މެންޗެސްޓާ (އޮގަސްޓް 11) - މެންޗެސްޓާ ސިޓީ އަށް ކޯޗުކޮށްދިނުމަކީ ފުޓްބޯޅައިގެ އެންމެ ހިތްގައިމު ވަޒީފާ އަދާކުރުން ކަމަށް އިޓަލީގެ ކޯޗު، އެންޒޯ މަރެސްކާ ބުނެފި އެވެ.
ސިޓީގެ އެސިސްޓަންޓް ކޯޗަކަށް ޕެޕް ގާޑިއޯލާއާ އެކު މަސައްކަތްކުރި، އެންޒޯ، ފުލްޓައިމް ކޯޗެއްގެ ގޮތުގައި ލެސްޓާ ސިޓީ އާއި ޗެލްސީގައި ވަނީ މަސައްކަތްކޮށްފަ އެވެ. ލެސްޓާގައި ހުރެ، އިނގިރޭސި ދެ ވަނަ ޑިވިޝަން، ޗެމްޕިއަންޝިޕް ތަށި ހޯދި މަރެސްކާ ވަނީ ޗެލްސީގައި ހުރެ ޔުއެފާ ކޮންފަރެންސް ލީގާއި ފީފާ ކްލަބް ވޯލްޑް ކަޕްގެ ޗެމްޕިއަންކަން ހޯދައިފަ އެވެ.
މިދިޔަ އަހަރުގެ ފަހުކޮޅުގައި، ޗެލްސީގެ ކޯޗުކަމުން ވަކިކުރި މަރެސްކާ، ސިޓީގެ ކޯޗުކަމާ މިދިޔަ ޖޫން މަހު ހަވާލުވީ، ތިން އަހަރުގެ ކޮންޓްރެކްޓެއްގަ އެވެ. ދިހަ އަހަރު ސިޓީ އަށް ކޯޗުކޮށްދިން ގާޑިއޯލާ އަދާކުރި ޒިންމާ މިހާރު އޮތީ މަރެސްކާ ބޮލުގައި އެޅިފަ އެވެ.
"މިއީ، ވަރަށް ފުރިހަމަ ވަޒީފާއެއް އަދާކުރަން. ފަހުރެއްގެ ގޮތުގައި އަހަރެން ދެކެނީ ވެސް. އެންމެ މުހިންމު ކަަމަކީ، ސިޓީގެ ފުޓްބޯޅައިގެ އޮޕަރޭޝަނުގައި އުޅޭ، ހަލްދޫން، ހޫގޯ އަދި ފެރާން. އެންމެންނަކީ ވެސް ފުޓްބޯޅައިގެ ނަޒަރިއްޔާ އިން ބަލާއިރު އެއް ބަހުރަވަ އަކުން ވާހަަކަ ދައްކާ މީހުން. މިހާރު މި ކްލަބަކީ، މެޗުތަކުން މޮޅުވެ، ތަށި ހޯދައި ޗެމްޕިއަނުންގެ ގޮތުގައި ކުރިއަށްދާން ޖެހޭ ކްލަބެއް. އެންމެ މުހިންމު ކަމަކީ ސީޒަނަކަށް ވުރެން ސީޒަނެއް ރަނގަޅުކުރަން އެ އޮންނަ އަޒުމު،" މަރެސްކާ ބުންޏެވެ.
"ސިޓީއާ ގުޅެން އަހަރެން ގަޔާވި އެންމެ ބޮޑު ސަބަަބަކީ މިއީ. ޓީމުގައި އެބައޮތް އެއް ރޫހެއް. ސިޓީގެ ކޮންމެ މީހެއް ވެސް ފުޓްބޯޅައާ މެދު ދެެކެނީ ވަރަށް ސީރިއަސް ނަޒަރަކުން،"
އޭނާ ބުނީ، ސިޓީގައި މިހާރު އޮތް ސްކޮޑަކީ ކުރިއަށް އޮތް ސީޒަނުގައި ގިނަ ކާމިޔާބީތަކެއް ހޯދޭނެ ފެންވަރު ހުރި ޓީމެއް ކަމަށެވެ. އަދި، ވަކި ޓާގެޓްތަކެއް ކަނޑައަޅައިގެން ނުކުންނަން ބަލާއިރު، ސިޓީގެ މިހާރު ލެވަލަކީ ނުކުންނަ ކޮންމެ މެޗަކުން ވެސް މޮޅުވުން ކަމަށް މަރެސްކާ ވަނީ ބުނެފަ އެވެ.
އާ ސީޒަނުގައި ސިޓީން ރަސްމީ ފުރަތަމަ މެޗުގައި ނުކުންނާނީ އިނގިރޭސި ފުޓްބޯޅަ ސީޒަން ފަށަން ކުޅޭ ޗެރިޓީ ޝީލްޑް މެޗަށެވެ. މިއީ، ފާއިތުވި ސީޒަންގެ ޕްރިމިއާ ލީގުގެ ޗެމްޕިއަނާއި އެފްއޭ ކަޕް ޗެމްޕިއަން ބައްދަލުކުރާ މެޗެކެވެ. މި ފަހަރުގެ ޝީލްޑް މެޗުގައި ލީގު ޗެމްޕިއަންގެ ގޮތުގައި 22 އަހަރަށް ފަހު އާސެނަލް ނުކުންނައިރު، ސިޓީން މި މެޗުގައި މި ކުޅެނީ، އެފްއޭ ކަޕްގެ ޗެމްޕިއަންގެ ހައިސިއްޔަތުންނެވެ.
