ލަންޑަން (އޮގަސްޓް 21) - އިނގިރޭސި ޕްރިމިއާ ލީގުގެ އާ ސީޒަން މިރޭ ފަށާއިރު، އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ވަނީ މި ސީޒަނުގައި، އާ ގަވާއިދުތަކަކަށް އަމަލުކުރަން ނިންމާފައިވާކަން އިއުލާނުކޮށްފަ އެވެ.
އާ ގަވާއިދުތައް ގެންނަ މުހިންމު ކަންކަމަށް ބަލާއިރު، ވީޑިއޯ އެސިސްޓަންޓް ޓެކްނޮލޮޖީ (ވީއޭއާރް) ބޭނުންކުރުމުގައި އަމަލުކުރާނެ އާ ގޮތްތަކަކާއި ވަގުތު ބޭކާރު ކުރުމަށް ކުޅުންތެރިން ކުރާ ކަންކަން ހުއްޓުވާނެ ގޮތާއި އަނިޔާވެެގެން ކުޅުންތެރިންނަށް ފަރުވާދިނުަމަށް ފަހު އަމަލުކުރާނެ ގޮތުގެ އިތުރުން، ޓެކްޓިކަލް ކަންކަމަށް ބޭނުންކުރާ ޓައިމްއައުޓްގެ ކަންކަމަށް ހައްލު ހޯދާނެ ގޮތްތައް ހިމެނެ އެވެ.
ވީއޭއާރް އަށް މި ފަހަރު އިތުރުވާނެ އެއް ކަަމަކީ ސެމީ އޮޓޮމޭޓެޑް އޮފްސައިޑް ޓެކްނޮލޮޖީ ބޭނުންކުރާނެ އެވެ. އެއީ، އޮފްސައިޑް ނިންމުންތަކަށް މެޗު ހުއްޓިފައި އޮތް މިންވަރު މަދުކުރުމަށެވެ. ފައުލު ދިނުމުގައި ކުޅުންތެރިއެއްގައި ގައިގައި ކޮންޓެކްޓް ވެފައި ހުރި ގޮތް ދެނެގަތުމަށް، ކޮންމެ ކޮންޓެކްްޓަކީ ފައުލެއް ނޫން ކަމަށް ބަަލަން ވީއޭއާރް އާއި ރެފްރީ އަށް ވަނީ އަންގައިފަ އެވެ. ކުޅުންތެރިއަކަށް ދެ ވަނަ ރީނދޫ ކާޑެއް ދައްކާ ހާލަތެއްގައި މި ސީޒަނުގައި ވީއޭއާރް ބެލޭނެ އެވެ.
އަނިޔާ ވެގެން ބަަދަލުކުރާ ކުޅުންތެރިއަކަށް ދެން ކުޅެން އެރޭނީ އެއް މިނިޓް ވުމުންނެވެ. ކުރިން އޮތީ 30 ސިކުންތުގެ ވަގުތަކަށް ދަނޑުބޭރުގައި މަޑުކުރަން ޖެހޭ ގޮތަށެެވެ. އެއްލުން އެއްލުމާއި ގޯލްކިކް ޖެހުމުގައި ފަސް ސިކުންތަށް ވުރެން ލަސްވެއްޖެނަމަ، އެއް ލުމެއްގައިނަމަ ދޭނީ އަނެއް ޓީމަށް އެއް ލުމެކެވެ. ގޯލްކިކެއްނަމަ އިދިކޮޅު ޓީމަކަށް ކޯނަރެކެވެ.
ކުޅުންތެރިއެއް ބަދަލުކުރަން މި ފަހަރުގެ ސީޒަނުގައި ލިބޭނީ 10 ސިކުންތުގެ ވަގުތެކެވެ. އެ މުއްދަތުގެ ތެރޭގައި ބަދަލުނުކުރެވިއްޖެނަަމަ، ދެން، އެ ބަދަލު ކުރެވޭނީ އަލުން މެޗު ފަށާފައި އެއް މިނިޓް ހިނގާ ފަހުންނެވެ.
މި ސީޒަނުގަައި އަންނާނެ ބޮޑު ބަދަލެއްގެ ގޮތުގައި ބެލެވެނީ، ގޯލްކީޕަރު ޓެކްޓިކަލް ޓައިމް އައުޓް އެވެ. ގޯލްކީޕަރަށް އަނިޔާވެގެން މެޗު ހުއްޓާލާފައި އޮންނަ މުއްދަތުގައި، އެ ޓީމެއްގެ ކޯޗެއް އިހުތިޔާރުކުރާ ކުޅުންތެރިއަކު، އަލުން މެޗު ފެށުމަށް ފަހު، އެއް މިނިޓަށް ދަނޑުން ފައިބަންޖެހެ އެެވެ.
ޕްރޯ ރެފް އިން ބުނިގޮތުގައި، މި ބަދަލު ގެންނަ އެންމެ ބޮޑު ސަބަބަކީ، ގޯލްކީޕަރަށް ލިބޭ އަނިޔާ އަށް ފަރުވާ ހޯދާ ވަގުތަކީ، ޓީމުތަކުގެ ކޯޗުން ކުޅުންތެރިންނަށް ޓެކްޓިކަލް ކަންކަން ކިޔައިދިނުމާއި މެޗު ލަސްކުރުމަށް ބޭނުންކުރާ އުކުޅަކަށްވާތީ އެވެ.
މި ފަހަރުގެ ސީޒަނަށް އަންނާނެ ކަމަށް ކުރިން ބެލެވުނު އެހެން ނަމަވެސް، ބޭނުންނުކުރާ ބަދަލުތަކެއް ވެސް ވެ އެވެ. އެ ގޮތުން، ވީއޭއާރުން ގޯސްކޮށް ދިން ކޯނަރެއްތޯ މި ސީޒަނުގައި ނުބަލާނެ އެވެ. ފީފާ ވޯލްޑް ކަޕްގައި އޮތްގޮތަށް ލާޒިމްކޮށް، ހައިޑްރޭޝަން ބްރޭކެއް ނޯންނާނެ އެވެ. އޭގެ ބަދަލުގައި، ކުރިން ވެސް އަމަލުކުރަމުން އައި ގޮތަށް މެޗު ކުޅޭ ވަގުތު 30 ޑިގްރީ ސެލްސިއަސް އަށް ވުރެން މަތިވެއްޖެނަމަ، ހައިޑްރޭޝަން ބްރޭކް ދޭނެ އެވެ.
އިދިކޮޅު ޓީމުގެ ކުޅުންތެރިއަކާ ވާހަކަ ދައްކާއިރު އަނގަމަތީގައި އަތްއެޅި ކަމުގައި ވިޔަސް، ރަތް ކާޑެއް ދައްކަން ނުބަލާނެ އެވެ. އެކަމަކު، ކުޅުންތެރިއަކާ ނަސްލީ ގޮތުން ދިމާކޮށްފިނަަމަ، އެކަން ބެލުމަށްޓަކައި، ތުރީ ސްޓެޕް ޑިސްކްރިމިނޭޝަން ޕްރޮޓޮކޯލް ބޭނުންކުރާނެ އެވެ.
