ކާޑިފް، ވޭލްސް (އޮަގަސްޓް 16) - ކުރިއަށް އޮތް އިނގިރޭސި ފުޓްބޯޅަ ސީޒަނުގައި ރަނގަޅަށް ކުރިއަށްދާން ބަލާއިރު، އެފްއޭ ޗެރިޓީ ޝީލްޑަކީ ކާމިޔާބު ކުރުން މުހިންމު ޓްރޮފީއެއް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
އިނގިރޭސި ޕްރިމިއާ ލީގުގެ ޗެމްޕިއަންކަން 22 އަހަރަށް ފަހު އާސެނަލުން މިދިޔަ ސީޒަނުގައި ހޯދިއިރު، އޭނާ ވަނީ ދެ ފަހަރެއްގެ މަތިން އާސެނަލަށް ޝީލްޑް ހޯދައިދީފަ އެވެ. އެއީ، 2020 އާއި 2023 ވަނަ އަހަރު އެވެ. މިދިޔަ ސީޒަނުގައި ލިވަޕޫލް ބަލިކޮށް، ޗެރިޓީ ޝީލްޑް ހޯދީ ކްރިސްޓަލް ޕެލަސް އިންނެވެ.
މި ފަހަރުގެ ޝީލްޑް މެޗުގައި، ލީގު ޗެމްޕިއަން، އާސެނަލުން ކުޅޭނީ މިދިޔަ ސީޒަނުގެ އެފްއޭ ކަޕް ތަށި އުފުލާލި މެންޗެސްޓާ ސިޓީއާ އެވެ.
"މިއީ، ޓްރޮފީއެއް، އަހަރެމެން ބޭނުންވާ ޓްރޮފީއެއް. މިދިޔަަ ސީޒަނުގައި އަހަރެމެން ޓްރޮފީއެއް ހޯދިން (އިނގިރޭސި ޕްރިމިއާ ލީގު). އަހަންނަށް މިހާރު އެބަފެނޭ މި ޓީމު އިތުރަށް ކާމިޔާބު ހޯދަން ފެންބޮވައިގަނެފައި ހުރި މަންޒަރު، އެއީ ރަނގަޅު ކަމެއް. ކުރިއަށް އޮތް ސީޒަނަށް ރަނގަޅަށް ކުރިމަތިލުމަށްޓަކައި، ޗެރިޓީ ޝީލްޑް އަކީ ހޯދުން މުހިންމު ޓްރޮފީއެއް،" 2014 އާއި 2015 ވަނަ އަހަރު ކުޅުންތެރިއެއްގެ ގޮތުގައި އާސެނަލާ އެކު، ޗެރިޓީ ޝީލްޑް އުފުލާލި އާޓެޓާ ބުންޏެވެ.
ޗެރިޓީ ޝީލްްޑް މެޗުގައި އާސެނަލާ ދެކޮޅަށް ނުކުންނަ ސިޓީ އަކީ މިދިޔަ ސީޒަނުގައި އާސެނަލާ އެކު ލީގުގެ ރޭހުގައި ވާދަކުރި ޓީމެވެ. ސިޓީ އަށް މިދިޔަ 10 އަހަރު ކޯޗުކޮށްދިން ޕެޕް ގާޑިއޯލާ އެ ޓީމު ދޫކޮށްލާފައިވާއިރު، ކުރިއަށް އޮތް ސީޒަނުގައި ސިޓީގެ ބެންޗުން ފެންނާނީ ޗެލްސީ އަށް ފީފާ ކްލަބް ވޯލްޑް ކަޕް ހޯދައިދިން ކޯޗު އެންޒޯ މަރެސްކާ އެވެ. މަރެސްކާ އަކީ އާޓެޓާ އެކޭ އެއްގޮތަށް ސިޓީގައި، ގާޑިއޯލާގެ އެސިސްޓަންޓް ކޯޗަކަށް މަސައްކަތްކުރި ފަރާތެކެވެ.
ގާޑިއޯލާ އަކީ ފުޓްބޯޅަ ތާރީހުގައި އޭނާ އަށް ފެނުނު އެންމެ މޮޅު ކޯޗު ކަމަށާއި އޭނާ ނެތްތަން ދައްކާނީ ހަމައެކަނި ސިޓީން ނޫން ކަމަށާއި އިނގިރޭސި ފުޓްބޯޅަ އިން ވެސް އެ އުނިކަން ފެންނާނެ ކަމަށް އާޓެޓާ ވަނީ ބުނެފަ އެވެ. ސިޓީން ގާޑިއޯލާ ދިއުމުން އެ މަގާމަށް މަރެސްކާ ގެންނަން ސިޓީން ނިންމި ނިންމުމަކީ ވަރަށް ރަނގަޅު ކަމެއް ކަމަށް އާޓެޓާ ގަބޫލުކުރެ އެވެ. އެއީ، މަރެސްކާ އަކީ ސިޓީގެ ފިލޯސަފީ އާއި ފުޓްބޯޅައިގައި މިހާރު އޮތް ޕްރެޝަރުގައި މަސައްކަތް ކުރެވޭނެ ކޯޗަކަށްވާތީ އެވެ.
"ސިޓީގައި ކާމިޔާބު ހޯދޭނެ ގާބިލުކަން މަރެސްކާގެ ހުރިކަން އެނގޭތީ، އެ ކްލަބުން އޭނާ އެ ގެންދިޔައީ. އަހަންނަށް ގަބޫލުކުރެވެނީ އެހެން،" އާޓެޓާ ބުންޏެވެ.
ޗެރިޓީ ޝީލްޑް މެޗުގެ ކުރިން އޮތް ނޫސްވެރިންގެ ބައްދަލުވުމުގައި މަރެސްކާ ބުނީ، ސިޓީ އަށް މި ވަގުތު އޮތް ޗެލެންޖަކީ، އާސެނަލް މިދިޔަ ސީޒަނުގައި ކުރިއަށްދިޔަ ލެވަލާ އެއް ހަމަ ކުރުން ނޫނީ އޮތް ފަރަގު ކުޑަކުރަން މަސައްކަތް ކުރުން ކަމަށެވެ.
އާސެނަލާއި ސިޓީ ކުޅޭ މެޗު ފަށާނީ މިރޭ، 19:00 ގަ އެވެ.
