މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ޓެކްސީ ހިދުމަތް ދޭން ބޭނުންކުރާ އެޕްލިކޭޝަން ހެކްކޮށް، ބައިވަރު ކަސްޓަމަރުންގެ ޒާތީ މައުލޫމާތު ލީކުކޮށްލައިފި އެވެ.
އެމްޓީސީސީގެ ޓެކްސީ އެޕްލިކޭޝަން ހެކް ކުރި ކަމަށް ލަފާ ކުރެވެނީ ރޭގެ ވަގުތެއްގައި އެވެ. މި އެޕްލިކޭޝަން ހެކް ކުރި މީހާ ނުވަތަ ބަޔަކު ވަނީ ބައެއް ޑްރައިވަރުންގެ ނަން ވެސް ބަދަލުކޮށްފަ އެވެ.
ޓެކްސީ އެޕްލިކޭޝަން ހެކް ކުރުމަށް ފަހު ސޯޝަލް މީޑިއާގައި ލީކުކޮށްލާފައިވާ މައުލޫމާތުގެ ތެރޭގައި އެޕްލިކޭޝަނުގައި ރަޖިސްޓްރީކޮށްފައިވާ މީހުންގެ ނަންތަކާއި، ފޯނު ނަމްބަރާއީ، އީމެއިލް އެޑްރެސްގެ އިތުރުން ވޮލެޓު އައިޑީ އާއި، ކަސްޓަމަރުން ކޮށްފަ ހުރި މެސެޖުތަކާއި، ކުރި ދަތުރުތައް ހިމެނެ އެވެ.
މި އެޕްލިކޭޝަން ބޭނުންކުރާ މީހުން ބުނާ ގޮތުގައި ރޭގެ ވަގުތުތަކުގައި ހިދުމަތަށް ބުރޫއެރި ނަމަވެސް މިހާރު އެޕްލިކޭޝަން ބޭނުންކުރެވެ އެވެ.
އެމްޓީސީސީގެ ޓެކްސީ އެޕްލިކޭޝަނަކީ މި ހިދުމަތް ފެށީއްސުރެން މިއަދާ ހަމައަށް ބޮޑު މައްސަލަގަނޑެއްގެ ތެރޭގައި އޮތް ކަމެކެވެ.
މި މައްސަލަ ފެން މަތިވީ، ވާދަވެރި ބީލަމަކަށް ނުގޮސް، މި އެޕްލިކޭޝަން ތައްޔާރުކުރުމުގެ މަސައްކަތް ސޮފްޓްވެއާ އުފެއްދުމުގެ ތަޖުރިބާ ނެތް ފިކްސްޑް މޯލްޑިވްސް ނަމަކަށް ކިޔާ ވިޔަފާރިއަކާ 13 މިލިއަން ރުފިޔާގެ އަގަކަށް ހަަވާލުކުރިކަން އެނގުނު ހިސާބުންނެވެ.
"ފިކްސްޑް" ޑީލަކަށް 13 މިލިއަން ދީގެން ހެދި "ފަޅޯ" ޓެކްސީ އެޕް
އެމްޓީސީސީގެ ޓެކްސީ ހިދުމަތަށް ބޭނުންވާ އެޕްލިކޭޝަން ތައްޔާރުކުރުން، އެއްވެސް ތަޖުރިބާއެއް ނެތް އަމިއްލަ ކުންފުންޏަކަށް 13 މިލިއަން ރުފިޔާއަށް ސިއްރު ބިޑެއްގެ ދަށުން ހަވާލުކުރި. މި މުއާމަލާތުގައި ކޮރަޕްޝަނާއި އާއިލީ ގުޅުންތައް އެކުލެވޭ. ސިފަަވަނީ ކޮރަޕްޝަންގެ ނެޓްވޯކެއް.
އެ މައްސަލަ ފެންމަތިވެފައި އޮއްވާ މި އަހަރުގެ އޭޕްރިލް 2، ގައި ޓެކްސީ ހިދުމަތް އިފުތިތާހުކުރި ރޭ ފިކްސްޑް މޯލްޑިވްސްގެ ޓެކްސް އެޕްލިކޭޝަން ބޭނުންކުރަން ފެށި އެވެ. ނަމަވެސް މި ބޭނުންކުރަން ފެށި އިރު ހުރި ބޮޑެތި ސެކިއުރިޓީ މައްސަލަތަކަކާ ގުޅިގެން އެ ފަހަރު ވެސް ކަސްޓަމަރުންގެ ގިނަ މައުލޫމާތުތަކެއް ލީކުވި އެވެ.
އެހާ ހިސާބުން އެޕްލިކޭޝަން ބޭނުންކުރުން ހުއްޓާލައި، ދެ ހަފުތާ ވަންދެން އެމްޓީސީސީގެ ޓެކްސީ ދަތުރުތައް ކުރީ އެއްވެސް އަގެއް ނުނަގާ މުޅިން ހިލޭ އެވެ. ދަތުރުތަކަށް އަގު ނަގަން ފެށީ ހޮޓްލައިން ނަމްބަރަކަށް ގުޅައިގެން ވެބް ޕޯޓަލަކުން ފައިސާ ދައްކާ ގޮތަށެވެ.
އެމްޓީސީސީގެ ޓެކްސީ އެޕްލިކޭޝަން ބޭނުންކޮށްގެން ހިދުމަތް ދެވޭ ވަރުވީ ހިދުމަތް ފެށިތާ ދެ މަސް ދުވަސް ފަހުން، މިދިޔަ ޖޫން 2، ގައި އެވެ. މައުލޫމާތު ލިބޭ ގޮތުގައި މިހާރު ބޭނުންކުރަމުން އަންނަ އެޕްލިކޭޝަނަކީ އެމްޓީސީސީގެ އައިޓީ ޑީޕާޓުމަންޓުން ތައްޔާރުކޮށްފައިވާ އެޕްލިކޭޝަނެކެވެ.
މި މައްސަލައިގައި މިއަދާ ހަމައަށް އައި އިރުވެސް އެމްޓީސީސީން ރަސްމީކޮށް އެއްޗެއް ނުބުނެ އެވެ. ނަމަވެސް މީގެ ކުރިން އަދަދު ނޫހުން ސުވާލުކުރުމުން އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ އެއްވެސް ގޯހެއް ހަދާފައި ނުވާނެ ކަމަށް ވިދާޅުވެފަ އެވެ.
ސައުދީ މިހެން ވިދާޅުވި ނަމަވެސް ފިކްސްޑް މޯލްޑިވްސްއާ މަަސައްކަތް ހަވާލުކުރުމުގައި ގިނަ ގޯސްތަކެއް ހިނގާފައިވާ ކަމަށް ބާރުދޭ ގިނަ މައުލޫމާތު ވަނީ ތިލަވެފަ އެވެ. މިހެން ނަމަވެސް މި މައްސަލަ ތަހުގީގުކުރަން ސަރުކާރުގެ ކަމާބެހޭ އިދާރާތަކުގެ މާ ބޮޑު ޝައުގުވެރިކަމެއް ހުރި ކަމަކަށް ވެސް ނުފެނެ އެވެ.
