ރައީސް މުހައްމަދު މުއިއްޒު މިދިޔަ އެޕްރީލް މަހު އުފެއްދެވި ދިވެހިރާއްޖޭގެ ސަރަހައްދުތަކާ ބެހޭ އޮފީހަށް ކުރީގެ ބަންޑާރަނައިބު އާއިޝަތު އާޒިމާ ޝުކޫރު މިއަދު އައްޔަނުކޮށްފި އެވެ.
އާޒިމާ އަދަދު އަށް ވިދާޅުވީ އޭނާ އައްޔަނުކުރީ އެޕްރީލް 16، 2026 ގައި އުފެއްދި "މޯލްޑިވްސް ނެޝަނަލް ޓެރިޓަރީ އެންޑް ސޮވެރިނިޓީ އޮފީސް" ގެ ޕްރިންސިޕަލް ސެކެޓްރީ ޓު ދަ ޕްރެޒިޑެންޓުގެ މަގާމަށް ކަމަށެވެ.
ރާއްޖޭގެ ސަރަހައްދުތަކާބެހޭ އޮފީހުން ކުރަމުންގެންދާނެ މަސައްކަތްތަކުގެ ތެރޭގައި، ރާއްޖޭގެ ސަރަހައްދުގެ ބައުންޑަރީއާ ގުޅޭގޮތުން އުފެދޭ ހިލާފުތަކާ ގުޅުންހުރި މައްސަލަތައް ހައްލުކުރުމުގައި ސަރުކާރުގެ ކަމާބެހޭ އިދާރާތަކާއި ބައިނަލްއަގުވާމީ ފަރާތްތަކާއެކު އިސްވެ ހަރަކާތްތެރިވުން ހިމެނެ އެވެ.
އޭގެއިތުރުން ރާއްޖޭގެ ސަރަހައްދުގެ ރަސްމީ ބޭސްލައިންތަކާއި ބައުންޑަރީ ލިމިޓްތަކުގެ ކޯޑިނޭޓްތައް ކަނޑައަޅައި، ބައުންޑަރީ މެޕްތަކާއި އެއާ ގުޅުންހުރި އިންސްޓްރޫމެންޓްތަކުގެ މައުލޫމާތު ފޯރުކޮށްދިނުންވެސް އެ އޮފީހުގެ މަސްއޫލިއްޔަތުތަކުގެ ތެރޭގައި ހިމެނެ އެވެ.
މުހައްމަދު މުއިއްޒުގެ އާއިލާގެ ވަކީލު އާޒިމާ ވަނީ ޕީއެންސީގެ ޓީކެޓުގައިމާލެ ސިޓީގެ މޭޔަރު އިންތިހާބުގެ ބައި-އިލެކްޝަންގައި އެމްޑީޕީގެ އާދަމް އާޒިމްއާ ވާދަކުރައްވައި ނާކާމިޔާބީއާ ކުރިމަތިލައިފަ އެވެ.
އެމްއެމްޕީއާރސީގެ ހިޔާނާތުގެ މައްސަލާގައި ކުރީގެ ރައީސް އަބްދުﷲ ޔާމީނަަށް މަނީ ލޯންޑާ ކުރަން މަގުފަހިކޮށްދިން ކަމުގެ ތުހުމަތުގައި އޭރުގެ ރައީސް އޮފީހުގެ ލީގަލް އެފެއާޒް މިނިސްޓަރު އާޒިމާގެ މައްޗަށް އުފުލި ދައުވާތައް ކުރިއަށް ނުގެންދަން ޕްރޮސެކިއުޓާ ޖެނެރަލް އޮފީހުން މިދިޔަ އަހަރުގެ ނޮވެމްބަރު މަހުގެ ތެރޭގައި ވަނީ ނިންމާފަ އެވެ.
2023 ވަނަ އަހަރުގެ ރިޔާސީ އިންތިހާބުގެ ފުރަތަމަ ބުރުގައި އާޒިމާ ތާއިދު ކުރެއްވީ އެމްއެންޕީގެ ކެންޑިޑޭޓު މުހައްމަދު ނާޒިމަށެވެ. މުއިއްޒަށް އާޒިމާ ތާއީދު ކުރެއްވީ ދެ ވަނަ ބުރުގަ އެވެ.
