ކ. ހިންމަފުށީގައި ހިންގާ ޑްރަގް ޓްރީޓްމެންޓް އެންޑް ރިހެބިލިޓޭޝަން ސެންޓަރުގެ ހާލަތާމެދު ހުރި ކަންބޮޑުވުންތަކާ ގުޅޭ ސިޓީއެއް ހޯމް މިނިސްޓަރު، އަލީ އިހުސާންއަށް ފޮނުވައިފި އެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު، މުހައްމަދު އިބްރާހިމް ލިޔުމުން ޖަވާބު ހޯއްދެވުމަށް އެދިވަޑައިގެން ފޮނުއްވި ސިޓީގައި ވަނީ އެ ސެންޓަރުގެ ހާލަތާމެދު އެ ތަނުން ފަރުވާ ހޯދާ މީހުންނާއި އެ މީހުންގެ އާއިލާތަކުގެ އިތުރުން ކަމާބެހޭ ފަރާތްތަކުން ހާމަކޮށްފައިވާ ކަންބޮޑުވުންތަކާ ބެހޭގޮތުން މައުލޫމާތު ސާފުކުރުމަށް އެދިފަ އެވެ.
އެގޮތުން، އެ ސެންޓަރުގެ އިމާރާތުގެ ހާލަތާއި ކާބޯތަކެއްޗާއި އަސާސީ ހިދުމަތްތަކާއި ސެންޓަރު މަރާމާތު ކުރުމާއި އެ ތަނުން ދޭ ފަރުވާގެ ބާވަތުގެ އިތުރުން އެ ސެންޓަރުން ދޭ ފަރުވާގެ ފެންވަރާއި އެ ފަރުވާ ދޭން ތިބޭ މުވައްޒަފުންގެ އިންތިޒާމުތަކާއި ގާބިލުކަމާ ބެހޭ ގޮތުން އެ ސިޓީގައި ސުވާލު ހިމަނާފައިވެ އެވެ.
ފަރުވާއަށް ބޭނުންވެގެން ސެންޓަރަކަށް ދާ ކޮންމެ މީހަކަށް ވެސް ރައްކާތެރި، އިންސާނީ ކަރާމާތް ހިމާޔަތްކުރެވިފައިވާ ސައިންޓިފިކް ހެކިތަކުގެ މައްޗަށް ބިނާވެފައިވާ ފަރުވާއެއް ދިނުމަކީ މަސްތުވާތަކެއްޗާ ބެހޭ ގާނޫނާއި ބައިނަލްއަގުވާމީ އިންސާނީ ހައްގުތަކުގެ މިންގަނޑުތަކުގައި ހައްގެއް ކަމަށް ބަޔާން ކޮށްފައިވާކަން އެ ސިޓީގައި ފާހަގަކޮށްފައިވެ އެވެ.
އެ ކަންކަން އެގޮތުގައި ފުރިހަމަކޮށް ނުދެވޭނަމަ، ފަރުވާގެ ނަތީޖާ ގެއްލި އަލުން އެ ވަބާގެ ތެރެއަށް މީހާ ދިޔުމަށް މަގުފަހިވާ ކަމަށް ވެސް އެ ސިޓީގައި ބަޔާން ކޮށްފައިވެ އެވެ.
އެ ސުވާލުތަކަކީ އާންމު މަސްލަހަތާ ވަރަށް ބޮޑަށް ގުޅިފައިވާ ކަންކަމަށް ވާތީ ވީހައިވެސް އަވަހަކަށް އެ ސުވާލުތަކުގެ ޖަވާބުދެއްވުމަށް އެ ސިޓީގައި އެދިފައިވެ އެވެ.
