޖުމްލަކޮށް އެއްޗެއް ބުނާކަމަށްވާނަމަ، ހަމައެކަނި މި މެޗުގެ ނަތީޖާ އާއި ކުޅުމަށް ބަލައިގެން ގޮތެއް ނިންމުން އިންސާފުވެރި ނުވާނެ ކަމަށް ކެރިކް ގަބޫލުކުރެ އެވެ.
މިދިޔަ ސީޒަނުގައި ވަގުތީ ކޯޗަކަށް ޓީމާ ހަވާލުވެ، ދާއިމީ ކޮންޓްރެކްޓެއްގައި މި ވަގުތު ހުރި ކެރިކް ބުނީ، މިލާނާ ކުޅުނު މެޗުގައި އެ ނަތީޖާ ނުކުތުމާއި ކުޅުން އެ ފެނުނު ލެވަލްގައި ހުރުމުގެ ސަބަބުތަކެއް ވާ ކަމަށެވެ.
"ބައެއް ކުޅުންތެރިން އެ ކުޅެނީ ޕްރީ ސީޒަނުގެ ފުރަތަމަ މިނިޓްތައް. މިއީ ތަފާތު ސަބަބުތައް، މި ދައްކަނީ އުޒުރެއް ނޫން. އަހަރެމެން ކުޅުނީ ރަނގަޅަށޭ ނުބުނަން،" ޔުނައިޓެޑާ އެކު، ދެ އަހަރުގެ ކޮންޓްރެކްޓެއްގައި ސޮއިކުރި ކެރިކް ބުންޏެވެ.
"ޖުމްލަކޮށް ބަލަންޏާ އަހަރެމެން އަންނަ ހަފްތާ އަށް (ޕްރިމިއާ ލީގުގެ އާ ސީޒަނަށް) ތައްޔާރު. ހާސްވެގެން އުޅެން ޖެހޭ ވަރުގެ ކަމެއް އޮތް ކަމަށް ނުފެނޭ. އަހަރެމެން ޓްރެއިނިންގައި ވަރަށް ގިނަ މަސައްކަތްތަކެއް ކޮށްފިން. ބައެއް މެޗުތަކުގައި ވަރަށް ރަނގަޅަށް ކުޅެފައި ވެސް އެބަހުރި. އަހަރެމެންގެ ކަންކަން ޕޮޒިޓިވް، ރަނގަޅު ރޫހެއް އޮތީ،"
ޕްރިމިއާ ލީގުގެ އާ ސީޒަނުގައި ޔުނައިޓެޑުން ފުރަތަމަ މެޗުގައި ބައްދަލުކުރާނީ ހަލް ސިޓީއާ އެވެ.
ޔުނައިޓެޑުން މި ފަަހަަރުގެ ޕްރީ ސީޒަނުގައި ކުޅުނު ފުރަތަމަ މެޗުން ވްރެކްސަމް އަތުން 1-0 އިން ބަލިވިއިރު، ދެ ވަނަ މެޗުން ރޮސެންބާގް އަތުން 5-0 އިން ކުރިހޯދި އެވެ. ތިން ވަނަ މެޗުގައި އެތުލެޓިކޯ މެޑްރިޑް 2-1 އިން ބަލިކުރި ޔުނައިޓެޑުން ހަތަރު ވަނަ މެޗުގައި ޕީއެސްޖީއާ 1-1 އިން ވީ އެއްވަރެވެ. އޭގެ ފަހުން، ލީޑްސް ޔުނައިޓެޑާ 1-1 އިން އެއްވަރުވެ، ޕެނަލްޓީ ޔުނައިޓެޑް މޮޅުވިއިރު، ރޭ ކުޅުނު މެޗުން މިލާން އަތުަން ބަަލިވީ އެވެ.
ޔުނައިޓެޑާ އެކު، ކެރިކް ހަދާފަައިވާ އެއްބަސްވުން ހަމަވާއިރު، ފުރަތަމަ ދެ އަހަރު ތެރޭ ހާސިލްކުރާ ކަންކަމަށް ބަަލައި، އިތުރު އެއް އަހަރު އޭނާ އެ ޓީމުގައި މަޑުކުރެވޭ ގޮތަށް މާއްދާއެއް މިހާރު އޮތް ކޮންޓްރެކްޓްގައި ވަނީ ހިމަނައިފަ އެވެ.
