ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނަށް ލިބޭ ޑޮލަރުކޮޅު އަތުލިޔަސް، ސަރުކާރުގެ ހަރަދުތައް ކުޑަ ނުކުރާނަމަ، ޑޮލަރުގެ އަގު ތިރި ނުވާނެ ކަމަށް ގަލޮޅު ދެކުނު ދާއިރާގެ މަޖިލިސް މެންބަރު، މީކާއިލް އަހުމަދު ނަސީމް ވިދާޅުވެއްޖެ އެވެ.
ބޭރު ފައިސާގެ ގާނޫނަށް ސަރުކާރުން ގެންނަ ބަދަލުތަކަށް ބަހުސްކުރައްވަމުން މީކާއިލް ވިދާޅުވީ، ގާނޫނަށް ގެންނަން ހުށަހަޅާފައި ވަނީ ތަންފީޒު ނުކުރެވޭނެ ވަރުގެ އިސްލާހުތަކެއް ކަމަށެވެ. އަދި، އޭގެ ސަބަބުން ޑޮލަރުގެ އަގު ތިރިނުވާނެ ކަމަށް ވެސް އޭނާ ވިދާޅުވި އެވެ.
"މަޓީގެ އިސްވެރިން ގެނެސް މޭޒެއްގެ އެއްކޮޅަށް ޖަމާކޮށް އެމީހުންނަށް ފުކަކަށް ދިނަސް އަދި، ޑޮލަރުގެ އަގު ތިރިއެއް ނުވޭ އިއްޒަތްތެރި ރައީސް، ޓޫރިޒަމް އިންޑަސްޓްރީގައި މަސައްކަތްކުރާ ހަޔާތެއް އެމީހުންގެ އާއިލާ އާއި އަނބިދަރިންނާ ދުރުގައި ހޭދަކުރާ ޓޫރިޒަމް އިންޑަސްޓްރީގެ މުވައްޒަފުންނަށް ލިބޭ ޑޮލަރުކޮޅު އަތުލާން އުޅުނަސް އަދި ރައްޔިތުންނަށް، އާންމު ދިވެހިރައްޔިތު މީހާއަށް ޑޮލަރުގެ އަގު ތިރިއެއް ނުވޭ،" މީކާއިލް ވިދާޅުވި އެވެ.
"ދިވެހި ރައްޔިތުންގެ ފައިސާ، ދިވެހި ދައުލަތުގެ ފައިސާ އިސްރާފުކުރުން ނުހުއްޓާހާ ހިނދަކު އިއްޒަތްތެރި ރައީސް މިއަކަށް ހައްލެއް ނެތް."
މީކާއިލް ވިދާޅުވީ ކަޅު ބާޒާރުގައި ޑޮލަރު ވިއްކާ އަގުގެ ވާހަކަދައްކާ މީހުން ކުށްވެރިވާ ގޮތަށް ގާނޫނުގައި ހިމަނާނަމަ، ރަސްމާލެ ހިއްކަން ތާއީދުކުރާ ހުރިހާ އެންމެން ވެސް ކުށްވެރިވާނެ ކަމަށް އެ ގާނޫނުގައި ހިމަނަންޖެހޭ ކަމަށެވެ.
ޑޮލަރުގެ ދަތިކަން އިންތިހާއަށް ކުރިމަތިވެފައިވާއިރު، ދުނިޔޭގެ އެކި ގައުމުތަކަށް މިހާރު ވެސް ސަފީރުން އައްޔަނުކުރަމުންދާ ކަމަށް ވިދާޅުވެ މީކާއިލް ފާޑުވިދާޅުވި އެވެ.
"ދިވެހިރައްޔިތުންގެ ބަސްބުނުމުގެ ހައްގު އިއްޒަތްތެރި ރައީސް، ގާނޫނުއަސާސީން ކަށަވަރުކޮށްދީފައިވާ ބަސްބުނުމުގެ ހައްގަށް އަރައިގަންނަން ކޮންމެ ފަހަރަކު، ކޮންމެ ފަހަރަކު، އަޅުގަނޑު ހަމަ ހިތަށް އަރާ ސަރުކާރަށް އެއްޗެއް ވިސްނެން ނޫޅޭބާއޭ،" މީކާއިލް ވިދާޅުވި އެވެ.
ދިވެހިރާއްޖޭގެ އިގުތިސާދު ފުނޑިގެންދިޔައީމާ އޭގެ ވޭން އަޅާނީ ހަމައެކަނި ޕީއެންސީގެ މެންބަރުންގެ ގައިގައި އެކަނި ނޫން ކަމަށެވެ. އެއީ ރާއްޖޭގެ ހުރިހާ ރައްޔިތުން ތަހަންމަލު ކުރަންޖެހޭނެ ވޭނެއް ކަމަށް އޭނާ ވިދާޅުވި އެވެ.
