ރައީސް އޮފީހުން ނީލަމުގައި ވިއްކާލާފައިވަނީ ކަތުރުފަނި އެޅުމުގެ ސަބަބުން ބޭނުން ނުކުރެވޭވަރަށް ހަލާކުވެ، ބަލަހައްޓަން ދަތިވި މޭޒެއް ކަމަށް ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) މިއަދު ވިދާޅުވެއްޖެ އެވެ.
މުންދު ނެރުއްވި ނޫސްބަޔާނެއްގައި ވިދާޅުވީ ނީލަމުގައި ވިއްކާލާފައިވާ ކަމަށް ބުނެ މީޑިއާގައި ދައުރުވަމުންދާ ފޮޓޯގައިވާ މެޒަކީ ރާއްޖޭގެ އެއްވެސް ރައީސަކު އެއްވެސް ދުވަސްވަރެއްގައި ބޭނުންފުޅުކުރައްވާފައިވާ ރަސްމީ މޭޒެއް ނޫން ކަމަށެވެ.
"މީޑިއާގައި ދައުރުވަމުންދާ ފޮޓޯގައިވާ މޭޒުކޮޅު މި އޮފީހުން ނީލަމަށްލާފައިވާނީ، ކަތުރުފަނިއެޅުމުގެ ސަބަބުން ބޭނުން ނުކުރެވޭވަރަށް ހަލާކުވެ، ބަލަހައްޓަން ދަތިވުމުގެ ސަބަބުން، ދައުލަތުގެ މިފަދަ މުދާ ނީލަމަށްލުމަށް އޮންނަ އުސޫލުތަކާއި އިޖްރާއަތުތަކާ އެއްގޮތްވާގޮތުގެ މަތިން،" އޭނާ ނެރުއްވި ބަޔާނުގައި ވިދާޅުވި އެވެ.
ނަމަވެސް ނީލަމުން މޭޒުކޮޅުތަކާއި ބައެއް ގޮނޑިތައް ގަތް ފަރާތުން އަދަދު އަށް ބުނީ، އެ ތަކެތި މީގެ ދެ ހަފުތާއެއްހާ ދުވަސްކުރިން ނީލަންކީއިރު ރައީސް އޮފީހުން ދިން މައުލޫމާތުގައި އެއީ ފަސް ރައީސަކު ބޭނުންކުރެއްވި މޭޒުކޮޅެއް ކަމަށް ބުނެފައިވާ ކަމަށެވެ.
ނީލަމުގައި ވިއްކާލި ތަކެތީގެ ތެރޭގައި ރާއްޖޭގެ ފަސް ރައީސަކު ބޭނުންކުރެއްވި ރަސްމީ މޭޒުކޮޅެއްގެ އިތުރުން، ނައިބު ރައީސުން ބޭނުންކުރެއްވި މޭޒުކޮޅަކާއި، ކުރީގެ ބައެއް ރައީސުން ބޭނުންކުރެއްވި ކޮފީ ޓޭބަލްއެއް އަދި އަގުބޮޑު ގޮނޑިތަކެއް ހިމެނެ އެވެ. މީގެއިތުރުން ރައީސުންގެ މޭޒުކޮޅުގައި ބޭނުންކުރި ބައެއް ފޯނުތަކާއި ކަބަޑުގެ އިތުރުން ދައުލަތުގެ ބައެއް އެހެން މުދާވެސް ވަނީ ނީލަންކިޔާފަ އެވެ.
ފަސް ރައީސުން ބޭނުންކުރެއްވި ތާރީހީ މޭޒުކޮޅެއް އާސަރުނުކޮށް ނީލަމުގައި ވިއްކާލައިފި
"މިއީ ވަރަށް ތާރީހި އަދި ދައުލަތުގެ މަތީ ފަންތީގެ ނިންމުންތައް ނިންމެވުމުގައި ބޭނުންކުރެއްވި މުހިންމު މުދަލެއް،" މައުލޫމާތު ދިން އެއް ބޭފުޅަކު ވިދާޅުވި އެވެ.
ނައިބު ރައީސުންގެ މޭޒުކޮޅަކީ ކުރީގެ ނައިބު ރައީސް މުހައްމަދު ވަހީދު ހަސަން މަނިކާއި ވަހީދުންދީން ބޭނުންކުރެއްވި މޭޒުކޮޅެއް ކަމަށް ވެސް ރައީސް އޮފީހުން މައުލޫމާތު ދީފައިވާ ކަމަށް އޭނާ ބުންޏެވެ.
މި އަގުބޮޑު ތާރީހީ މޭޒުކޮޅު ނީލަމުގައި ގަތީ 12500ރ. އަށް ކަމަށް އެ ގަތް މީހަ ބުންޏެވެ. އޭނާ ބުނީ ރައީސް އޮފީހުން ބުނާ ގޮތުގައި އެ މޭޒުކޮޅަކީ ޕޮލެންޑުން އެތެރެކުރި މޭޒުކޮޅެކެވެ.
އެނާ ކިޔައިދިން ގޮތުގައި މިއީ އިސްކުރެއް ވެސް ނުޖެހޭ ގޮތަށް ރާވާލާފައިވާ، އަގުބޮޑު ލަކުޑިން ތައްޔާރުކޮށް، ކަސްޓަމައިޒްކޮށްފައިވާ މޭޒުކޮޅެކެވެ.
ދައުލަތުގެ އެންމެ މަތީ ވެރިން ބޭނުންކުރެއްވި މިފަދަ ތާރީހީ ތަކެތި އާންމު ނީލަމެއްގައި ވިއްކާލުމަކީ، ރާއްޖޭގެ ސިޔާސީ ތާރީހާ ގުޅުންހުރި މުހިންމު އާސާރުތަކެއް ގެއްލިގެންދާނެ ކަމެކެވެ.
