ކަނޑުމަތީ އެކި ހާދިސާތަކުގައި މިފަހުން ސަލާމަތީ ހިދުމަތްތަކުގެ އޮފިސަރުންތަކެއް މަރުވި މައްސަލައިގެ ތަހުގީގާ ބެހޭގޮތުން ސުވާލުކުރުމަށް ސިފައިންނާއި ފުލުހުންގެ ވެރިން ރައްޔިތުންގެ މަޖިލީހަށް ހާޒިރުކޮށްދޭން އެދިއްޖެ އެވެ.
މަޖިލީހުގެ ރައީސް، އަބްދުއްރަހީމް އަބްދުﷲއަށް ގަލޮޅު އުތުރު ދާއިރާގެ މަޖިލިސް މެންބަރު، މުހައްމަދު އިބްރާހިމް (ކުޑޫ) ފޮނުއްވި ސިޓީގައި ބުނެފައި ވަނީ މިފަހުން، ކައިރިކައިރީގައި ހިނގި ތަފާތު ހާދިސާތަކުގައި ރަސްމީ ވާޖިބު އަދާކުރަމުން ދަނިކޮށް ހަތަރު އޮފިސަރަކު މަރުވެފައިވާ ކަމަށެވެ.
އެ ހާދިސާތަކާ ގުޅިގެން އެއްވެސް އިންކުއަރީއެއް ނުވަތަ ތަހުގީގެއް ހިންގައި އެކަންކަމުގައި އެއްވެސް މީހެއްގެ އިހުމާލެއް އޮތްތޯ ބެލިފައި ނެތުމުން، ފުލުހުންނާ ސިފައިންގެ ވެރިން މަޖިލީހަށް ހާޒިރުކޮށްދިނުމަށް އެ ސިޓީގައި އެދިފައިވެ އެވެ.
ފުލުހުންނާއި ސިފައިންގެ ވެރިންނާ ކުރަން ބޭނުންވާ ސުވާލުތަކުގެ ތެރޭގައި ވ. އަތޮޅު ދެވަނަ ކަނޑުގެ އަޑީގައި ހުންނަ ހޮހޮޅައެއްގައި ތާށިވެފައި ޑައިވަރުން ސަލާމަތް ކުރުމުގެ އޮޕަރޭޝަންގައި ހަރަކާތްތެރިވަނިކޮށް މަރުވި ސިފައިންގެ ސްޓާފް ސާޖެންޓު މުހައްމަދު މަހުދީ އާއި މަސްތުވާތަކެތީގެ އޮޕަރޭޝަނެއްގައި ހަރަކާތްތެރިވަނިކޮށް މަރުވި ފުލުހުންގެ ސްޓާފް ސާޖެންޓު އަހުމަދު އާސިފްގެ ތަހުގީގާ ބެހޭ ސުވާލުތައް ހިމެނެ އެވެ.
އޭގެ އިތުރުން، ތ. މަޑިފުށިން ހިލަ އާއި ހިލަވެލި ބަރުކޮށްގެން ހުވަދުއަތޮޅު ރިސޯޓަކަށް ދަތުރުކުރި "ފްރެންޑް 4" ނަމަކަށް ކިޔާ ސަޕްލައި ދޯނި އަޑިއަށްދިޔަ ހާދިސާގައި ގެއްލިގެން ހޯދަމުންދާ ފުލުހުންގެ ސާޖަންޓް އަލީ ނާފިއު އާއި އެމްއެންޑީއެފްގެ ސްޓާފް ސާޖަންޓް އިބްރާހިމް އަހްމަދުގެ މައްސަލައިގެ ސުވާލުތައް ވެސް އެ ސިޓީގައި ހިމަނާފައިވެ އެވެ.
