ލަންޑަން (އޮގަސްޓް 21) - މި ސީޒަނުގައި ޔޫރަޕްގެ އެއްވެސް މުބާރާތެއްގައި ކުޅުމުގެ ފުރުސަތު ލިބިފައި ނެތް، ޗެލްސީގެ ސްޓޭޑިއަމް، ސްޓެމްފޯޑް ބްރިޖު، ޔޫކްރެއިންގެ ޝަކްޓާ ޑޮނެސްކުން ޗެމްޕިއަންސް ލީގުގައި ކުޅޭއިރު ހޯމް ސްޓޭޑިއަމެއްގެ ގޮތުގައި ބޭނުންކުރަން ކުއްޔަށް ދޭން ނިންމައިފި އެވެ.
މިދިޔަ ސީޒަނުގައި ޗެލްސީން، އިނގިރޭސި ޕްރިމިއާ ލީގުގެ 10 ވަނައިގައި ނިންމިިއިރު، އިނގިރޭސި ކަޕް މުބާރާތެއް ކާމިޔާބުކޮށްގެން، ޔޫރަޕްގެ ކްލަބް ފުޓްބޯޅަ މުބާރާތެއް ކުޅެން ވެސް ޖާގައެއް ލިބޭ ގޮތެއްނުވި އެވެ.
އެހެންކަމުން، ޗެލްސީ އަށް މި ސީޒަނުގައި އޮތީ އިނގިރޭސި ފުޓްބޯޅައިގެ ޑޮމެސްޓިކް ތިން މުބާރާތެވެ. އެއީ، ޕްރިމިއާ ލީގާއި ލީގު ކަޕް (ކަރަބާއޯ ކަޕް) އަދި އެފްއޭ ކަޕް އެވެ.
ޔޫކްރެއިންގެ ގަދަބާރު، ޝަކްޓާ ޑޮނެސްކްގެ ހޯމް ސްޓޭޑިއަމް ކަމަށްވާ ޑޮންބާސް އެރީނާގައި އެ ޓީމުގެ ހޯމް މެޗުތައް ކުޅެވެން ނެތެވެ. އެއް ސަބަބަކީ ރަޝިއާ އާއި ޔޫކްރެއިންގެ ދެމެދުގައި ހިނގާ ހަނގުރާމައިގެ ސަބަބުން، ސަލާމަތީ ކަންކަމާ ގުޅޭގޮތުން، ޔަގީންވާން ޖެހޭ ކަންކަން ފުރިހަމަނުވާތީ އެވެ.
ޝަކްޓާ އިން 2014 ވަނަ އަހަރުގެ ފަހުން އެ ޓީމުގެ ދަނޑުގައި ޔޫރަޕްގެ މުބާރާތްތަކުގެ މެޗުތައް ހޯސްޓްކޮށްފައިނުވެ އެވެ. ޔޫކްރެއިން އާއި ރަޝިއާ ހަނގުރާމައިގެ ކުރިން ވެސް ޑޮނެސްކްގައި މެޗުތައް ހޯސްޓްކުރުން އެކި ސަަބަބުތަކާ ހުރެ ވަނީ އުނދަގޫވެފަ އެވެ. އެ ގޮތުން، ޝަކްޓާގެ މެޗުތައް މީގެ ކުރިން ޖަރުމަނާއި ސްލޮވީނިއާ އަދި ޕޮލެންޑްގައި ވެސް ކުޅެފައިވެ އެވެ.
ޗެލްސީން ބުނީ، ޝަކްޓާގެ އެދުމާ އެއްގޮތަށް، ސްޓެމްފޯޑް ބްރިޖުގައި، ޝަކްޓާގެ ހޯމް މެޗުތައް ކުޅެން ފުރުސަތު ދޭން ނިންމާފައިވާ ކަމަށާއި ފާއިތުވި އަހަރުތަކުގައި ޝަކްޓާގެ ހޯމް މެޗުތައް އެކި ގައުމުތަކުގައި ކުޅެފައިވާއިރު، މި ފަހަރު ޗެލްސީން އެ ފުރުސަތު ދޭން ނިންމީ ކަމަށެވެ. ޝަކްޓާގެ ހޯމް ސްޓޭޑިއަމްގެ ގޮތުގައި ސްޓެމްފޯޑް ބްރިޖު ހަމަޖައްސަން، ޔުއެފާ އިން އަދި އިންސްޕެކްޝަންތަކެއް ކުރިއަށްގެންދާނެ އެވެ.
ޗެލްސީގެ ދަނޑު، ސްޓެމްފޯޑް ބްރިޖުގައި ޝަކްޓާގެ މެޗުތައް ކުޅެން ފުރުސަތު ދޭން ނިންމި ނިންމުމަށް އެ ކްލަބްގެ މެނޭޖްމަންޓުން ވަނީ މަރުހަބާ ކިޔައިފަ އެވެ.
ރިޕޯޓްތައް ބުނާގޮތުން، މެޗުތައް ކުޅެން ސްޓެމްފޯޑް ބްރިޖު ކުއްޔަން ދޫކުރަން ޝަކްޓާ އަތުން ޗެލްސީން ނަގަން ނިންމާފައިވަނީ ރަމްޒީ ކުޑަ ފީ އެކެވެ. އެ ގޮތުން، މި ވަގުތު ކޮންޓްރެކްޓް ހަދާފައި އޮތް ގޮތުން، ހަތަރު މެޗަށް އެކަނި ވެސް 7 މިލިއަން ޑޮލަރު އަރަ އެވެ.
