ޕަބްލިކް ކުންފުނި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީގެ މިދިޔަ އަހަރުގެ ފަހު ކުއާޓާގެ ރިޕޯޓާއި އަހަރީ ރިޕޯޓު ހުށަހަޅަން ދިން މުއްދަތު އެތައް ފަހަރެއްގެ މަތިން އިތުރުކޮށްދިނުމުން ވެސް ރިޕޯޓު ހުށަނޭޅުމުން ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން އެ ކުންފުނި މިއަދު ޖޫރިމަނާކޮށްފި އެވެ.
ސީއެމްޑީއޭގެ ގަވާއިދުތައް އޮންނަ ގޮތުން މާލީ އަހަރު ނިމޭތާ ހަތަރު މަސް ދުވަހުގެ ތެރޭގައި އަހަރީ ރިޕޯޓު ހުށަހަޅަން ޕަބްލިކް ކުންފުނިތަކުގެ މައްޗަށް ލާޒިމެވެ. އަދ، ސީއެމްޑީއޭގެ ހުއްދަ ލިބިގެން ނޫނީ ކޮންމެ އަހަރެއްގެ އޭޕްރިލް 30، ގެ ކުރިން އަހަރީ ރިޕޯޓު ހުށަހަޅަން ޖެހެ އެވެ.
ނަމަވެސް އެމްޓީސީސީއަށް ތަކުރާރުކޮށް ފުރުސަތު ދިނުމުން ވެސް ރިޕޯޓުތައް ހުށަނާޅާތީ ސީއެމްޑީއޭއިން ވަނީ އެ ކުންފުނި 30،000ރ. އިން ޖޫރިމަނާކޮށްފަ އެވެ.
އެމްޓީސީސީން މި ރިޕޯޓުތައް އާންމުނުކޮށް އުޅެނީ އެ ކުންފުނީގެ އޮޑިޓު ނުނިމޭތީ ކަމަށް ބުނެ އެވެ.
އެ ގޮތުން އެންމެ ފުރަތަމަ ހުށަހަޅަން ޖެހޭ ތާރީހު ލަސްކޮށްދޭން އެމްޓިސީސީން އެދުނީ އޭޕްރިލް މަހުގެ ކުރީކޮޅެވެ. އެ ފަހަރު ސީއެމްޑީއޭއިން ސުންގަޑި އިތުރުކޮށްދިނީ މި އަހަރުގެ މެއި މަހުގެ މެދާ ހަމައަށެވެ.
ސީއެމްޑީއޭއިން ދެ ވަނަ ފަހަރަށް މުއްދަތު އިތުރުކޮށްދިނީ މެއި މަހު ހުށަނޭޅޭނެ ކަމަށް ބުނުމުން، ޖުލައި 15، އަށެވެ. އެންމެ ފަހުން އެމްޓީސީސީން ޖޫރިމަނާކުރީ މި ތާރީހަށް ވެސް ނުނިންމޭނޭ ކަމަށް ބުނުމުން އިއްޔެގެ ނިޔަލަށް ސުންގަޑި އިތުރުކޮށްދީފައި ވަނިކޮށެވެ.
އެމްޓީސީސީގެ މާލީ ރިޕޯޓުތައް ނުނިންމިގެން އުޅޭއިރު، އެ ކުންފުންޏަކީ ރާއްޖޭގެ އެންމެ ދުވަސްވީ ޕަބްލިކް ކުންފުނި އަދި ގަވާއިދުން މި ރިޕޯޓުތައް ޝާއިއުކުރަމުން އައި ކުންފުންޏެކެވެ.
