ހުސްވި ހަފުތާގައި ސަރުކާރުން އެންމެ ބޮޑު ހޭދައެއް ކޮށްފައި ވަނީ ސަބްސިޑީތައް ދިނުމަށް ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ފިނޭންސް މިނިސްޓްރީން އިއްޔެ އާންމުކޮށްފައިވާ ވީކްލީ ފިސްކަލް ޑިވެލޮޕްމެންޓްސް ރިޕޯޓުގައި ދައްކާގޮތުން، މި މަހުގެ 13 ވަނަ ދުވަހުގެ ނިޔަލަށް މިއަހަރު ސަރުކާރުން ވަނީ ސަބްސިޑީތަކަށް 3.4 ބިލިއަން ރުފިޔާ ހަރަދުކޮށްފަ އެވެ. މިއީ މިދިޔަ އަހަރުގެ މި މުއްދަތުގައި ސަބްސިޑީތަކަށް ސަރުކާރުން ކުރި ހަރަދަށްވުރެ 78 ޕަސެންޓު އިތުރު އަދަދެކެވެ.
މި މަހުގެ 6، އާ ހަމައަށް ސަބްސިޑީތަކަށް ކުރި ހަރަދު ހުރީ 3.2 ބިލިއަން ރުފިޔާގަ އެވެ.
މި އަދަދުތަކަށް ބަލާއިރު، މި އަހަރު ނިމޭއިރު ސަބްސިޑީތަކަށް ކުރާ ހަރަދު، މިދިޔަ އަހަރު ކުރި ޖުމުލަ ހަރަދަށްވުރެ އިތުރުވާނެ ކަމަށް ބެލެވެ އެވެ. މިދިޔަ އަހަރު ސަބްސިޑީތަކަށް ހަރަދުކޮށްފައި ވަނީ 4.4 ބިލިއަން ރުފިޔާ އެވެ. މިދިޔަ އަހަރަކީ ރާއްޖޭގެ ތާރީހުގައި އެންމެ ގިނައިން ސަބްސިޑީއަށް ހަރަދުކުރި އަހަރެވެ.
ސަބްސިޑީތަކަށް ކުރި ހަރަދު
- 2021 - 1.1 ބިލިއަން ރުފިޔާ
- 2022 - 3.6 ބިލިއަން ރުފިޔާ
- 2023 - 3.6 ބިލިއަން ރުފިޔާ
- 2024 - 3.9 ބިލިއަން ރުފިޔާ
- 2025 - 4.4 ބިލިއަން ރުފިޔާ
- 2026 (އޯގަސްޓު 13، އާ ހަމައަށް) - 3.4 ބިލިއަން ރުފިޔާ
މި އަހަރުގެ ބަޖެޓުގައި ސަބްސިޑީއަށް ހަރަދުކުރުމަށް ކަނޑައެޅީ 2.9 ބިލިއަން ރުފިޔާ އެވެ.
ސަބްސިޑީ ހަރަދު ވިދިވިދިގެން ފަސް ވަނަ އަހަރު ތިން ބިލިއަން ރުފިޔާއިން މައްޗަށް
މިއަހަރަށް ކަނޑައެޅި ބަޖެޓަށް ވުރެ އިތުރަށް ސަބްސިޑީއަށް ހަރަދުވެފައިވާއިރު، ބޭނުންޖެހިފައިވާ މީހުންނަށް އެކަނި ސަބްސިޑީ ދިނުމުގެ ސިޔާސަތު ތަންފީޒުކުރުން ވަނީ ހުއްޓާލާފަ. ސަބްސިޑީގެ ގޮތުގައި ހަރަދުކުރާ ހުރިހާ ފައިސާއެއް ދަނީ ސަރުކާރު ހިއްސާވާ ކުންފުނިތަކަށް.
ސަބްސިޑީ ބަޖެޓު ހުސްވެގެން އިތުރަށް ހަރަދުކުރަން ޖެހިފައިވާއިރު، މިއީ ފާއިތުވި އަހަރުތަކުގެ ގިނަ ބަޖެޓުތަކުން ފެނުނު ކަމެކެވެ. ފިނޭންސުގެ ރެކޯޑުތަކުން ދައްކާ ގޮތުގައި 2022 ގައި ސަބްސިޑީތަކަށް ކުރާ ހަރަދު ތިން ބިލިއަން ރުފިޔާއަށް އުފުލުނު ފަހުން، ކޮންމެ އަހަރެއްގައި އެ އަދަދު އަންނަނީ އިތުރުވަމުންނެވެ.
ސަބްސިިޑީތަކަށް މިހާ ބޮޑު ހަރަދެއް ކުރަން ޖެހިފައިވާއިރު، އެންމެނަށް ލިބޭ ގޮތަށް ސަބްސިޑީ ދިނުން ހުއްޓާލަން ބައިނަލްއަގުވާމީ މާލީ އިދާރާތަކުން ލަފާ ދެމުން އަންނަތާ ދަހަރުތަކެއް ވެއްޖެ އެވެ. މި ސަރުކާރު ހިމެނޭހެން ތިން ސަރުކާރެއްގައި ވަނީ މި ސިޔާސަތު ބަދަލުކުރަން މަސައްކަތްކޮށްފަ އެވެ. ނަމަވެސް އެއްވެސް ސަރުކާރަކަށް ބުނި ގޮތަށް އެ ސިޔާސަތު ތަންފީޒެއް ނުކުރެވެ އެވެ.
