ދިވެހިރާއްޖޭގެ ދައުލަތުގެ އެންމެ މަތީ ވެރިން ބޭނުންކުރެއްވި ތާރީހީ ގޮތުން މުހިންމު ތަކެތި އާސާރީ ތަކެތީގެ ގޮތުގައި ރައްކާތެރިކުރުމުގެ ބަދަލުގައި، ރައީސުލްޖުމްހޫރިއްޔާގެ އޮފީހުން ކުރިއަށްގެންދިޔަ ނީލަމެއްގައި އެ ތަކެތި ވިއްކާލައިފި އެވެ.
މި ނީލަމުގައި ވިއްކާލި ތަކެތީގެ ތެރޭގައި ރާއްޖޭގެ ކުރީގެ ރައީސުންނާއި ނައިބު ރައީސުން ބޭނުންކުރެއްވި ރަސްމީ މޭޒުކޮޅުތަކާއި އެ ނޫންވެސް ބައެއް މުހިންމު ފަރުނީޗަރު ހިމެނެ އެވެ.
މި ނީލަމުގައި ވިއްކާލި ތަކެތީގެ ތެރޭގައި ރާއްޖޭގެ ފަސް ރައީސަކު ބޭނުންކުރެއްވި ރަސްމީ މޭޒުކޮޅެއްގެ އިތުރުން، ނައިބު ރައީސުން ބޭނުންކުރެއްވި މޭޒުކޮޅަކާއި، ކުރީގެ ބައެއް ރައީސުން ބޭނުންކުރެއްވި ކޮފީ ޓޭބަލްއެއް އަދި އަގުބޮޑު ގޮނޑިތަކެއް ހިމެނެ އެވެ. މީގެއިތުރުން ރައީސުންގެ މޭޒުކޮޅުގައި ބޭނުންކުރި ބައެއް ފޯނުތަކާއި ކަބަޑުގެ އިތުރުން ދައުލަތުގެ ބައެއް އެހެން މުދާވެސް ވަނީ ނީލަންކިޔާފަ އެވެ.
ނީލަމުން މޭޒުކޮޅުތަކާއި ބައެއް ގޮނޑިތައް ގަތް ފަރާތުން ބުނީ، އެ ތަކެތި މީގެ ދެ ހަފުތާއެއްހާ ދުވަސްކުރިން ނީލަންކީއިރު ރައީސް އޮފީހުން ދިން މައުލޫމާތުގައި އެއީ ފަސް ރައީސަކު ބޭނުންކުރެއްވި މޭޒުކޮޅެއް ކަމަށް ބުނެފައިވާ ކަމަށެވެ. އަދި ނައިބު ރައީސުންގެ މޭޒުކޮޅަކީ ކުރީގެ ނައިބު ރައީސް މުހައްމަދު ވަހީދު ހަސަން މަނިކާއި ވަހީދުންދީން ބޭނުންކުރެއްވި މޭޒުކޮޅެއް ކަމަށް ވެސް ރައީސް އޮފީހުން މައުލޫމާތު ދީފައިވާ ކަމަށް އޭނާ ބުންޏެވެ.
އިތުބާރު ހުރި މަސްދަރުތަކުން ކަށަވަރުކޮށްދިން ގޮތުގައި، ރައީސުން ބޭނުންކުރެއްވި މޭޒުކޮޅަކީ ރައީސް އޮފީހުގެ އާ އިމާރާތް ބޭނުންކުރަން ފެށުމަށްޓަކައި، ކުރީގެ ރައީސް މައުމޫން އަބްދުލްގައްޔޫމްގެ ރަސްމީ މޭޒުކޮޅެއްގެ ގޮތުގައި ބޭނުންކުރައްވަން ފެއްޓެވި މޭޒުކޮޅެކެވެ. އެއަށް ފަހު، މުހައްމަދު ނަޝީދު، މުހައްމަދު ވަހީދު ހަސަން މަނިކު، އަބްދުﷲ ޔާމީން، އިބްރާހިމް މުހައްމަދު ސޯލިހު، މި މޭޒުކޮޅު ރަސްމީ ބޭނުންތަކަށް ބޭނުން ކުރެއްވި ކަމަށް މައުލޫމާތު ދެއްވި ދެ މަސްދަރަކުން ވިދާޅުވި އެވެ.
