ޖަޕާނުގައި މިހާރު ކުރިއަށްދާ 20 ވަނަ އޭޝިއަން ގޭމްސްގެ ސްވިމިން އިވެންޓުގައި، ރާއްޖޭގެ ގައުމީ ސްވިމިން ޓީމުގެ މެރާލް އައިން ލަތީފް ގައުމީ ރެކޯޑެއް އާ ކޮށްފި އެވެ.
އެ ގޮތުން، މެރާލް އާ ކޮށްފައިވަނީ، ރާއްޖޭގެ އަންހެނުންގެ ލޯންގް ކޯސް 100 މީޓަރު ބްރެސްޓް ސްޓްރޯކް އިވެންޓުގެ ގައުމީ ރެކޯޑް އެވެ.
މެރާލް، މި ރެކޯޑް އާކޮށްފައިވަނީ، އޭޝިއަން ގޭމްސްގެ އަންހެނުންގެ ލޯންގް ކޯސް 100 މީޓަރު ބްރެސްޓް ސްޓްރޯކް އިވެންޓު، 01:22.06 އިން ފުރިހަމަ ކޮށްގެންނެވެ.
މި އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީ 2025 ވަނަ އަހަރު ހަންގޭރީގައި ބޭއްވުނު އެ ގައުމުގެ 127 ވަނަ ނޭޝަނަލް ޗެމްޕިއަންޝިޕްސްގައި ހަމްނާ އަހުމަދު އެވެ. ސްކޮލަޝިޕެއްގައި ހަންގޭރީގައި ތަމްރީނު ވަމުން އަންނަ ހަމްނާ މި އިވެންޓްގެ ގައުމީ ރެކޯޑް އާ ކުރީ، 01:23.38 އިން ރޭސް ފުރިހަމަ ކޮށްގެންނެވެ.
މީގެ ކުރިން، މި ފަހަރުގެ އޭޝިއަން ގޭމްސްގައި ރާއްޖޭގެ ގައުމީ ސްވިމިން ޓީމުގެ މުހައްމަދު ރިހާން ޝިހާމް، ފިރިހެނުންގެ ލޯންގް ކޯސް 400 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރެކޯޑް ވަނީ އާ ކޮށްފަ އެވެ.
ގައުމީ ގިނަ ރެކޯޑްތަކެއް މީގެ ކުރިން ވެސް އާ ކޮށްފައިވާ ރިހާން އަކީ ވެސް ސްކޮލަޝިޕެއްގައި ތަމްރީން ވަމުން އަންނަ އެތުލީޓެކެެވެ. އޭނާ މި ފަހަރުގެ އޭޝިއަން ގޭމްސްގެ ފިރިހެނުންގެ ލޯންގް ކޯސް 400 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރެކޯޑް އާކޮށްފައިވަނީ އޭޝިއަން ގޭމްސްގެ މި އިވެންޓް، 05.06.92 އިން ފުރިހަމަކޮށްގެންނެވެ.
މި ރެކޯޑް އެންމެފަހުން ވެސް އާކޮށްފައިވަނީ ރިހާން އެވެ. އެއީ، ސްކޮޓްލަންޑްގެ ގްލާސްގޯގައި ދާދި ފަހުން ކުރިއަށްދިޔަ 23 ވަނަ ކޮމަންވެލްތް ގޭމްސްގައި 05.09.68 އިން އިވެންޓު ފުރިހަމަ ކޮށްގެންނެވެ.
އޭޝިއަން ގޭމްސްގައި ވާދަކުރާ ސްވިމިން ޓީމުގައި، މެރާލް އާއި ރިހާންގެ އިތުރުން ދެން ހިމެނެނީ، ލޫތު މުހައްމަދު ހުސެއިން އަދި މަލައިކާ ލިންޑާ އިމްރާން އެވެ.
އޭޝިއަން ގޭމްސްގައި، ރާއްޖޭން ހަތް ކުޅިވަރަކުން ވާދަކުރާއިރު، ގޭމްސްގައި ހަރަކާތްތެރިވާ ރާއްޖޭގެ ކޮންޓިންޖެންޓްގެ ޖުމްލަ އަދަދަކީ، 81 އެވެ. އޭޝިއަން ގޭމްސްގައި ރާއްޖޭގެ ޝޫޓިން ގައުމީ ޓީމުން ވެސް ވަނީ ގައުމީ ރެކޯޑްތަކެއް އާ ކޮށްފަ އެވެ.
