އިންފޮމޭޝަން ކޮމިޝަނަރުގެ މަގާމަށް، އައްޔަންކުރަން މުހައްމަދު މުއިއްޒު ފޮނުއްވާފައިވާ ހެރިޓޭޖް މިނިސްޓްރީގެ ސްޓޭޓް މިނިސްޓަރު، އަބްދުލްއަޒީޒް ޖަމާލްގެ ނަން އަނބުރާ ގެންދިޔުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) މިއަދު ގޮވާލައްވައިފި އެވެ.
ކުޑޫ ނެރުއްވި ބަޔާނެއްގައި ވިދާޅުވީ އަބްދުލްއަޒީޒް މީގެ ކުރިން އިންފޮމޭޝަން ކޮމިޝަނަރުގެ މަގާމު ފުރުއްވިއިރު ގާނޫނު ތަންފީޒުކުރުން އޮތީ ވަރަށް ބަލިކަށި ހާލަތެއްގައި ކަމަށްވާއިރު، ގާނޫނުގައި ސަރީހަކޮށް ލާޒިމުކޮށްފައިވާ ގޮތާ ހިލާފަށް އާންމުކޮށް ހުޅުވާލައިގެން އަޑުއެހުންތައް ބޭއްވުމުގެ ބަދަލުގައި އޭނާ ސިއްރު މަޝްވަރާތަކަށް އިސްކަން ދެއްވި ކަމަށެވެ.
ކުޑޫ ފާހަގަކުރެއްވި ގޮތުގައި ޓްރާންސްޕޭރެންސީ މޯލްޑިވްސް އިން އަބްދުލްއަޒީޒްގެ ދައުރުގައި ކުރިއަށް ގެންދިޔަ އާރްޓީއައި އެސެސްމަންޓް ހޯދުންތަކަށް ބަލާއިރު ހުށަހެޅުނު މައްސަލަތަކުގެ 53 ޕަސަންޓު ބޭރުކޮށްލާފައިވާ ކަމަށާއި 16 އިންސައްތަ މައްސަލައަށް އެއްވެސް ޖަވާބެއް ދީފައި ނުވާ ކަމަށެވެ.
މީގެއިތުރުން އަސާސީ ހައްގަކަށް އެދޭއިރު ސަބަބު ބަޔާންކުރަން ނުޖެހޭ ނަމަވެސް، "މަހޯލި" ފޯމުތައް މެދުވެރިކޮށް މައުލޫމާތު ބޭނުންވާ ސަބަބު ލިޔަން މަޖުބޫރުކުރުވުމުން ދައުލަތުގެ އިދާރާތަކަށް މައުލޫމާތު ހިފެހެއްޓުމުގެ ފުރުސަތު ފަހިވެގެންދިޔަކަން ފާހަގަކޮށް ކުޑޫ ބުނީ އިދާރާތަކުން އިސްނަގައިގެން މައުލޫމާތު ހާމަކުރެވޭތޯ ބެލުމުގެ ޒިންމާވެސް އޭނާގެ ދައުރުގައި އޮތީ މުޅިން ދޫކޮށްލެވިފައި ކަމަށެވެ.
ނަމަވެސް 2019 ވަނަ އަހަރުން ފެށިގެން، އައި ކޮމިޝަނަރުންގެ ދައުރުގައި އަޑުއެހުންތައް އާންމުކޮށް ހުޅުވާލައިގެން ކުރިއަށް ގެންދަން ފެށުމުން އާރްޓީއައި ނިޒާމަކީ އަމަލީގޮތުން ބޭނުންކުރެވޭ، ރައްޔިތުންގެ އިތުބާރު ލިބިފައިވާ ވަސީލަތަކަށްވީކަން ކުޑޫ ފާހަގަކުރެއްވި އެވެ.
އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒް އައްޔަނުކުރަން ފެންނަކަމަށް ކޮމިޓީން ފާސްކޮށްފި
ކޮމިޓީގެ ފަސް މެންބަރުންގެ ތާއީދާއެކު މި ނަން ފާސްކުރިއިރު، އޭނާ މިހާރު ހުންނެވި ސިޔާސީ މަގާމުން އިސްތިއުފާ ދެއްވާނެ ކަމުގެ އިގުރާރުގައި ވަނީ ސޮއިކުރައްވާފައެވެ. ނަމަވެސް، އޭނާ ކުރިން އެ މަގާމުގެ އެއް ދައުރު ފުރިހަމަކުރައްވާފައިވާތީ، ގާނޫނީ ގޮތުން އިތުރު ދައުރަކަށް އައްޔަނުކުރެވިދާނެތޯ ވަނީ ސުވާލު އުފެދިފައެވެ.
