ރާއްޖޭގެ ފަތުރުވެރިކަން އިސްތިހާރު ކުރަން އުފެއްދި ކުންފުނި އެމްއެމްޕީއާރްސީ މެދުވެރިކޮށް ހިންގި ބޮޑު ހިޔާނާތުގެ ފައިސާ ލިބުނު ޕޮޕިއުލާ މޯލްޑިވްސްގެ މައްޗަށް ޖިނާއީ ދައުވާއެއް ކޮށްދޭން އެދި އެންޓި ކޮރަޕްޝަން ކޮމިޝަނުން ޕްރޮސެކިއުޓާ ޖެނެރަލްގެ އޮފީހަށް މިިއަދު ފޮނުވައިފި އެވެ.
ޕޮޕިއުލާ މޯލްޑިވްސްއަކީ ރައްޔިތުންގެ މަޖިލީހުގެ ކުރީގެ މެންބަރު ރިޔާޒް ރަޝީދުގެ ދެ ދަރިން، ރީޝަމް ރިޔާޒް އަދި ރައުޝަން ރިޔާޒްގެ ނަމުގައި ރަޖިސްޓްރީކޮށްފައިވާ ކުންފުންޏެކެވެ.
އޭސީސީ އިން ބުނީ ޖުލައި 13، 2015، ގައި އެސްއޯއެފް ކުންފުނީގެ އެކައުންޓުން ޕޮޕިއުލާ މޯލްޑިވްސްގެ އެކައުންޓަށް 150،000 ޑޮލަރު ޖަމާކޮށްފައިވާ ކަމަށެވެ. އެސްއޯއެފް ކުންފުންޏަކީ އެމްއެމްޕީއާރްސީގެ ހިޔާނާތް ހިންގުމަށް ކުރީގެ ނައިބު ރައީސް އަހުމަދު އަދީބު ގެންގުޅުއްވި ކުންފުންޏެކެވެ.
"މި ފައިސާއަކީ ޑޮލަރު ގަނެވިއްކުމުގެ މުއާމަލާތަކުން ލިބުނު ފައިސާ ކަމަށް ދެއްކުމަށް އެ ކުންފުނިން މަސައްކަތް ކޮށްފައިވޭ. އަދި މި ފައިސާގެ އަސްލު އޮޅުވާލައި، ފައިސާއާ ގުޅޭ ހައްގުތައް ސިއްރުކުރުމަށާއި ފައިސާ ލިބުނު ގޮތް އޮޅުވާލުމަށް ޕޮޕިއުލާ މޯލްޑިވްސް ޕްރައިވެޓް ލިމިޓެޑްއިން މަސައްކަތްކޮށްފައިވޭ،" އޭސީސީ އިން ބުންޏެވެ.
އެ ދުވަސްވަރު، ތ. އޮޅުގިރި، ރިސޯޓެއްގެ ގޮތުގައި ތަރައްގީ ކުރަން ޕޮޕިއުލާ މޯލްޑިވްސް އިން ވަނީ އެކުއިޒިޝަން ފީއެއް ދައްކައިފަ އެވެ. އޭސީސީ އިން ބުނީ އެ ފައިސާއަކީ ކުށްކޮށްގެން ހޯދާފައިވާ ފައިސާކަން އެ ކޮމިޝަނަށް ޔަގީންވާ ކަމަށެވެ.
އޮޅުގިރި ނެގި ނަމަވެސް އެއްބަސްވުމާ އެއްގޮތަށް އެ ރަށް ތަރައްގީކޮށްފައިނުވާކަން އޭސީސީ އިން ފާހަގަ ކުރެ އެވެ. އަދި ރަށް ކުއްޔަށް ދޫކުރުމުގެ އެއްބަސްވުމާ އެއްގޮތަށް އަމަލުކޮށްފައިނުވާތީ އޮޅުގިރި ދައުލަތަށް ނަގައިދޭން ޓުއަރިޒަމް މިނިސްޓްރީގައި އެދޭނެ ކަމަށް ވެސް އޭސީސީ އިން ބުނެފައިވެ އެވެ.
އެމްއެމްޕީއާރްސީގެ މައްސަލައިގައި ޕޮޕިއުލާ މޯލްޑިވްސްގެ މައްޗަށް ދައުވާ ކުރަން ފޮނުވިއިރު، ބޮޑު ހިޔާނާތުގެ ފައިސާ ރިޔާޒް ރަޝީދަށް ވެސް ލިބުނުކަން މީގެ ކުރިން އޮތީ ހާމަވެފަ އެވެ. އެމްއެމްޕީއާރްސީގެ ފައިސާ ލިބުނު މީހުންގެ ލިސްޓު ނެރުނު އިރު އެސްއޯއެފް ކުންފުނިން ރިޔާޒް ރަޝީދުގެ އެކައުންޓަށް 17 މިލިއަން ރުފިޔާ ފޮނުވާފައި އޮތެވެ.
