އިންފްރާސްޓްރަކްޗާ މަސައްކަތްތަކާއި ދަތުރުފަތުރުގެ ހިދުމަތްދޭ ޕަބްލިކް ކުންފުނި، މޯލްޑިވްސް ޓްރާންސްޕޯޓް ކޮންސްޓްރަކްޝަން ކޮމްޕެނީ (އެމްޓީސީސީ) އަށް މިދިޔަ އަހަރު 85 މިލިއަން ރުފިޔާ ސާފު ފައިދާ ވެފައިވާ ކަމަށް އެ ކުންފުނީގެ އަހަރީ ރިޕޯޓުން ދައްކައިފި އެވެ.
އެމްޓީސީސީން މިދިޔަ އަހަރު އޭގެ ކުރީ އަހަރަަށް ވުރެ ބޮޑު ފައިދާއެއް ނެރުނުއިރު، އަހަރުންއަހަރަށް ލިބުނު އާމްދަނީ ވަނީ 2.15 ބިލިއަން ރުފިޔާއިން 2.13 ބިލިއަން ރުފިޔާއަށް މަދުވެފަ އެވެ. އާމްދަނީ ދަށްވީ ނަމަވެސް ކުންފުނީގެ އޭގެ ކުރީ އަހަރަށް ވުރެ މިދިޔަ އަހަރު ލިބުނު ފައިދާ 40 މިލިއަން ރުފިޔާ އިތުރެވެ.
ވަކިވަކި ދާއިރާތަަކަށް ބަލާއިރު، އެންމެ ބޮޑު އާމްދަނީއެއް ލިބުނީ އިމާރާތް ކުރުމާއި ބިން ހިއްކުމުންނެވެ. މި ހަރަކާތްތަކުން 1.7 ބިލިއަން ރުފިޔާ ލިބިފައިވެ އެވެ. މިއީ ލިބުނު އާމްދަނީގެ 80 ޕަސެންޓެވެ.
ދެން އެންމެ ބޮޑު އާމްދަނީއެއް ލިބުނީ 244 މިލިއަން ރުފިޔާގެ އާމްދަނީއެއް ވަން އެ ކުންފުނީގެ ޓްރޭޑިން ބައިންނެވެ. އޭގެ އިތުރުން، ބަސްތަކާއި ފެރީތައް ބޭނުންކޮށްގެން ފޯރުކޮށްދޭ ދަތުރުފަތުރުގެ ހިދުމަތުން 150 މިލިއަން ރުފިޔާ އާއި އެހެނިހެން ވިޔަފާރި ހަރަކާތްތަކުން 19 މިލިއަން ރުފިޔާ އެ ކުންފުންޏަށް ލިބުނެވެ.
އެމްޓީސީސީން މިދިޔަ އަހަރު ނިންމާލި ބޮޑެތި ޕްރޮޖެކްޓުތައް
- މާފަރު އެއާޕޯޓުގެ އޭޕްރަން ބޮޑުކުރުން
- މުލި އެއާޕޯޓު ތަރައްގީކުރުން
- އެރީނާ ލެގޫން ބިން ހިއްކުން
- މެކްސް ރޯޔަލް ރިސޯޓު ތަރައްގީކުރާ އުލާނީ ފަޅު ބިން ހިއްކުން
- ގުޅި ބިން ހިއްކުން
- އިހަވަންދޫ ބިން ހިއްކުން
އެމްޓީސީސީއަށް މިދިޔަ އަހަރު ލިބުނު ފައިދާއިން އެ ކުންފުނިން ވަނީ ހިއްސާދާރުންނަށް ފައިދާގެ ގޮތުގައި ކޮންމެ ހިއްސާއަކަށް 3ރ. މަގުން ފައިދާ ބަހަން ނިންމާފަ އެވެ.
އެހެން އަހަރުތަކެކޭ އެއް ފަދައިން މިދިޔަ އަހަރު ވެސް އެމްޓީސީސީއަށް ދިވެހި ދައުލަތުގެ ބަޖެޓުން ސަބްސިޑީ އާއި އެހީގެ ގޮތުގައި ގިނަ އަދަދަކަށް ފައިސާ ލިބިފައިވެ އެވެ. އޭގެ ތެރޭގައި އެ ކުންފުނީގެ ބިން ހިއްކުމާއި އިމާރާތްކުރުމުގެ ހަރަކާތްތަކަށް ސަރުކާރުން އެހީގެ ގޮތުގައި ފޯރުކޮށްދިން، 141.3 މިލިއަން ރުފިޔާ އާއި ދަތުރުފަތުރުގެ ހިދުމަތުން ލިބޭ ގެއްލުމުގެ ސަބްސިޑީގެ ގޮތުގައި ދިިން 511.7 މިލިއަން ރުފިޔާ ހިމެނެ އެވެ. މިއީ ޖުމްލަ 653.1 މިލިއަން ރުފިޔާ އެވެ.
ނަމަވެސް މީގެ ތެރެއިން ގިނަ ފައިސާއަކީ އެމްޓީސީސީއަށް ލިބެން ޖެހޭ ފައިސާ (ޓްރޭޑް ރިސީވަބަލްސް) ގެ ގޮތުގައި ރެކޯޑުކުރެވިފައިވާ އަދަދެކެވެ. މިދިޔަ އަހަރު ނިމުނުއިރު އެ އަދަދު ވަނީ 1.3 ބިލިއަން ރުފިޔާއަށް އިތުރުވެފަ އެވެ.
އެމްޓީސީސީން އެ ކުންފުނީގެ އަހަރީ ރިޕޯޓާއި މާލީ ރިޕޯޓުތައް ނެރެފައި މި ވަނީ އެ ރިޕޯޓުތައް އާންމުކުރަން ޖެހޭ ތާރީހު ފަހަނައަޅައި ދިޔުމާ ގުޅިގެން ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން ޖޫރިމަނާ ވެސް ކުރި ފަހުންނެވެ.
