ރާއްޖެއަށް މިހާރު ދިމާވެފައިވާ ޑޮލަރުގެ ތާށިކަމަކީ ސަރުކާރުގެ ދޯހަޅި ސިޔާސަތުތަކާއި ސިޔާސީ ނިންމުންތަކުގެ ނަތީޖާ ކަމަށާއި އޭގެ އަގު ރިސޯޓު މުވައްޒަފުން ދައްކަން ޖެހޭ އެއްވެސް ހަމައެއް އޮތް ކަމަށް ގަބޫލުނުކުރާ ކަމަށް ރިސޯޓު މުވައްޒަފުންގެ ހައްގުތަކަށް ވަކާލާތުކުރާ ޓޫރިޒަމް އެމްޕްލޯއީސް އެސޯސިއޭޝަން (ޓީމް) އިން ބުނެފި އެވެ.
ޑޮލަރުން އާމްދަނީ ލިބޭ މީހުން ކަޅު ބާޒާރުގައި ޑޮލަރު މާރުކޮށް އާމްދަނީ ހޯދާ ކަމަށް ތުހުމަތުކޮށް 2030 ވަނަ އަހަރު އަންނަވާއިރަށް ޑޮލަރުން މުސާރަދިނުން މަނާކުރަން މަރުަކަޒީ ބޭންކުން ވަނީ އަމާޒު ހިފާފަ އެވެ. އޭގެ އިތުރުން، ރިސޯޓުތަކަށް ޑޮލަރުން ލިބޭ އާމްދަނީގެ 40 ޕަސެންޓު މާރުކުރަން ޖެހޭ ގޮތަށް ވެސް ގާނޫނު ބަދަލުކުރަން ވަނީ ނިންމާފަ އެވެ.
ޓީމްއިން ނެރުނު ބަޔާނެއްގައި ބުނެފައިވާ ގޮތުގައި އެ ބަދަލު ގެނެސްފިނަމަ މިހާރު ޑޮލަރުން ދޭ މުސާރަ އާއި ސާވިސް ޗާޖު ރުފިޔާއިން ދޭން މަޖުބޫރުވާނެ ކަމަށް ރިސޯޓުތަކުން ބުނަމުންދާ ކަމަށެވެ. އެފަދަ ހާލަތެއްގައި ވެސް މިފަދަ އަމާޒަކަށް ސަރުކާރުން މަސައްކަތްކުރުމަކީ ކަންބޮޑުވުމެއް ކަމަށް ޓީމްއިން ބުނެފައިވެ އެވެ.
"މި ބަދަލުގެ ސަބަބުން މުވައްޒަފުންނަށް ލިބޭ އާމްދަނީގެ އަދަދު އިންތިހާއަށް ދަށްވެ، މާލީ ގޮތުން ނުއުފުލޭ ވަރުގެ ބޮޑު ބުރަޔަކާ ކުރިމަތިލާން ޖެހޭނެ. ރާއްޖެއަށް ދިމާވެފައިވާ ބޭރު ފައިސާގެ ދަތިކަމުގެ ބުރަޔާއި ޒިންމާ، ފަތުރުވެރިކަމުގެ ދާއިރާގެ މުވައްޒަފުންގެ ބޮލުގައި އެޅުވުމަށް ކުރާ އެއްވެސް މަސައްކަތެއް ބަލައިނުގަންނާނެ ކަމަށް ދަންނަވަން،" ޓީމްގެ ބަޔާނުގައި ބުނެފައިވެ އެވެ.
ރިސޯޓު މުވައްޒަފުންގެ އެއްވެސް އިހުމާލެއް ނެތި ކުަރިމަތިވި ހާލަތެއްގެ އަގު މުވައްޒަފުން ދައްކަން ޖެހޭ ހަމައެއް އޮތްކަމަށް ނުދެކޭ ކަމަށް ޓީމްއިން ބުނެފައިވެ އެވެ. ރަސްމީ ރޭޓުގައި ޑޮލަރު ލިބޭނެ ކަމުގެ ޔަގީންކަން ނެތި މުސާރަ ޑޮލަރަށް ބަދަލުކުރަން ތާއިދުނުކުރާކަން ޓީމްއިން ވަނީ ހާމަކޮށްފަ އެވެ.
"ރަސްމީ ރޭޓު ކަމަށްވާ 15.42 ރުފިޔާގެ މަގުން، މުވައްޒަފުންނަށް ބޭނުންވާ މިންވަރަށް ޑޮލަރު ލިބޭނެކަމުގެ ފުރިހަމަ ޔަގީންކަން ސަރުކާރަށް ދެވޭނަމަ، ދިވެހި ރުފިޔާއިން މުސާރަ ލިބުމުގެ ކަންބޮޑުވުމެއް އޮންނާނެ ކަމަށް ނުދެކޭކަމާ، ނަމަވެސް މިފަދަ ޔަގީންކަމެއް ނެތި ޑޮލަރުން ލިބޭ އާމްދަނީ ރުފިޔާއަށް ބަދަލުކުރުމަކީ ރިސޯޓު މުވައްޒަފުންނާއި ސިނާއަތަށް ދެވޭނެ ނުހަނު ބޮޑު ގެއްލުމެއް،" ޓީމްގެ ބަޔާނުގައި ބުނެފައިވެ އެވެ.
ރިސޯޓު މުވައްޒަފުންގެ އާމްދަނީއަށް އަސަރުކުރާނެ އެއްވެސް ފިޔަވަޅެއް އަޅަން ޖެހޭނީ އެންމެ ފަހު ފިޔަވަޅެއްގެ ގޮތުގައި ފުޅާ ދާއިރާއެއްގައި މަޝްވަރާކުރުމަށް ފަހު ކަމަށް ޓީމްއިން ވަނީ ބުނެފަ އެވެ. ޑޮލަރުގެ މައްސަލަ ހައްލުކުރުމަށްޓަކައި ސަރުކާރުގެ ހަރަދުތައް ކުޑަކުރަން ވެސް ޖަމިއްޔާއިން ވަނީ ގޮވާލާފަ އެވެ.