"މިއީ ވަރަށް ތާރީހި އަދި ދައުލަތުގެ މަތީ ފަންތީގެ ނިންމުންތައް ނިންމެވުމުގައި ބޭނުންކުރެއްވި މުހިންމު މުދަލެއް،" މައުލޫމާތު ދިން އެއް ބޭފުޅަކު ވިދާޅުވި އެވެ.
މި އަގުބޮޑު ތާރީހީ މޭޒުކޮޅު ނީލަމުގައި ގަތީ 12500 ރުފިޔާއަށް ކަމަށް އެ ގަތް މީހަ ބުންޏެވެ.
އެނާ ކިޔައިދިން ގޮތުގައި މިއީ އިސްކުރެއް ވެސް ނުޖެހޭ ގޮތަށް ރާވާލާފައިވާ، އަގުބޮޑު ލަކުޑިން ތައްޔާރުކޮށް، ކަސްޓަމައިޒްކޮށްފައިވާ މޭޒުކޮޅެކެވެ.
"ރައިސް އޮފިހުން ބުނި ގޮތުގައި މިއީ ޕޮލެންޑުން އެތެރެކުރި ހާއްސަ މޭޒުކޮޅެއް،" ނީލަމުން ގަތް މީހާ ބުންޏެވެ.
މި މޭޒުކޮޅު ބެލިއިރު، މޭޒުގެ ވަތްގަނޑުތައް ހުރީ ދޫނުވެ، ވަރަށް ބަރާބަރަށް މަސައްކަތްކުރާ ހާލަތުގަ އެވެ. ތަޅުގަނޑުތައް ވެސް އެބަ ހުއްތެވެ. ނީލަމުގައި މި މޭޒުކޮޅު ވިއްކާލުމުގެ ކުރިން މޭޒުގައި ހަރުކޮށްފައި ހުރި ދައުލަތުގެ ނިޝާން ނައްޓާލާފައިވެ އެވެ.
ނީލަމުން މޭޒު ގަތް މީހާ އިތުރަށް ބުނީ، މިފަދަ ތާރީހީ މޭޒުކޮޅެއް އޭނާގެ އަތުގައި ހުރި ވާހަކަ ގައުމީ ދާރުލްއާސާރަށް އެންގި ކަމަށެވެ. ނަމަވެސް ދާރުލްއާސާރުން ބުނީ އެ މޭޒުކޮޅު އާސާރުގައި ބަހައްޓަން ބޭނުންނަމަ، ދާރުލްއާސާރަށް އެ މޭޒުކޮޅު ހަދިޔާކުރަން ޖެހޭނެ ކަމަށެވެ.
ދައުލަތުގެ އެންމެ މަތީ ވެރިން ބޭނުންކުރެއްވި މިފަދަ ތާރީހީ ތަކެތި އާންމު ނީލަމެއްގައި ވިއްކާލުމަކީ، ރާއްޖޭގެ ސިޔާސީ ތާރީހާ ގުޅުންހުރި މުހިންމު އާސާރުތަކެއް ގެއްލިގެންދާނެ ކަމެކެވެ.
ރައީސުން ބޭނުންކުރެއްވި މޭޒުކޮޅު ނީލަމުގައި ވިއްކާލުމާ ގުޅޭ ގޮތުން ރައީސް އޮފީހުގެ ބަހެއް އަދި ނުލިބެ އެވެ.
ނީކަމުގައި ވިއްކާލި އިތުރު ބައެއް ތަކެތީގެ ފޮޓޯ
