ލިވަޕޫލް (އޮގަސްޓް 15) - އެމޭޒަންގެ ފައުންޑަރު، ދުނިޔޭގެ ހަތަރު ވަނަ އަށް އެންމެ މުއްސަނދި މަހުޖަނު، ޖެފް ބެޒޯސް ހިމެނޭ ކޮންސޯޓިއަމް ގްރޫޕަކުން ލިވަޕޫލްގެ މައިނޯރިޓީ ހިއްސާއެއް ގަނެފި އެވެ.
ލިވަޕޫލްގެ މެޖޯރިޓީ ހިއްސާދާރު، ފެންވޭ ސްޕޯޓްސް ގްރޫޕް (އެފްއެސްޖީ) އިން އިއުލާނުކުރި ގޮތުގައި، ބެޒޯސްގެ ބައިވެރިވުން އޮތް 1892 ހޯލްޑިންސް އިން ވަނީ ލިވަޕޫލްގެ 30 ޕަސެންޓް ހިއްސާ ގަނެފަ އެވެ. މި ކޮންސޯޓިއަަމް ގްރޫޕްގައި، ބެޒޯސްގެ އިތުރުން ހިމެނެނީ، ބްރިޓިޝް-އިންޑިއަން ބިލިއަނަރު، އަމިތު ބާޓިއާ އާއި ފޭސްބުކްގެ ކޯ ފައުންޑަރު އެޑުއާޑޯ ސަވެރިން އެވެ.
ލިވަޕޫލް ހިންގަމުން އަންނަ ބޯޑު ފުޅާކުރަން ނިންމާފައިވާއިރު، ދެން އެކުލަވާލާ ބޯޑުގެ ވައިސް ޗެއާމަނަކަށް ބާޓިއާ ވެސް ހަރަކާތްތެރިވާނެ އެވެ. އިންޑިއާގެ ވިޔަފާރިވެރިޔާ، ބިލިއަނަރު، ލަކްޝްމީ މިއްތަލްގެ ދަނބިދަރިފުޅު، ބާޓިއާ ވަނީ އިނގިރޭސި ކްލަބް، ކުއީންސް ޕާކް ރޭންޖާސް (ކިއުޕީއާރް)ގެ ކޯ އޯނަރެއްގެ ގޮތުގައި 18 އަހަރު މަސައްކަތްކޮށްފަ އެވެ. އެ މަގާމުން ވަކިވީ މީގެ މަހެއްހާ ދުވަސް ކުރިންނެވެ،
މަޝްހޫރު އީކޮމާސް ކުންފުނި، އެމޭޒަން، 1994 ވަނަ އަހަރު އަމިއްލަ ގަރާޖުން ފެށި ބެޒޯސްގެ މި ވަގުތުގެ މިލްކިއްޔާތުގެ ޖުމްލަ އަކީ، 256 ބިލިއަން ޑޮލަރެވެ. ލިވަޕޫލްގެ މައިނޯރިޓީ ހިއްސާ ގަތް ކޮންސޯޓިއަމްގައި، ބެޒޯސްގެ ބައިވެރިވުން އޮތް މިންވަރެއް ސާފުވެފައިނުވާއިރު، އޭނާ އެއްވެސް ސިފައެއްގައި ލިވަޕޫލްގެ މަގާމަކުން ފެނުމުގެ ފުރުސަތު ކުޑަ އެވެ. އެކަމަކު، އޭނާ އައްޔަނުކުރާ ބައެއް މަންދޫބުން، ލިވަޕޫލްގެ ބޯޑުގައި ހަރަކާތްތެރިވާނެ އެވެ.
ލިވަޕޫލްގެ މައިނޯރިޓީ ހިއްސާއެއް ވިއްކާލި ނަމަވެސް މިހާރު މި ހިނގަމުން އަންނަ ޓްރާންސްފާ މާކެޓަށް އޭގެ ސަބަބުން އެއްވެސް ބަދަލެއް ނާންނާނެ ކަމަށާއި ބަޖެޓް އިތުރުވާނެ ކަމަށް ދެކެވޭ ވާހަކައިގައި ހަގީގަތެއް ނެތްކަމަށް ލިވަޕޫލްގެ އޮފިޝަލަކާ ހަވާލާދީ އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ.
ލިވަޕޫލް ހިންގަމުން އަންނަ އެފްއެސްޖީން އެ ކްލަބްގެ މެޖޯރިޓީ ހިއްސާ ވިއްކާލަން ނިންމައިފިނަމަ، މިހާރު އޮތްގޮތުން، އެ ކްލަބްގެ މައި ހިއްސާދާރަކަށް ވުމުގެ ފުރސުަތު 1892 ހޯލްޑިންސް އަށް ލިބޭނެ އެވެ. ލިވަޕޫލް، މި ވަގުތަށް ބަލާއިރު އަގުކުރެވިފައިވަނީ، 7 ބިލިއަން ޑޮލަރުގަ އެވެ.
އެފްއެސްޖީން ލިވަޕޫލް ގަތީ 2010 ވަނަ އަހަރު އެވެ. އެ ފަަހަރު ލިވަޕޫލް ގަންނަން ޖުމްލަ އެކު، 500 މިލިއަނެއްހާ ޑޮލަރު ހޭދަކޮށްފައިވެ އެވެ. އެ ވަގުތު ލިވަޕޫލްގެ މާލީ ހާލަތު ގޯސް ފައްތަރެއްގައި އޮތްއިރު، އެފްއެސްޖީން އެ ކްލަބް ގަނެ، މިދިޔަ 16 އަަހަރެއްހާ ދުވަހު ކުރި މަސައްކަތުން އެ ކްލަބްގެ ހާލަތު ބޮޑުތަނުން ވަނީ ރަނގަޅުކޮށްފަ އެވެ.
