އައިޗީ-ނަގޯޔާ، ޖަޕާން (އޮކްޓޫބަރު 4) - ޖަޕާންގެ އައިޗީ އާއި ނަގޯޔާގައި ކުރިއަށްދިޔަ އޭޝިއަން ގޭމްސްގެ މެޑަލް ތާވަލުގެ އެންމެ ކުރީގައި އޮވެ، ޗައިނާ އިން ކާމިޔާބު އަހަރެއް ނިންމާލައިފި އެވެ.
މިދިޔަ މަހުގެ 19 އިން މި މަހުގެ ހަތަރު ވަނަ ދުވަހުގެ (މިއަދުގެ) ނިޔަލަށް ކުރިއަށްދިޔަ އޭޝިއަން ގޭމްސްގައި ޗައިނާ އިން ޖުމްލަ އެކު، 341 މެޑަލް ހޯދި އެވެ. އެއީ، 169 ރަން މެޑަލާއި 89 ރިހި މެޑަލާއި 83 ލޯ މެޑަލް އެވެ. ޗައިނާ އަކީ އޭޝިއާ އިން ބާއްވާ އެންމެ ބޮޑު ކުޅިވަރު ހަރަކާތް، އޭޝިއަން ގޭމްސްގައި ތަފާތު ދައްކާ ގައުމެކެވެ. އަދި، އެކި ކުޅިވަރުގެ ވަސީލަތްތައް ޒަމާނީ މޮޑެލް އިން ކުރިއަށްގެންދިއުމަށްޓަކައި، ކުޅިވަރުގެ އިންފްރާސްޓްރަކްޗާ ވަރުގަދަކޮށް އޭޝިއަން ގޭމްސް ވެސް ގިނަ ފަަހަރުތަކެއް މަތިން ހޯސްޓްކޮށްފައިވާ ގައުމެކެވެ.
މެޑަލް ތާވަލުގެ ދެ ވަނައިގައި އޮތީ މި ފަހަރުގެ ގޭމްސް ބޮޑު ތަކުލީފުތަކަކާ އެކު ވެސް ހޯސްޓްކުރި ޖަޕާން އެވެ. އެ ގޮތުން، ޖަޕާނުން ޖުމްލަ އެކު، 269 މެޑަލް ހޯދިއިރު، އޭގެ ތެރެއިން ރަން މެޑަލްގެ އަދަދަކީ 83 އެވެ. އަދި، ރިހި މެޑަލަށް ބަލާއިރު، 95 މެޑަލް ހިމެނޭއިރު، ލޯ މެޑަލްގެ 91 މެޑަލް ހޯދި އެވެ. ތިން ވަނައިގައި އޮތް ދެކުނު ކޮރެއާ އިން ޖުމްލަ އެކު، 150 މެޑަލް ހޯދިއިރު، ރަން މެޑަލްގެ ނިސްބަތް މަދެވެ. އެ ގައުމަށް 39 ރަން މެޑަލް ލިބުނުއިރު، ރިހި މެޑަލް ލިބުނީ 43 އެވެ. އަދި، ލޯ މެޑަލްގެ 68 މެޑަލް ވަނީ ލިބިފަ އެވެ.
ސަތޭކަ އަށް ވުރެން ގިނަ މެޑަލް ހޯދީ ގަދަ ތިނެއްގައި އޮތް، ޗައިނާ، ޖަޕާން އަދި ދެކުނު ކޮރެއާ އެވެ.
މެޑަލްގެ އަދަދަށް ބަލާއިރު، ހަތަރެއްގައި އޮތް އިންޑިއާ އާއި ފަހެއްގައި އޮތް އުޒްބެކިސްތާނަށް ރަން މެޑަލްގެ ލިބުނީ 21 މެޑަލް އެވެ. އެކަމަކު، އިންޑިއާ އިން ޖުމްލަ މެޑަލްގެ އަދަދު އުޒްބެކިސްތާނަށް ވުރެން އިތުރެވެ. އިންޑިއާ އިން 85 މެޑަލް ހޯދީ 21 ރަން މެޑަލްގެ އިތުރުން، 27 ރިހި މެޑަލް އާއި 37 ލޯ މެޑަލް ހޯދައިގެންނެވެ. އުޒްބެކިސްތާނަށް 21 ރަން މެޑަލްގެ އިތުރުން ދެން ލިބުނީ 25 ރިހި މެޑަލް އާއި 24 ލޯ މެޑަލް އެވެ.
މި ފަހަރުގެ އޭޝިއަން ގޭމްސްގައި ޖުމްލަ 40 ގައުމަކުން މެޑަލް ހޯދި އެވެ. އެންމެ މަދުން މެޑަލް ހޯދި ގައުމުތަކަކީ، ބަންގްލަދޭޝް، ބްރުނާއި ދާރުއްސަލާމް، ލާއޯސް އަދި ސީރިއާ އެެވެ. މީގެއިން ކޮންމެ ގައުމަކަށް ވެސް ލިބިފައިވަނީ އެއް ލޯ މެޑަލް އެވެ.
