އިންފޮމޭޝަން ކޮމިޝަނަރުގެ ވާޖިބަށް ހުރަސްއަޅައިގެން ރައީސް އޮފީސް 2،000ރ. އިން މިއަދު ޖޫރިމަނާކޮށްފި އެވެ.
އިންފޮމޭޝަން ކޮމިޝަނަރު އަހްމަދު އާހިދު ވިދާޅުވީ ރައީސް އޮފީސް ޖޫރިމަނާކުރަން ނިންމީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން އެ އޮފީހުން ހޯދަން އެދޭ މައުލޫމާތުތައް ފޯރުކޮށްދޭން ދޭ މުއްދަތުތަކުގައި ޖަވާބު ފޯރުކޮށްނުދޭތީ ކަމަށެވެ.
"އަޅުގަނޑު މި ގަސްދުކުރަނީ ރައީސުލްޖުމްހޫރިއްޔާގެ އޮފީހަށް ވަރަށް ގިނަފަހަރު މިގޮތަށް ޖަވާބުތައް ފޯރުކޮށްދިނުމަށް ފުރުސަތު ދިނުމުންވެސް އޮގޮތަށް އަމަލުކޮށްފައި ނުވާތީވެ، ގާނޫނުގެ 67 ވަނަ މާއްދާ ނ ގެ (2) ގެ ދަށުން އެއީ އިންފޮމޭޝަން ކޮމިޝަނަރުގެ ވާޖިބުތަކަށް ހުރަސްއެޅުން ކަމަށް ބެލެވި ރައީސުލްޖުމްހޫރިއްޔާގެ އޮފީސް ޖޫރިމަނާކުރުމަށް،" އާހިދު ވިދާޅުވި އެވެ.
އާހިދު ވިދާޅުވީ ރައީސް އޮފީހުން މައުލޫމާތު ފޯރުކޮށްނުދީގެން ބާއްވާ ފުރަތަމަ އަޑުއެހުންތަކުގައި މައުލޫމާތު ފޯރުކޮށްދޭން އަންގާ މުއްދަތުތަކުގައި އެ މައުލޫމާތު ފޯރުކޮށްނުދިނުމަކީ އިންފޮމޭޝަން ކޮމިޝަނަރުގެ ވާޖިބަށް ހުރަސްއެޅޭފަދަ އަމަލެއް ކަމަށެވެ.
"އެކުއެކީގައި މިއަދު މި ބޭއްވުނު ފަސް ޝަކުވާގައި އިދާރާއިން އަމަލުކޮށްފައިވާ ގޮތްތަކަށް ބަލާއިރުގައި އިދާރާއިން މައުލޫމާތު ފޯރުކޮށްދިނުމަށް ކަނޑައަޅާފައިވާ މުއްދަތުތަކުގައި ފުރަތަމަ ބައްދަލުވުމުގައި ފޯރުކޮށްދިނުމަށް އެދި ފުރުސަތު ދިނުމަށްފަހު ޖަވާބު ދިނުމަށް އެންގޭ އެންގުމަށް އިދާރާއިން އެއްގޮތަކަށްވެސް އަމަލުކޮށްފައި ނުވާ ނުވުމަކީ ގާނޫނުގައި ކަނޑައަޅާފައިވާ އިންފޮމޭޝަން ކޮމިޝަނަރުގެ ވާޖިބަށް ހުރަސްއެޅުން ކަމުގައި ބެލެވޭފަދަ އަމަލެއް،" އާހިވު ވިދާޅުވި އެވެ.
ރައީސް އޮފީހުން ހޯދަން އެދޭ މައުލޫމާތުތައް އެ ކޮމިޝަނުން ފޯރުކޮށްދޭން އައިކޮމްއިން ތަކުރާރުކޮށް އެންގުމުންވެސް ފޯރުކޮށްނުދޭކަން ފާހަގަކުރެވެ އެވެ. އޭގެއިތުރުން ފޯރުކޮށްދޭ މައުލޫމާތުތައް ފުރިހަމަ ނުވުމާއި، ނުގުޅޭ ޖަވާބުތައް ދިނުންވެސް ހިމެނެ އެވެ.
އަދަދު ނޫހުން ރައީސް އޮފީހުން ހޯދަން އެދިފައިވާ މައުލޫމާތުތައް ފޯރުކޮށްނުދީގެން އެ ނޫހުން ޝަކުވާ ހުށަހެޅުމުން އައިކޮމް އިން މިދިޔަ ހަފްތާގައި ނިންމާފައިވަނީ އިތުރަށް ދޭ މުއްދަތުގައި މައުލޫމާތު ފޯރުކޮށްނުދީފިނަމަ ރައީސް އޮފީހުގެ މައްޗަށް ދައުވާ ކުރުމަށް ޕްރޮސެކިއުޓާ ޖެނެރަލް އޮފީސް (ޕީޖީ) އަށް ފޮނުވުމަށެވެ.
