މެންޗެސްޓާ (އޮގަސްޓް 14) - މެންޗެސްޓާ ޔުނައިޓެޑަށް ތައުރީފުކުރަން ބެލްޖިއަމްގެ މިޑްފީލްޑަރު، ޔޫރީ ޓީލަމަންސް އަށް ދެކެވުނު ވާހަކަ އަކަށް އެސްޓަން ވިލާ ސަޕޯޓަރުން ކައިރިން މާފަށް އެދެފި އެވެ.
އުމުރުން 29 އަހަރުގެ ޓީލަމަންސް، އެސްޓަން ވިލާ ދޫކޮށް މި ފަހަރުގެ ޓްރާންސްފާ މާކެޓްގައި ޔުނައިޓެޑަށް ސޮއިކުރީ ފަސް އަހަރުގެ ކޮންޓްރެކްޓެއްގަ އެވެ. ލެސްޓާ ސިޓީ، 2023 ވަނަ އަހަރު ރެލިގޭޓްވުމުން، ހިލޭ ޓްރާންސްފާއެއްގައި ވިލާ އަށް ބަދަލުވި ޓީލަމަންސް ވަނީ އެ ޓީމަށް 134 މެޗުން 10 ގޯލު ޖަހައިދީފަ އެވެ. ޓީލަމަންސް އަކީ މިދިޔަ ސީޒަނުގައި ޔޫރޮޕާ ލީގުގެ ޗެމްޕިއަންކަން ހޯދި ވިލާ ޓީމުގެ މުހިންމު ކުޅުންތެރިއެކެވެ.
ޔުނައިޓެޑުން ޓީލަމަންސްގެ ސޮއި ހޯދީ އޭނާ ވިލާއާ އެކު ހަދާފައިވާ ކޮންޓްރެކްޓް ގަންނަން ދައްކަން ޖެހޭ 40 މިލިއަަން ޑޮލަރު ދީފަ އެވެ.
ފްރާންސްގެ މޮނާކޯ އިން އިނގިރޭސި ޕްރިމިއާ ލީގަށް 2019 ވަނަ އަަހަރު ބަދަލުވި ޓީލަމަންސް، ޔުނައިޓެޑްގެ ޕްރީ ސީޒަން ޓުއާގެ ތެރެއިން ދިން އިންޓަވިއުއެއްގައި ބުނެފައިވަނީ ކެރިއަރުގެ އެންމެ ރަނގަޅު ލެވަލަށް ގެނައުމަށްޓަކައި އެސްޓަން ވިލާ އިން އެހީވި ކަމަށެެވެ. އެކަމަކު، ވިލާ އަށް ވުރެން ލެވަަލް މަތި ކްލަބްތަކެއް އެބައޮތް ކަމަށާއި މެންޗެސްޓާ ޔުނައިޓެޑަކީ އޭގެއިން އެއް ޓީމު ކަމަށް ޓީލަމަންސް ވަނީ ބުނެފަ އެވެ.
އެއާ އެކު، އެސްޓަން ވިލާގެ ގިނަ ސަޕޯޓަރުންނެއް ޓީލަމަންސްއާ މެދު ނުރުހުންފާޅުކުރި އެވެ. ގިނަ ސަޕޯޓަރުންގެ ޝުއޫރުތައް ހުރީ، ޓީލަމަންސް ބޭނުންކުރި އިބާރާތްތަކަކީ، ވިލާ އަށް އިހުތިރާމް ކުޑަ ކަމެއްގެ ގޮތުގަ އެވެ.
ސަޕޯޓަރުންގެ ފާޑުކިޔުންތަކާ އެކު، އެ އަށް އަމާޒުކޮށް، ޓީލަމަންސް ވަނީ އިންސްޓަގްރާމްގައި ޕޯސްޓެއް ކޮށްފަ އެވެ. އެ ގޮތުން، ޓީލަމަންސް ބުނެފައިވަނީ، މީޑިއާގައި ވާހަކަ ދެއްކިއިރު، އެއީ، އެއްވެސް ސިފައެއްގައި ވިލާއާ ގުޅުން ހުރި އެއްވެސް މީހަކު ރުޅި އަރުވަން ބުނި އެއްޗެއް ނޫން ކަމަށެވެ.
"އެސްޓަން ވިލާ އަށް އަހަރެން ވަރަށް އިހުތިރާމް ކުރަން. މިދިޔަ ތިން އަހަރަށް ޓަކައި އަހަރެން ވަރަށް ޝުކުރުވެރިވަން. އަހަންނަށް ގޯހެއް ހެދިއްޖެކަން ގަބޫލުކުރަން. ބޭނުންކުރެވުނީ އެންމެ ރަނގަޅު ބަސްތަކެއް ނޫން. އެ ކަަމަށް ކުރިމަގުގައި ވަރަށް ސަމާލުވާނަން. އެސްޓަން ވިލާ އަށް އަބަދުވެސް ކާމިޔާބަށް އެދެން،" ޓީލަމަންސް، އިންސްޓަގްރާމްގައި ލިޔެފައިވެ އެވެ.
އެމެރިކާ، މެކްސިކޯ އަދި ކެނަޑާގައި ބޭއްވި ވޯލްޑް ކަޕްގެ ކުއާޓާ ފައިނަލަށް ބެލްޖިއަމް ގެންގޮސްދޭން މުހިންމު ރޯލެއް ކުޅުނު ޓީލަމަންސް، ޔުނައިޓެޑާ އެކު ހެދި ކޮންޓްރެކްޓް ހަމަވާނީ، 2031 ވަނަ އަހަރުގެ ޖޫންގެ ނިޔަލަށެެވެ.
މިދިޔަ ސީޒަނުގައި، ފައިގެ ކުޑަހުޅާއި ކުޑަކަޅުވާ އަށް ލިބުނު އަނިޔާއާ ހެދި، ހުރިހާ މުބާރާތަކަށް ބަލާއިރު، ވިލާ އިން ކުޅުނު 35 މެޗެއްގައި ޓީލަމަންސް އަށް ނުކުޅެވުނެވެ. އެއީ، ފުޓްބޯޅަ ކެރިއަރު ފެށި ފަހުން، ޓީލަމަންސް އަށް އެއް ސީޒަނެއްގައި އެންމެ ގިނަ މެޗު ގެއްލުނު ފަަހަރެވެ.
ބެލްޖިއަމްގެ އެންޑަލެކްޓް އިން 2013 ވަނަ އަހަރު, ސީނިއާ ކްލަބް ކެރިއަރު ފެށި ޓީލަމަންސް، މި ފަހަރުގެ ޕްރީ ސީޒަނުގައި ޔުނައިޓެޑަށް އަންނަނީ ރަނގަޅު ކުޅުމެއް ދައްކަމުންނެވެ.
