ބާސެލޯނާ (އޮގަސްޓް 8) - ލޯން އެއްބަސްވުމެއްގެ ދަށުން ބާސެލޯނާގެ އުރުގުއޭ ޑިފެންޑަރު، ރޮނާލްޑް އަރައުހޯ، އިނގިރޭސި ޕްރިމިއާ ލީގުގެ ލިވަޕޫލަށް ދޫކޮށްލުމަށް ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުގައި، އުމުރުން 27 އަހަރުގެ އަރައުހޯ ލިވަޕޫލަށް ދޫކޮށްލާ ލޯން ޑީލުގައި، ކުރިއަށް އޮތް ސީޒަން ނިމުމުން، އެއްބަސްވުން ދާއިމީ ކުރެވޭނެ މާއްދާއެއް ހިމަނަން ވެސް ބާސެލޯނާ އިން ބޭނުންވެ އެވެ.
ފާއިތުވި ހަތަރު ސީޒަނުގެ ތެރެއިން ތިން ސީޒަނުގައި ބާސެލޯނާ އިން ސްޕެނިޝް ލީގުގެ ޗެމްޕިއަންކަން ހޯދިއިރު، އަރައުހޯ ވަނީ މުހިންމު ދައުރެއް އަދާކޮށްފަ އެވެ. އެ ގޮތުން، މިދިޔަ ސީޒަނުގައި ބާސެލޯނާގެ ކެޕްޓަނަކީ ވެސް އަރައުހޯ އެވެ.
ބާސެލޯނާާއާ އެކު، 2031 ވަނަ އަހަރުގެ ޖޫން މަހުގެ ނިޔަލަށް ކޮންޓްރެކްޓްގައި ހުރި އަރައުހޯ، ދޫކޮށްލުމަކީ އެ ކްލަބްގެ ކޯޗު ހަންސީ ފްލިކް އާއި ސްޕޯޓިން ޑިރެކްޓަރު، ޑެކޯގެ ނިންމުމެއް ކަމަށް ރިޕޯޓްތައް ބުނެ އެވެ. މިދިޔަ ސީޒަނުގައި އަރައުހޯ، ބާސެލޯނާގެ ފުރަތަމަ އެގާރައިގައި ހިމެނިގެން ކުޅެފައިވަނީ، އެންމެ 11 މެޗެވެ. އަދި، ކުރިއަށް އޮތް ސީޒަނުގައި ވެސް ފްލިކްގެ އެއް ނަމްބަރު ޑިފެންސިވް ޕާޓްނާޝިޕަކީ، ޕައު ކުބަރްސީ އާއި ޖެރާޑް މާޓީން ކަމަށްވާތީ، އަރައުހޯ ދޫކޮށްލަން ނިންމީ އެވެ.
އުރުގުއޭގެ ބޮސްޓަން ރިވާ ދޫކޮށް، 2018 ވަނަ އަހަރު ބާސެލޯނާ އަށް ބަދަލުވި އަރައުހޯ ވަނީ އެ ކްލަބަށް 200 އަށް ވުރެން ގިނަ މެޗުުގައި ކުޅެދީފަ އެވެ.
ލިވަޕޫލުން މި ފަހަރުގެ ޓްރާންސްފާ މާކެޓްގައި ޑިފެންޑަރަކު ގެންނަން ޖެހުނު މައިގަނޑު ސަަބަބަކީ، މިދިޔަ ސީޒަނުގެ ނިޔަލަށް ކޮންޓްރެކްޓްގައި ހުރި ފްރާންސްގެ ޑިފެންޑަރު، އިބްރާހިމާ ކޮނާޓޭ، އެއްބަސްވުން އާ ނުކޮށް، ރެއާލް މެޑްރިޑަށް ބަދަލުވުމުންނެވެ. އަދި، މި ވަގުތު ލިވަޕޫލްގައި ތިބި ސެންޓްރަލް ޑިފެންޑަރުންގެ ގޮތުގައި ބޭނުންކުރެވޭ ކުޅުންތެރިންނަށް ބަލާއިރު، އަނިޔާ އާއި ފިޓްނަސްގެ މައްސަލަ ގިނަވުމުންނެވެ.
