ޖަޕާންގެ އައިޗީ/ނަގޯޔާގައި މިއަދު ފެށި ބެޑްމިންޓަން އިވެންޓްގެ އަންހެން ސިންގަލްސްގައި ކުޅުނު ފުރަތަމަ މެޗުން މޮޅުވެ، އައިމިނަތު ނަބީހާ އަބްދުއް ރައްޒާގު (ނަބީ)، ދެ ވަނަ ބުރުން ޖާގަ ހޯދައިފި އެވެ.
ޖަޕާނުގެ އިޗިނޯމިޔާ ސިޓީ މުނިސިޕަލް ޖިމްނޭސިއަމްގެ ތިން ވަނަ ކޯޓުގައި މިއަދު ކުޅުނު މެޗުގައި ނަބީ ވާދަކުރީ މޮންގޯލިއާގެ ސެލްމެގް-އޯޑް އެންހްލެންއާ އެވެ. މުބާރާތުގެ އަންހެން ސިންގަލްސްގެ ފުރަތަމަ ބުރުގައި، ނަބީ ވަނީ މި މެޗުން ފަސޭހަ ކަމާ އެކު، 21-08، 21-3 އިން މޮޅުވެފަ އެވެ.
ގަދަ 32 ކުޅުންތެރިން ވާދަކުރާ ބުރުގައި ނަބީ ކުޅެން ޖެހޭނީ، ހޮންގް ކޮންގްގެ ލޯ ސިން ޔެން ހެޕީއާ ދެކޮޅަށެވެ.
އަންހެން ސިންގަލްސްގައި ރާއްޖޭގެ ފާތިމަތު ނަބާހާ އަބްދުއްރައްޒާގު (ނަބާ) ފަށާނީ ދެ ވަނަ ބުރުންނެވެ. ފުރަތަމަ ބުރުން ކުރިއަށް ދިއުމުގެ ޑްރޯއެއް ލިބިފައިވާ ނަބާ، ދެ ވަނަ ބުރުގައި ވާދަކުރަން ޖެހެނީ، ސިންގަޕޫރުގެ ޔިއޯ ޖިއާ މިންއާ އެވެ.
ނަބާ އާއި ނަބީގެ އިތުރުން، އޭޝިއަން ގޭމްސްގައި ވާދަކުރާ ރާއްޖޭގެ ގައުމީ ބެޑްމިންޓަން ޓީމުގައި ހިމެނެނީ، ޒަޔާން ޒަކީ އާއި ނިބާލް އަހުމަދު އެވެ. ފިިރިހެން ސިންގަލްސްގައި ނިބާލް ވެސް ދެ ވަނަ ބުރުން ފަށަން ޖެހޭއިރު، ވާދަކުރަނީ ސްރީ ލަންކާގެ ނެޓަސިންހޭ ޕުލިކުއްޓީއާ އެވެ. އަދި، ޒަޔާން ވަނީ ފުރަތަމަ ބުރުގެ މެޗުން މޮންގޯލިއާގެ މުންކްބަޓް ބަޓްޑަވާ އަތުން ބަލިވެފަ އެވެ. މެޗުގެ ސެޓުތައް ދިޔައީ، 21-12، 21-17 އިންނެވެ.
ފިރިހެން ޑަބަލްސްގައި މިއަދު ޒަޔާން އާއި ނިބާލްގެ ޕެއާ އިން ކުޅޭނީ ދެކުނު ކޮރެއާގެ ކަންގް މިން އާއި ކީ ޑޮންގްގެ ޕެއާއާ ދެކޮޅަށެވެ. އަންހެން ޑަބަލްސްގައި މިއަދު، ރާއްޖޭގެ ނަބާ އާއި ނަބީގެ ޕެއާ، ތައިލެންޑުގެ އައިމްސާދު ނުންތަކާން އާއި ސުދްޖައިޕްރަޕަރަތު ޖެނިކާގެ ޕެއާއާ ދެކޮޅަށް ނުކުންނާނެ އެވެ.
މިކްސް ޑަބަލްސްގައި ނިބާލް އާއި ނަބީގެ ޕެއާ ވަނީ ފުރަތަމަ ބުރުގެ މެޗުން އިންޑިއާގެ ކަޕީލާ ދްރޫވް އާއި ތަނީޝާ ކްރާސްޓޯ އަތުން 21-08، 21-07 އިން ބަލިވެފަ އެވެ. އަދި، ފުރަތަމަ ބުރުގައި، ނަބާ އާއި ޒަޔާންގެ ޕެއާ ކުޅުނު މެޗުން އިންޑޮނޭޝިއާގެ ނިކޯލަސް ޖަކީން އާއި ސިތީ ފަދިއާ ސިލްވާ ރަމަދަންތީ މޮޅުވީ، 21-08، 21-14 އިންނެވެ.
