އިންފޮމޭޝަން ކޮމިޝަނަރުގެ މަގާމަށް އައްޔަނުކުރަން މަސައްކަތް ކުރަމުން އަންނަ އަބްދުލްއަޒީޒް ޖަމާލު އަބޫބަކުރު އެ މަގާމަށް އައްޔަންކުރުމާ މެދު އާންމުންގެ ހުރި ޝަކުވާތައް ހުށަހަޅަން ރައްޔިތުންގެ މަޖިލީހުން އެންމެ ހަ ގަޑިއިރު ދީފި އެވެ.
މަޖިލީހުގެ އިދާރާއިން މީގެ އިރުކޮޅެއް ކުރިން ނެރުނު އިއުލާނުގައި ވަނީ، އަބްދުލްއަޒީޒާ ގުޅޭ ގޮތުން އެއްވެސް ޝަކުވާއެެއް އޮތް ނަމަ މިއަދު ހަވީރު 6:00 ގެ ކުރިން މި މައްސަލަ ދިރާސާކުރަމުން އަންނަ މިނިވަން މުއައްސަސާތަކުގެ ކޮމިޓީއަށް ނޫނީ އެ އިދާރާއަށް ފޮނުވަން އަންގާފަ އެވެ.
މިހާ ކުޑަ ވަގުތުކޮޅެއް ޝަކުވާ ހުށަހަޅަން ދިންއިރު، މީގެ ކުރިން ވެސް 20 ވަނަ މަޖިލީހުން ވަނީ އެހެން މައްސަލަތަކުގައި ވެސް މި ގޮތަށް އަމަލުކޮށްފަ އެވެ. މިހެން ހެދުމުން އާންމުންނަށް ލިބިފައިވާ ޝަކުވާ ހުށަހެޅުމުގެ ހައްގަށް ހުރަސްއެޅޭ ކަމަށް އިދިކޮޅު ސިޔާސީ މީހުންނާއި ބައެއް އާންމުން ބުނި ނަމަވެސް، މަޖިލީހުން އެ ކަމަކަށް އިޖާބަ ނުދެ އެވެ.
އަބްދުލް އަޒީޒް ޖަމާލު އަބޫބަކުރު، މާޒީ، ލ. މާވަށް އަކީ ރާއްޖޭގެ ފުރަތަމަ އިންފޮމޭޝަން ކޮމިޝަނަރެވެ. އޭނާ އެ މަގާމު 2014 ވަނަ އަހަރުން 2019 ވަނަ އަހަރުގެ ނިޔަލަށެވެ. އޭނާ ވަނީ މި ސަރުކާރުގައި ވެސް ސްޓޭޓް މިނިސްޓަރު ފެންވަރުގެ މަގާމުތައް ފުރުއްވާފަ އެވެ.
އިންފޮމޭޝަން ކޮމިޝަނަރުގެ މަގާމަށް އައްޔަނުކުރަން ސަރުކާރަށް ތާއީދުކުރާ އަދި މި ސަރުކާރުގެ ސިޔާސީ މަގާމުތައް ފުރަމުން އަންނަ އަބްދުލްއަޒީޒު އައްޔަންކުރަން އުޅޭއިރު، ދައުލަތުގެ ވުޒާރާތަކުންނާއި ރައީސް އޮފީހުން މައުލޫމާތު ހާމަަނުކުރާ މައްސަލަ ވަނީ ބޮޑުވެފަ އެވެ. އަދި، މި މައްސަލައިގައި ސަރުކާރާއި އިދާރާތަކައި ދައުލަތުގެ ކުންފުނިތައް ގޯސްކުރާތީ، މިހާރުގެ އިންފޮމޭޝަން ކޮމިޝަނަރު، އަހުމަދު އާހިޒާ މެދު ސަރުކާރުގެ ހިތްހަމަނުޖެހުން ބޮޑެވެ.
އެ ގޮތުން މުއިއްޒު ވަނީ އާހީދަކީ އިދިކޮޅުގެ އޯޑަރަށް މަސައްކަތް ކުރައްވާ އިދިކޮޅުގެ އެޖެންޓެއް ކަމަށް ވެސް ތުހުމަތުކުރައްވާފަ އެވެ. ނަމަވެސް އާހިދު ވަނީ މި ވާހަކަަތައް ދޮގުކުރައްވާ، އޭނާ މަސައްކަތް ކުރަނީ ގާނޫނުގައި މަތިކޮށްފައިވާ ޒިންމާތަކާ އެއްގޮތަށް ކަމަށް ވިދާޅުވެފަ އެވެ.
