ރިސޯޓުތަކަށް ބޭރު ފައިސާއިން ލިބޭ އާމްދަނީގެ 40 ޕަސެންޓު މޯލްޑިވްސް މަނިޓަރީ އޮތިރިޓީ (އެމްއެމްއޭ) އަށް މާރުކުރަން ލާޒިމުކުރަން ނިންމާފައިވާކަން ސަރުކާރުން ހާމަކުރުމާ ގުޅިގެން ހުރި ކަންބޮޑުވުންތަކާއެކު މަޖިލީހަށް ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލައިފި އެވެ.
ކެންދޫ ދާއިރާގެ މެންބަރު، މައުރޫފް ޒާކިރު މަޖިލީހަށް ހުށަހެޅުއްވި ކުއްލި މައްސަލަ މަޖިލީހަށް ބަލައިނުގަތީ ބޭރު ފައިސާއާ ބެހޭ ގާނޫނަށް ގެންނަ އިސްލާހުތަކެއްގެ ބަހުސް މިއަދުގެ ޖަލްސާގައި އޮތް ކަމަށް ބުނެ އެވެ.
އެ މައްސަލައިގައި ބުނީ ރިސޯޓުތަކަށް ބޭރު ފައިސާއިން ލިބޭ އާމްދަނީގެ 40 ޕަސެންޓު މާރުކުރަން މަޖުބޫރު ކުރުމުގެ ސަބަބުން ފަތުރުވެރިކަމުގެ މުޅި ސިނާއަތަށާއި ގައުމުގެ މާލީ ނިޒާމަށް ލޮޅުންއަރައި އިންވެސްޓަރުންގެ އިތުބާރު ގެއްލުމުގެ ފުރުސަތު އެބައޮތް ކަމަށެވެ.
އެއީ ކުރެވޭނެ އަދި ދެމެހެއްޓެނިވި ކަމެއް ނޫންކަމަށް ރާއްޖޭގައި ހިންގާ 200 ރިސޯޓުގެ ތެރެއިން 146 ރިސޯޓު ތަމްސީލުކުރާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ހާމަކޮށްފައިވާކަން ވެސް އެ މައްސަލައިގައި ފާހަގަކޮށްފައިވެ އެވެ.
"ރިސޯޓުތަކުން ތެލާއި މުވައްޒަފުންގެ މުސާރަ އާއި ސާވިސް ޗާޖާއި ޓެކުހުގެ އިތުރުން ބޭރުގެ ބޮޑތި ލޯނުތައް އަދާކުރަންޖެހެނީ ޑޮލަރުން ކަމަށްވާއިރު، އެ ރިސޯޓުތަކުން ޑޮލަރުން ކުރަންޖެހޭ ހަރަދަށް ރިއާޔަތްނުކޮށް އެއްވެސް މަޝްވަރާއެއް ވެސް ނެތި ކުއްލިއަކަށް މިފަދަ ބުރައެއް ސިނާއަތުގެ ބޮލުގައި އެޅުވުމަކީ ބޮޑު ބޭއިންސާފެއްކަމަށް ދެކޭހިނދު،" އެ ކުއްލި މައްސަލައިގައި ބަޔާންކޮށްފައިވެ އެވެ.
މައުރޫފް ހުށަހެޅުއްވި ކުއްލި މައްސަލައިގައި ސަރުކާރަށް ގޮވާލައިފައި ވަނީ ސަރުކާރުގެ އެ ނިންމުންތަކުގެ ސަބަބުން ރާއްޖޭގެ އިގުތިސާދަށް ބޮޑެތި ގެއްލުންތަކެއް ކުރިމަތިނުވަނީސް ކަމާބެހޭ ފަރާތްތަކާ މަޝްވަރާކޮށްގެން އިންސާފުވެރި ހައްލެއް ހޯދުމަށެވެ.
