ކާޑިފް، ވޭލްސް (އޮގަސްޓް 16) - މިދިޔަ ސީޒަނުގެ އެފްއޭ ކަޕްގެ ޗެމްޕިއަން، މެންޗެސްޓާ ސިޓީ 3-0 އިން ބަލިކޮށް، އިނގިރޭސި ޕްރިިމިއާ ލީގުގެ އެންމެ ފަހުގެ ޗެމްޕިއަން، އާސެނަލުން، އިނގިރޭސި ފުޓްބޯޅަ ސީޒަން ފަށަން ކުޅޭ މެޗުން މޮޅުވެ، ޗެރިޓީ ޝީލްޑް ކާމިޔާބުކޮށްފި އެވެ.
މިއީ، އާސެނަލުން ޗެރިޓީ ޝީލްޑް ކާމިޔާބުކުރި 18 ވަނަ ފަހަރެވެ. އެންމެ ގިނައިން ޝީލްޑް އުފުލާލީ، 21 ފަހަރު ކާމިޔާބުކުރި މެންޗެސްޓާ ޔުނައިޓެޑް އެވެ.
އާސެނަލްގެ ކޯޗު މިކޭލް އާޓެޓާ، އެ ކްލަބްގައި ކުޅުންތެރިއެއް އަދި ކޯޗެއްގެ ގޮތުގައި ކުރިމަތިލި ހުރިހާ ޗެރިޓީ ޝީލްޑް މެޗަކުން މި ވަނީ މޮޅުވެފަ އެވެ. އެ ގޮތުން، 2014 އާއި 2015 ވަނަ އަހަރު ކުޅުންތެރިއެއްގެ ގޮތުގައި ޗެރިޓީ ޝީލްޑް އުުފުލާލި އާޓެޓާ ވަނީ 2019 ވަނަ އަހަރު އެ ޓީމުގެ ކޯޗުކަމާ ހަވާލުވެ، 2020 އާއި 2023 ވަނަ އަހަރު މި މެޗުން މޮޅުވެފަ އެވެ. އަނެއްކޮޅުން، 10 އަހަރަށް ފަހު، ސިޓީގެ ކޯޗުކަން ދޫކޮށްލި ޕެޕް ގާޑިއޯލާ އަށް ފަހު، އެ ޓީމާ ހަވާލުވި، އެންޒޯ މަރެސްކާ މި ވަނީ ކުރިމަތިލި ފުރަތަމަ ރަސްމީ މެޗުން ސިޓީއާ އެކު ބަލިވެފަ އެވެ.
ވެމްބްލީ ސްޓޭޑިއަމް ލިބެން ނެތުމުން، މި ފަހަރުގެ ޝީލްޑް މެޗު ކުޅުނީ، ކާޑިފްގެ ޕްރިންސިޕަލިޓީ ސްޓޭޑިއަމްގަ އެވެ. މި މެޗު ފަށައިގެން، 23 ސިކުންތު ތެރޭގައި އާސެނަލުން ލީޑުނެގި އެވެ. މި ލަނޑު ޖެހީ ޒުވާން ތަރި، މައިލްސް ލެވިސް-ސްލެލީ ދިން ބޯޅައަކުން ރިކާޑޯ ކަލަފިއޯރީ އެވެ. މިއީ، ޝީލްޑް މެޗެއްގައި މިހާތަނަށް ފެނުނު އެންމެ އަވަސް ގޯލެވެ. މީގެ ކުރިން އެންމެ އަވަސް ގޯލެއްގެ ގޮތުގައި އޮތީ، 1968 ވަނަ އަހަރުގެ ޝީލްޑް މެޗުގައި ސިޓީގެ ބޮބީ އޯވެން، އެ ފަަހަރުގެ ޝީލްޑް މެޗުގައި ވެސްޓް ބްރޮމް ކޮޅަށް ޖެހި ގޯލެކެވެ.
އާސެނަލުން ލީޑުނެގުމުން ސިޓީން ކުރިއަށް ޖެހިގެން ލަނޑެއް ޖެހޭތޯ މަސައްކަތްކުރި އެވެ. އެކަމަކު، އާސެނަލްގެ ގޯލު ބަލަހައްޓަމުން ދިޔަ ޑޭވިޑް ރާޔާ ވަނީ މޮޅު ކުޅުމެއް ދައްކައިފަ އެވެ. އެ ގޮތުން، ސިޓީގެ އާލިން ބްރައުޓް ހާލަންޑާއި ފިލް ފޯޑެން ފޮނުވާލި ޝޮޓްތައް ވަނީ މަަތަކޮށްފަ އެވެ.
