މޯލްޑިވްސް މާކެޓިން މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރުސީ) ގެ މެނޭޖިން ޑިރެކްޓަރުގެ މަގާމުގައި ހުންނެވި، އިބްރާހިމް ޝިއުރީ އެ މަގާމުން އިސްތިއުފާދެއްވައިފި އެވެ.
ޝިއުރީ އެ މަގާމުން އިސްތިއުފާދެއްވާފައިވާކަން އަދަދު ނޫހަށް ވަނީ ކަށަވަރުވެފަ އެވެ. އޭނާ އެ މަގާމަށް އައްޔަނުކުރީ ޖޫން 13، 2024 ގަ އެވެ.
އެމްއެމްޕީއާރުސީގެ މެނޭޖިން ޑިރެކްޓަރުގެ މަގާމުން ޝިއުރީ އިސްތިއުފާދެއްވި ސަބަބެއް އަދި، ނޭނގެ އެވެ. އޭނާއަކީ މި ސަރުކާރުން އެ މަގާމަށް އައްޔަނުކުރި ދެވަނަ ބޭފުޅާ އެވެ. އެ މަގާމަށް މި ސަރުކާރުން އެންމެ ފުރަތަމަ އައްޔަނުކުރީ ފާތިމަތު ތައުފީގު (ކުޑީ) އެވެ.
ޝިއުރީ އަކީ ރާއްޖޭގެ ޓީޓީގައި ފާހަގަކުރެވޭ މޮޅު ކުޅުންތެރިޔެއް އަދި ކޯޗެކެވެ. އޭނާ ވަނީ ގައުމީ ޗެމްޕިއަންކަން ފަސް ފަހަރު ހޯދައިފަ އެވެ. އަދި ބައިނަލްއަގުވާމީ ގިނަ ކުޅިވަރު މުބާރާތްތަކުގައި ރާއްޖެ ތަމްސީލުކޮށްފައިވެ އެވެ.
މޮރިޝަސްގައި އޮތް އިންޑިއަން އޯޝަން އައިލެންޑް ގޭމްސްގައި ރާއްޖޭގެ އަންހެން ޓީމުން ތިން ރަން މެޑަލް ހޯދިއިރު ކޯޗެއްގެ ގޮތުގައި ޝިއުރީ ހަރަކާތްތެރިވި އެވެ.
ފާއިތުވި އަހަރުތަކުގައި ރާއްޖޭގެ ޓޭބަލް ޓެނިސް ޓީމުތަކުން ބޮޑެތި ކުރިއެެރުންތަކެއް ހޯދިއިރު އޭނާ ހުރީ ޓީޓީ އެސޯސިއޭޝަންގެ އިސް މަގާމެއްގަ އެވެ.