އެންމެ ފަހުން މި ސަރުކާރުން ވަނީ މާހިރުންގެ ލަފަޔާ ހިލާފަށް، ބޭނުންޖެހިފައިވާ މީހުންނަށް އެކަނި ސަބްސިޑީ ދިނުމުގެ ސިޔާސަތު ދޫކޮށްލާފަ އެވެ. މިއީ މިދިޔަ އަހަރުގެ މެދުތެރެއިން ފެށިގެން ތަންފީޒުކުރާނެ ކަމަށް ސަރުކާރުން ބުނި ސިޔާސަތެކެެވެ. ބުނި ގޮތަށް ސަބްސިޑީ ސިޔާސަތު ބަދަލުނުކޮށް، ސަރުކާރުން ވަނީ ކަރަންޓު އުފެއްދުމުގެ އެފިޝަންސީ މަތިކޮށްގެން ސަބްސިޑީ ހަރަދުތައް ކުޑަކުރަން ނިންމާފަ އެވެ.
ބަޖެޓު 2026: ސަބްސިޑީ ޓާގެޓު ކުރުމުގެ ވިސްނުމެއް ނެތް
ސަބްސިޑީ ޓާގެޓުކުރުމަކީ ސަރުކާރުން މިދިޔަ އަހަރު އިއުލާން ކުރި ހޯމްގްރޯން ފިސްކަލް ރިފޯމް އެޖެންޑާގައި ހިމެނޭ ހަރަދު ކުޑަކުރުމުގެ ފިޔަވަޅެއް. ނަމަވެސް އެއްވެސް ސަބަބެއް ބުނުމެއް ނެތި އެ ސިޔާސަތު ތަންފީޒުނުކުރަން ސަރުކާރުން ވަނީ ނިންމާފައި.
ސަބްސިޑީގެ ގޮތުގައި ބަޖެޓުން ހަރަދު ކުރާ ހުރިހާ ފައިސާއެއް ދަނީ ސަރުކާރު ހިއްސާވާ ކުންފުނިތަކަށެވެ. އެ ގޮތުން ތެލާއި ކާޑު ސަބްސިޑީ ދަނީ އެއްކޮށް އެސްޓީއޯއަށެވެ. ކަރަންޓާއި ނަރުދަމާގެ ސަބްސިޑީ ލިބެނީ ފެނަކަ އާއި ސްޓެލްކޯ އާއި އެމްޑަބްލިޔުއެސްސީއަށެވެ. ދަތުރުފަތުރުގެ ސަބްސިޑީ ލިބެނީ އެމްޓީސީސީއަށެވެ. ކުނި މެނޭޖުކުރުމުގެ ސަބްސިޑީ ލިބެނީ ވެމްކޯއަށެވެ. އަދި، މަސްވެރިކަމުގެ ސަބްްސިޑީ ލިބެނީ މިފްކޯއަށެވެ.
އޭގެ އިތުރުން ސަރުކާރުން ވަނީ ސޯޝަލް ހައުސިން ޕްރޮޖެކްޓުތަކުން ތަރައްގީކޮށްފައިވާ ފްލެޓުތަކުގެ އަގު ހެޔޮކުރަން ހައުސިން ސަބްސިޑީގެ ގޮތުގައި ވެސް ފައިސާ ހަރަދުކޮށްފަ އެވެ.
ފިނޭންސް މިނިސްޓްރީގެ ތަފާސްހިސާބުތަކުން ދައްކާގޮތުގައި، މި އަހަރުގެ މިހައިތަނަށް ހިލޭ އެހީ އާއި އާމްދަނީގެ ގޮތުގައި ދައުލަތަށް ލިބިފައި ވަނީ ޖުމުލަ 27 ބިލިއަން ރުފިޔާ އެވެ. އޭގެ ތެރެއިން 21 ބިލިއަން ރުފިޔާއަކީ ޓެހުކުގެ ގޮތުގައި ލިބުނު އާމްދަނީ އެވެ.
މި އަހަރުގެ މިހައިތަނަށް ސަރުކާރު ހިންގުމުގެ ހަރަދަށް 24 ބިލިއަން ރުފިޔާ ދައުލަތުން ހަރަދުކޮށްފައިވެ އެވެ. އެއީ މިދިޔަ އަހަރުގެ މި މުއްތުގައި ހަރަދުކުރި އަދަދަށްވުރެ 20 ޕަސެންޓު އިތުރު އަދަދެކެވެ.
މި އަދަދުތަކާއެކު މި އަހަރުގެ މިހާތަނަށް ދައުލަތުގެ ބަޖެޓު ވަނީ 950 މިލިއަން ރުފިޔާއިން ޑެފިސިޓްވެފަ އެވެ.
