ދިވެހި އިންޝުއަރެންސް ކުންފުންޏަށް 10 އަހަރު ފުރުން ފާހަގަކުރުމުގެ ގޮތުން ބާސެލޯ ނަސަންދުރާގައި ކުލަގަދަ ކޯޕަރޭޓް ގާލާ ނައިޓެއް ބާއްވައިފި އެވެ.
މި ހަފުލާގައި އެ ކުންފުނީގެ ކަސްޓަމަރުންނާއި، ވިޔަފާރީގެ ބައިވެރިންނާއި، ދާއިރާގެ އިސް ބޭފުޅުން ބައިވެރިވެވަޑައިގެން، ވޭތުވެދިޔަ ދިހަ އަހަރު ދުވަހުގެ ތެރޭގައި އެ ކުންފުނިން ހޯދާފައިވާ ކުރިއެރުމާއި ކާމިޔާބީތައް ފާހަގަކުރެއްވި އެވެ.
މި ހާއްސަ ރަސްމިއްޔާތުގައި ދިވެހި އިންޝުއަރެންސްގެ ކުރިމަގަށް އަމާޒުކޮށްގެން ވަރަށް މުހިންމު ދެ އިސްނެގުމެއް ވަނީ އިފުތިތާހުކޮށްފަ އެވެ. އެއީ ޑިޖިޓަލް ޓްރާންސްފޯމޭޝަނަށް އަމާޒުކޮށްގެން ތައާރަފުކުރި ދިވެހި ޑިޖިޓަލް އަދި އިޖުތިމާއީ ޒިންމާގެ ދަށުން ތައާރަފުކުރި ތައުލީމީ ޕްރޮގްރާމް ދިވެހި ފަށަނެވެ.
ދިވެހި ޑިޖިޓަލް އަކީ އިންޝުއަރެންސްގެ ހިދުމަތްތައް ކުރިއަށްވުރެ ފަސޭހަ، އަވަސް އަދި ގާތުން ލިބޭނެ މަގު ފަހިކޮށްދިނުމަށް ފެށި މަޝްރޫއެކެވެ. މި ނިޒާމު ރަސްމީކޮށް އިފުތިތާހުކުރުމާއެކު، ކަސްޓަމަރުންނަށް މިހާރު އޮންލައިންކޮށް އިންޝުއަރެންސް ޕޮލިސީތަކަށް އެދި ހުށަހެޅޭނެ އެވެ.
މީގެ ސަބަބުން ކަރުދާސް ފޯމު ފުރުމާއި އަތުން ކުރަންޖެހޭ މަސައްކަތްތައް ވަރަށް ބޮޑަށް މަދުވެގެންދާނެ އެވެ. ކުންފުނީގެ އަމާޒަކީ 2027 ވަނަ އަހަރުގެ ފުރަތަމަ ކުއާޓަރު ނިމުމުގެ ކުރިން ހުރިހާ އިންޝުއަރެންސް ޕްރޮޑަކްޓްތަކެއް އޮންލައިންކޮށް ލިބޭނެ އިންތިޒާމު ހަމަޖެއްސުމެވެ. މީގެ އިތުރުން ކުރިއަށް އޮތް ތަނުގައި ހާއްސަ މޮބައިލް އެޕްލިކޭޝަނެއް ތައާރަފުކުރުމަށް ވެސް ވަނީ ރޭވިފަ އެވެ.
މި ރަސްމިއްޔާތުގައި އިފުތިތާހުކުރި ދެވަނަ މަޝްރޫއު ކަމަށްވާ ދިވެހި ފަށަން އަކީ އިންޝުއަރެންސް އަދި މާލީ ދާއިރާއިން މީހުން ބިނާކުރުމަށް ފެށި ތައުލީމީ ހަރަކާތެކެވެ. ފަށަން މި ނަމަކީ ދޯނިފަހަރުގެ ބަނޑުފިލާގެ މައިގަނޑު އަސާސަށް ކިޔާ ނަމަކަށްވާއިރު، މި ޕްރޮގްރާމުގެ މަގުސަދަކީ މުޖުތަމައުގައި މާލީ ހޭލުންތެރިކަމުގެ ވަރުގަދަ ބިންގަލެއް އެޅުމެވެ.
މޯލްޑިވްސް ކެޕޭސިޓީ ޑިވެލޮޕްމަންޓް އެންޑް ގަވަނަންސް އިންސްޓިޓިއުޓާ ގުޅިގެން ހިންގާ މި ޕްރޮގްރާމުގެ ދަށުން، މާލީ ގޮތުން ރަނގަޅު ނިންމުންތައް ނިންމުމަށް ބޭނުންވާ އަމަލީ ތަމްރީނާއި މައުލޫމާތު ފޯރުކޮށްދެވޭނެ އެވެ.
އަހަރީ ދުވަހުގެ މި ހަފުލާގައި ދިވެހި އިންޝުއަރެންސްގެ ކުރިއެރުމުގައި އެންމެ މުހިންމު ދައުރެއް އަދާކުރި ފަރާތްތަކުގެ އަގުވަޒަންކޮށް ވަނީ އެވޯޑު ދީފަ އެވެ. މީގެ ތެރޭގައި ކުންފުނީގެ އެންމެ ފާހަގަކޮށްލެވޭ ބައިވެރިންނާއި އިތުބާރުހުރި ކަސްޓަމަރުން ހިމެނެ އެވެ. މި އެވޯޑުތަކަކީ ވޭތުވެދިޔަ ދިހަ އަހަރު ދުވަހު އެ ފަރާތްތަކުން ބެހެއްޓި ގާތްކަމާއި ދިން އެއްބާރުލުމަށް ދެވުނު ޝަރަފެކެވެ.
ދިވެހި އިންޝުއަރެންސުން ބުނި ގޮތުގައި މި ފާއިތުވި ދިހަ އަހަރަކީ އިތުބާރާއި ވަރުގަދަ ގުޅުންތަކެއްގެ މައްޗަށް ބިނާވެފައިވާ ދަތުރެކެވެ. ކުރިއަށް އޮތް ތަނުގައި ވެސް ޓެކްނޮލޮޖީގެ އެހީގައި ހިދުމަތްތައް ތަރައްގީކޮށް، މުޖުތަމައަށް ފައިދާހުރި ކަންކަމުގައި ދެމިއޮންނާނެ ކަމުގެ ޔަގީންކަން އެ ކުންފުނިން ވަނީ ދީފަ އެވެ.