މެޗުގައި އާސެނަލުން ދެ ވަނަ ލަނޑު ޖެހީ މެޗުގެ 28 ވަނަ މިނިޓްގަ އެވެ. މިއީ، އޭރިއާތެރެއަށް ހުރަސްވި ބޯޅައަކުން، ކްރިސްޓޯސް ޒޯލިސް ބޮލުން ޖައްސާލި ބޯޅައަކަށް އަރައި، ކައި ހަވާޓްޒް ބޮލުން ޖެހި ގޯލެކެވެ. ހަވާޓްޒް ފޮނުވާލި ބޯޅަ ގޯލަށް ވަނީ ސިޓީގެ ކީޕަރު، ޖިއަންލުއީޖީ ޑޮނަރުންމާ އަތުގައި ޖެހިފަ އެެވެ. ދެ ގޯލުގެ ލީޑެއްގައި ފުރަތަމަ ހާފު ނިންމާލި އާސެނަލުން ދެ ވަނަ ހާފު ފެށިގެން މާ ލަސްތަކެއް ނުވެ ތިން ވަަނަ ލަނޑު ޖެހި އެވެ. މި ލަނޑުގައި ވެސް ތަފާތު ދެއްކީ ދެ ވަނަ ލަނޑު ޖަހަން ފުރުސަތު ހޯދައިދިން ޒޯލިސް އެވެ. ކްލަބް ބްރޫޖަށް 50 މިިލިއަން ޑޮަލަރު ދީފައި އާސެނަލުން ގެނައި ޒޯލިސް ދިން ބޯޅައެއް ކޮންޓްރޯލްކޮށް، ދެ ވަނަ ހާފުގެ ތިން ވަނަ މިނިޓްގައި، މެޗުގައި އާސެނަލްގެ ތިން ވަނަ ލަނޑު ޖެހީ، ޓީމުގެ ކެޕްޓަން، މާޓިން އޮޑެގާޑް އެވެ.
ސިޓީން ގިނަ ބަދަލުތަކެއް ގެނެސްގެން ލަނޑެއް ޖެހޭތޯ މަސައްކަތްތަކެއް ދެ ވަނަ ހާފުގައި ވެސް ކުރި އެވެ. އެ ގޮތުން، ބަދަލަކަށް އެރި ރަޔާން ޗާކީ އޭރިއާބޭރުން ޖެހި ޝޮޓެއް ވެސް އާސެނަލް ކީޕަރު ރާޔާ ވަނީ ހުއްޓުވައިފަ އެެވެ.
އިތުރު ގޯލެއް ޖެހޭތޯ އާސެނަލުން އެޓޭކަށް ގިނަ ބޯޅަތަކެއް ހިފައިގެންދިޔައިރު، ބަދަލަކަށް ކުޅެން އެރި ބުކާޔޯ ސަކާ އަށް ރަނގަޅު ފުރުސަތުތަކެއް ލިބި ބޭނުމެއް ނުކުރެވުނެވެ.
ޕްރިމިއާ ލީގުގެ އާ ސީޒަން އަންނަ ހަފްތާގައި ފަށާއިރު، ފުރަތަމަ މެޗުގައި ކުޅޭނީ އާސެނަލުންނެވެ. އެ ގޮތުން، އަންނަ ހުކުރު ދުވަހުގެރޭ އަމިއްލަ ދަނޑުގައި އާސެނަލުން ނުކުންނާނީ ކަވެންޓްރީ ސިޓީއާ ދެކޮޅަށެވެ. ފްރޭންކް ލަމްޕާޑް ކޯޗުކޮށްދޭ ކަވެންޓްރީން ވަނީ މި ފަހަރުގެ ޓްރާންސްފާގައި ޓީމު ވަރުގަދަ ކުރުމަށް ގިނަ މަަސައްކަތްތަކެއް ކޮށްފަ އެވެ. ކަވެންޓްރީން ޕްރިމިއާ ލީގަށް މި އެނބުރި އައީ 25 އަހަރު ފަހުންނެވެ.