އޭނާ ވިދާޅުވީ ވޭތުވެދިޔަ އަހަރުތަކުގައި ހޯދިފައިވާ ކުރިއެރުންތައް ރައްކާތެރިކޮށް ދަމަހައްޓަން ޖެހިފައިވާއިރު، އަލުން ކުރީގެ ސިއްރުވެރި އުސޫލުތައް އިހްތިޔާރުކުރައްވާނެ ކަމަށް ވިދާޅުވާ އަބްދުލްއަޒީޒް މަގާމަށް އައްޔަންކުރުމަކީ މުޅި ނިޒާމު ފަހަތަށް ސޮއްސައިލާނެ ކަމެއް ކަމަށެވެ.
މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން އަބްދުލްއަޒީޒްއާ މިއަދު އިންޓަވިއުކުރައްވައި، އޭނާއަށް 75 ޕަސަންޓަށްވުރެ މަތިން މާކްސް ދެއްވުމަށްފަހު، އޭނާގެ ނަން މަޖިލީހުގެ ތަޅުމަށް ފޮނުވުމަށް ކޮމިޓީން ވަނީ ފާސްކޮށްފަ އެވެ.
އަބްދުލްއަޒީޒް ޖަމާލުއަކީ ރާއްޖޭގެ އެންމެ ފުރަތަމަ އިންފޮމޭޝަން ކޮމިޝަނަރެވެ. އެހެންކަމުން، އިންފޮމޭޝަން ކޮމިޝަަނަރުގެ މަގާމަށް އިތުރު ދައުރަކަށް އޭނާ އައްޔަނުރެވިދާނެތޯ ވަނީ ސުވާލު އުފެދިފަ އެވެ.
އަބްދުލްއަޒީޒާ ގުޅިގެން ޝަކުވާތައް ހުށަހަޅަން ހަ ގަޑިއިރުުގެ ކުޑަ ވަގުތުކޮޅެއް ދިނުމަށް ފަހު، މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ވަނީ އިއްޔެ އިރުއޮއްސި 6:00 ޖެހިއިރު، އެ ފުރުސަތު ބަންދުކޮށްފަ އެވެ.
އާރުޓީއައި ގާނޫނުގައި އިންފޮމޭޝަން ކޮމިޝަނަރުގެ މަގާމުގެ މުއްދަތު ބަޔާންކުރާ މާއްދާގައި އޮންނަނީ އެ މަގާމަށް އައްޔަންކުރާ މީހެއްގެ ދައުރަކީ ފަސް އަހަރު ދުވަސް ކަމަށެވެ. އަދި، ދައުރު 10 އަހަރަށް އިތުރުކުރެވެނީ އެ މަގާމުގައި ހުރި މީހެއްގެ މަގާމުގައި އިތުރު ދައުރެއް ބަހައްޓަން ރައްޔިތުންގެ މަޖިލީހުން ފާސްކުރުމުން ކަމަށް ވެސް ގާނޫނުގައި އޮވެ އެވެ.
ގާނޫނުގައި މިހެން އޮތުމުން އަބްދުލްއަޒީޒަށް އިތުރު ދައުރަކަށް ނާދެވޭނެ ކަމަށް ގަބޫލުކުރާ މީހުން ބުނަނީ، އޭނާ ކުރިން އެ މަގާމުގައި އެއް ދައުރު ފުރިހަމަކުރައްވާފައިވާތީ އިތުރު ދައުރަކަށް ނާދެވޭނެ ކަމަށެވެ.
މި މައްސަލައިގައި އަދަދު ނޫހުން ވާހަކަ ދެއްކި ގާނޫނީ މާހިރުން ވެސް ބުނީ ގާނޫނުގެ އެ މާއްދާގެ އިބާރާތް އޮތް ގޮތުން މާނަކުރެވެނީ އިތުރު ދައުރެއް ނުދެވޭނެ ގޮތަށް ކަަމަށެވެ.
އާ އިންފޮމޭޝަން ކޮމިޝަނަރަކު އައްޔަންކުރަން އުޅޭއިރު، ރައީސް އޮފީހާއި ބައެއް ވުޒާރާތަކާއި ބައެއް އިދާރާތަކުގެ އިތުރުން ދައުލަތުގެ ކުންފުނިތަކުން މައުލޫމާތު ހާމަަނުކުރާ މައްސަލަ ވަރަށް ބޮޑެވެ.
